Med. Supdt. thar in Dr J. Songgoukham
CCPUR: Dr J. Songgoukham chun zani hmasaa inthawk khan Dr Arke, Medical Supdt., District Hospital kuta inthawk Medical Superintendent, District Hospital lain a chel tan. Dr Songggoukham chun, hi sin chel thei dinga ditsaktu hai chunga lawmthu hrilin CCPur District a Hill Medical College
hawng dinga hmalak a ni chu lawmum a ti thu a hril bawk. Hospital thienghlimna dinga Doctors 58 le Nurses 25 hai leh hma an lak tlang ding thu a hril. District Hospital-a Ward tum tuma in-charge hai leh inthruol taka thawtlang a, hospital thatlemna dinga hma an lak ding thu a hril bawk. District Hospital a chun tuhin CT Scan machine, XRay, OT le Blood Bank hai tha taka function an ni thu a hril bawk. Zanikhan District Hospital Revenue a inthawk Hospital chun Electric bill Rs. 24 lakh le tui fee Rs. 1 lakh a bat khawm pek fai a nita thu Medical Supdt. thar chun a hril.

Parade Commander dingin E. Fimate, SDPO
CCPUR: January 26, 2015 nia Public Ground, CCPur hmuna District Level Republic Day lawmna hunah Parade Commander in Emmanuel Infimate, MPS, SDPO, CCPur ning a tih. Ama inrawinain Jan. 23 7 24, 2015 zingkar 7:00 AM haiah final rehearsal nei ning a tih. Parade-a hin School Contingents 30 thang an ta, NYK/CCPur a inthawk Youth Club 2, Police Dept. a inthawk Contingent 5, Exservicemen contingent 1 el Band party in STC/BSF hai thang an tih.

Ui se case thar a la um pei: damdawi inkap an la tam zing
CCPUR: Ui se inlar le inzawma District thuneitu han hma nasa taka an lak hnung khawmin Churachandpur District a chun Ui se case thar an la um zing. District Hospital new building a chun Ui se inkap an la tam zing leiin zani zantieng `12:30PM khan damdawi um po hmang zo a ni leiin Medical Dept. staff hai damdawi lain Imphal-ah an fe. Zanita damdawi hmangzo a ni le inzawmin a zinga inkap ding hai registration thaw a nih. S. Khaikhanpau Ngaihte, MCS, BO Hq., DC Office chun zanikhan Ui se kapna hi a hmuna a hang en fel. Zani chena report dungzuiin Medical department chun Ui se mi 121 hai a thlawnin damdawi kap an ni a, hi laia 19 case thar le 1 chu mengte se a nih. Vety. Dept. chun Ui 56 le Mobile team han Ui 85 Ui invet dangna damdawi an kap. Ui se case thar a la um zing nasan chu, thlung ngai lo Ui thenkhat thlung an hang ni hin an nghawk leia an lo intal dawk leia mi an lo va se nawk hlak niin department thusuok chun a hril. Ui se inlar le inzawm hin Manipur Chief Secretary Pu P.C. Lawmkunga chun Ui vaitu hai chu mani Ui hai insuo zalen loa tlung seng dinga thusuok a siem dungzui le District Administration/DC CCPur Lunminthang Haokip, IAS chun Ui se case thar a la umzing le inzawmin Ui vaitu hai chu an Ui hai thirkhaidiet (chain) a thlung seng ding dingin zanikhan thupek an suo thar nawk. Kangpokpi, Sadar Hillsa Sub-Divn. Vety Hospital- a khawm zanita inthawk khan Ui invet dangna damdawi kap tan a ni a, zanikhan Ui 130 chuong anti-rabbies damdawi kap an nih. (with inputs from UNA)

Life Cafe vawisun hawng ding
CCPUR: Rengkai Road, Saia Hai Dawr tuolah vawisun 1:00PM hin For One Life ministries hmalaknaa indin ‘Life Cafe’ hawng ning a tih. Customer hmasatak 50 hai kuomah a thlawnin TShirt pek ning an tih.

Jr. Grade MCS 8 Sr. Grade-ah
IMPHAL: Junior MCS (Junior Grade) Officer 8 hai chu Junior MCS (Senior Grade) a inkaisangtir an nih. An Pay scale khawm (PB-2) Rs. 9,300- 34,800+ GP of Rs. 5,500pm ning a tih. Junior MCS (Junior Grade) Officers Junior MCS (Senior Grade) Officer a inkaisangtir hai chu, Ms Lalrawngbawl Hmar, APO, DIPR; Tongminlian Haokip, SDC/ Revenue; Th. Samo Singh, APO/DIPR; A. Biren Singh, BDO/RD; N. Brajamohan Singh, BDO/RD ≺ Kh. Chaoba Singh, PO(MC)/RD & PR, M.K. Dharma, DIO, DIPR le Ch. Ningthemjao, DIO/ DIPR hai an nih.

Editorial
Make in North East

Prime Minister Narendra Modi in ringna, ngairuotna le ngaidan kawngah ‘Make in India” nei dinga a lo puonglang angin Dr Jitendra Singh, Union Minister of state (Independent Charge) of the Ministry of Development of North Eastern Region (DoNER), MoS PMO, Personnel, Public Grievances and Pensions, Atomic Energy and Space chun “Make In North East” chu nei dingin zani hmasa khan a puong a. Hi thupui hmanga thil thaw ding chi tum tum hrillanga um hai hi a tha a lawm a um a, a takin hung puitling sienla nuom a um takzet. “Make In North East” thiltum hi a pawimaw a, NE biel mipuihai mamaw a thangkim vawng niin an lang. A thu chauva hril ni lovin a tak taka thaw le sukpuitling hi ei ram sawrkar ngaipawimaw le thaw dan hung ni ngei sienla nuom a um.

“Make in North East” thupui hmanga thaw dinghai laim hin Comprehensive tourism plan, NE biela ding Brand Ambassador ruot, tea processing, organic farming, food processing, wind mills hmanga wind power siem, film shooting le NE biela vuongna tamlem in service tir ding, NE biel sates 8 haiah industries tam lem indin, hi thil hi sum hmusuokna ding chau ni lovin NE thalai han an duthusam le mamaw zat sin an hmu theina ding, AYUSH sukhmasawn ding, SPAs etc hai indin ding tihai a thang. Thaw dinga tihai hi an tha a, NE biel mipuihai mamaw em em el an nih. Amiruokchu, hieng thilhai po po a tak taka thaw le sukpuitlingna ding chun takchapa tia kampet meua sawrkar thlungpui, NE biela states 8 haia state sawrkarhai le a biel mipui hai ei thangtlang a tul ding a nih. Sawrkar schemes le projects indin chi tum tum hai hi ei ram ta dinga tha an nih. Sawrkar policy le schemes chi tum tum hai khawm hi a tha naw a um nawh. Sawrkarin schemes, projects, programmes le policies chi tum tum an duonghai, mipui hriet dingin a hung puonglang pha hin mipui chu ei hlimin ei lawm ngei hlak. Amiruokchu, hun a hung fe pei a, a taka hmu ding a um naw pha pha leh mipui hlimna le lawmna hai chu umzie bo a hung ni hlak.

India hmarsak biela states 8 hai hi Tourism Industry thawna dinga tha hlie hlie an nih. Khuolzinmihai hiptu ding thil chi tum tum tam tak a um. Amiruokchu, helpawlhai hratna NE biel sunga state thenkhat haia hin chu Tourism industries chu a hlawtling tak tak ring a um nawh. Tulai tak hin Assam le Manipur hai lem chu ram nelumlo an nih ti inla ei hril suol ring a um nawh. Nitinin inthatna, inthuoihmangna, invauna, tharum hmangna sum inlakpekna, bomb va deng puokna, gate a bomb khai le a dang dang a tlung zing a, ram nelum chu ei ni nawh. Ram nelum loah tourist-hai an inzin nuom ngai nawh. Manipur a hung inzin foreigners hai khawm hi Manipur hung hmu chaka hung an ni ring a um nawh. Sin tul le pawimaw thaw ding an nei leia hung inzin hlak an ni ring a um.

India hmarsak biel huop sung Sikkim a chun helpawl an um naw a, ram ralmuong le ram nelum a ni leiin kumtluonin foreign tourist a sipin an sip el a nih. Hi state a hin chu tourism industry chu a hlawtling hle a nih. Make in North East hi a tha. Amiruokchu, a tha lem le hlawtling lema thil a fe theina dingin Dr Jitendra Singh hin NE biela states 8 haia mithiem le mi inrilhai inrawnpui hmasain thil thaw sienla thiltha lem a ni ngei ring a um. NE biel mihai hi culture, tradition, sakhuo le tawng dang dang nei seng an ni leiin NE biela hmasawnna hrat taka a fe theina ding chun a ram sunga mithiemhai rawn ngei ngei a, an dit dan le ngaidan hai lak ve chu thil awm a nih.

NE biel hmasawn le inthanglienna ding chun electric, lamlien tha, leilak tha, rel lampui, vuongna service, a bikin Helicopter service tam lem infetir hai hi a pawimaw zuol an nih. Hieng thil hai hi NE biela hnienghnar taka ei nei an ninaw chun hmasawnna le inthanglien tak takna chu thil um thei ni ngainaw nih. Electric power le infepawna lampui tha hi NE biel ta dinga hmasawnna lampui an nih.


Post a Comment

Powered by Blogger.