Responsive Ad Slot

Hmasawnna Thar | Jan 21, 2015

Thursday, January 22, 2015

/ Published by VIRTHLI
Ui se damdawi inkap nuom mi an pung pei
CCPUR: Churachandpur district a chun tulaia Ui se inlar leiin District Hospitala Casualty Dog Cell-ah Ui se leia damdawi inkap nuom mi an tam thei hle. Zani hmasa chen khan dose 1120 kap zo a nita a, zanikhan dose 500 la dingin Medical Department Imphal-ah an fe a, Dog bite cell-a damdawi inkap nuom hi nitinin an puong pei a, hi lei hin District Hospital New building tieng insawn hiel a nih. Medical Department chun Ui se mi 163 a thlawnin damdawi an kap ta a, hienghai laia 9 hai chu Ui in a se thar an nih. Veterinary Department, CCPur chun Ui 356 damdawi ankap tah (Vety 64, Singngat 233, Muallum 49 & Zezaw 10)

Final Photo Electoral Rolls
CCPUR: Manipur Assembly Constituencies 60 haia Final Electoral Roll insuoa um enfel nuom mimal le Political Parties hai ta dingin EROs/AEROs Office haia hmu thei ning a tih. Final Photo Electoral Roll hi recognised National le State Political parties hai ta dingin printed hard copy/ PS CD-ROM PDF version copy khat pei a thlawna hmu thei ning a ta, CEO Office, Imphal-ah lak thei ning a tih. A dit belsa hai chun Rs. 2/- per full printed page le Rs 1/- per half printed page a inchawk thei ni bawk a tih. Chun website: www.ceomanipur.nic. in le ECI website: www.eci.gov. in a khawm a nuom taphawt en thei dinga sie a nih.

Auto Headlight nal dum lakdawk thei ta ding
CCPUR: Kum 2014 a SP, CCPur thupek dungzuia Traffic Police han Diesel Auto hai headlight a chungtieng iemanichen rawng an nal dum pek na thuah CCPur District Diesel Auto Assn. han SDPO/CCPur le OC/Traffic hai kuoma complain an pek dungzuiin, Diesel Auto hai headlight
rawng dum nala um chu ladawk thei dingin phalna a pek. Hi lei hin Jan. 21, 2015 a inthawk chun Diesel Auto han an Auto headlight chita rawng naldum hai ladawk thei tang an tih tiin Diesel Auto Assn. chun inhriettirna an siem.

Manmasi Suopui Inkhawmpui Tripura-ah
DHALAI: Tripura Hmar Welfare Society le Janthum Rural Development Society hai thangruola huoihawtnain January 21-22, 2015 inkar sung hin Janthum Bawng Colony, Dhalai District, Tripura hmuna Manmasi Suopui Inkhawmpui um a tih. A ni khat ni Jan. 21, 2015, 6:00PM in Public meeting um a ta, hi huna hin Rev. T. Lawmthang, President; Pranab Halam, Secretary, RDS Janthum, Lalchungnunga Pulamte, Jampui Tlang han thuhrilna nei an ta, Esther Vanrengpui, TCS, Mercy Sellate, Coordinator, NYK, Bonin Thirtlu, President Halam YA hai greetings hun hmang ning a tih. Jan. 22, 2015, 7AM - 10:30AM inkar Business Session um a ta, 12:00Noon a inthawk Cultural programme hmang ning a ta, HSA representative, JL Sawmi, President HWA, Lalhmingthang, Commandant han thuhrilna nei an ta, Cultural dance inentirna Jampui Tlang, Manipur/ Assam le Tripura Halam han nei an tih. Jan. 22, 2015 zan 5:00PM a inthawk Public meeting um nawk a ta, L. Keivom, IFS (Retd), Dr John Pulamte, President, Hmar Inpui, Lalfaktlinga Hrangchal, TCS, Laldawnlien Varte, President, HYA GHQ han thuhrilna nei an tih. Programme hmang sung hin hlasakthiem tum tum han hla sak bawk an tih.

Zomi Namni
CCPUR: Zomi Nam Nicum- Mithun Festival le inzawmin zanikhan Organising Committee, Open Football Tournament 20-15 chun CDSA Office-ah Manager hail eh joint meeting an nei. Football tournament rules & regulation chunghu an hriltlang a. Yellow card hmu han Rs. 200 an fine ding le Red Card hmu han Rs. 500 an fine ding. Champion team in Rs. 1 lakh+ Siel, Runners up in Rs. 50,000+ Siel le Semifinals losers han Rs. 20,000 ve ve an dawng ding. Top scorer, Safe Hand le Man of the Tournament han Rs. 3,000 seng dawng an ta, Quarter final a inthawk Hero of the Match han Rs. 1,000 pei lawmman dawng an tih. Zanikhan fixture draw nghal a nih.

Admission Drive thuah meeting an nei
CCPUR: Mr Lalsanglien, ZEO/CCPur le Pumsong Hangshing, DI of School/ Thanlon hai inrawinain zani 12:00noon khan Thanlon Block hnuoia Headmasters han Academic Session 2015 Admission drive thuah meeting an nei a, Schools 39 um haia Headmasters 24 an thang. Hi huna hin Headmaster han Admission drive thuah activities report an pek a. January 2015 sung admission drive thawng an ta, Feb. 12, 2015 in review meeting nei nawk an tih. Thanlon biel sunga admission drive hi bieltu MLA le ZEO hrietpuinaa thaw ding a ni leiin mipui hai lo hriethiem dingin an ngen.


Editorial
Mipui le ram himna

Sawrkar tin elin an khuo le tui hai venghimna dingin theitawp suoin hma an lak seng. Amiruokchu, himna tak tak chu a um thei ta meu naw niin an lang. Kum thar ei hmang tan mek sunga Mizoram state a thi dan mak le danglam tak tak tlung hai hin mitin lungril a barakhai hle ring a um. Venghimtu ding sipai le Police an nei naw leia Mizoram mi, mak tak tak le nunrawng taka that an ni nawh. Venghimtu sipai le Police chu an hau ve tawk. Amiruokchu, suolnain ei rama bu a khuor hne ta leiin venghimtu dinga ruota um han an mi venghim zo hne tanaw a ni el thei. India ram pumpuia state ralmuong taka ngai le Peace bonus chen hmu phak state hman a ralmuong zo tanaw chun state dang haia lem chu mipui an him naw bik zuol ring a um.

Khawvel sawrkar ropui taka ngai, venghimna tiengpang khawm uluk em em el USA meu khawmin thil suol thaw tum ngar ngarhai chu a dang thei bik nawh ti 9/11 a inthawk khanhriet theiin a um. Hi le inruolin venghimna tieng a uluk lei khun thil tha lo tam tak a pumpel thei hlak ti hriet theiin a um. Ram le mipui himna dinga sum le pai, tha le zung seng nasa hle leia sietna nasa lem, harsatna le buoina lien lem a pumpel ning a tih ti khawm ring thei a ni bawk.

Ram ropui hai leh chun inkhaikhin ruol chu ninawng ei ta, chu le inruolin ei chunga thil tha lo hungtlung thenkhat hi chu ei inthlada le ngaisam lei an ni thei a, a ni bawk hlak. Khawvel um sung hin chu indo, inthat, insuom, inrukhmang, invau le thawluina hmangna pawisa inlakpekna etc hai hi thil tlung ding hrim a ni a, nisienlakhawm chuongang thil haia chun iengang ngirhmuna um am ei ni a ti hi ei insut rawp pawimaw hleng a tih. Hril le hril nawk hlak, National Boundary neka International boundary nei sei lem ei ni a, suolna chitinin a mi paltlangin a mi lutchil a, ei ram hi suol thaw nuom hai ta dingin an hmunpui an chang ta a nih. Ram le mipui himna ngaituona kawngah tuta neka nasa lema thang ei lak a, riruongna thar ei siem a, ei inhuonbit a tul hle a nih. Sawrkar umna san chu ram le mipui himna ngaituo a ni a, tuta ei ngirhmuna hin chu ngaipawimaw a hlaw rak naw mani ding aw ti dingin ei ramri hi ei veng naw niin an lang. Ei ramri hrul venghimna dingin thaw ding ei hau hle.

Mipui le ram chau a himnaw a ninaw a, mipui hringna le an thil neihai a him naw a. Ti, thlapang le inlau dawr dawrin ei um tawl a nih. Ei state sawrkarin tuta neka mipui le an thil neihai bakah ei ram hi a venghim dinga hma a lak nuom a um. Venghimna sin thawtu dingin state forces a lak belsa a, hienghai hi siena ding tia a hrillangna haiah a sie a, Police station le Police Outpost tam lem a tul. Tlangram biel hai ei en a, sawrkar le venghimtu um lo ang ela um an nih.

Ram le mipui state sawrkarin a venghim a tul laizing hin mani le mani inthatna ei la bansan thei naw hi a pawi a nih. Mani le mani inthat hnam ei ni sung hin chu hmasawnna ei ti hi nei tak tak ngai nawng ei tih. Mani le mani inthat hnam le ram, hnam changkang le ram hmasawn an um ngai nawh. Pawl tum tuma thuoituhai khawmin mani le mani inthat hi thaw ta lova bansan hmak a ni lem theina dinga hma an lak a tul. Inthat hi chu suonmawng rorel dan a nih ti inla ei hril suol taluo ring a um nawh.


Don't Miss
© all rights reserved
made with by Simon L Infimate