New Delhi, Jan 7,2015: Silai hmanga tharum thawna tuoktuhai ta dinga hmalatu Manipur mi Binalakshmi Nepram chu Forbes magazine-in kum 2015 a inthawka “Minds That Matter” list a buotsai a chun a thang.

Binalakshmi Nepram hi tlawmngai pawl, Manipur Women Gun Survivors Network, CAFI le North East India Women Initiative for Peace indintu a ni a, Manipur nuhmeihai ngirhmun siemthatna dinga theitawp suoa thawtu a nih.


Forbes India Magazine in January 9, 2015 issue a suksuok ah Nepram chu India ram danglamna dinga suoltu a nih tiin a tarlanga, hmarsak miha'n chi inthlierna tienga suknawmnat an tuorna dodaltu le hmarsak mihai dikna chanvo suoltu a nih a tih.

Kum 2014 khan Nepram le hmarsak mihai chun New Delhi hmuna hmarsak mihai thlier hranna ditnaw leia lungawi nawna inlangtir tum iemanizat zet nuorna an lo huoihawt ta a, hmarsak mihai hmina chungchang ngaituo dinga din,  Bezbaruah Committee indin a ni thei nan mi pawimaw tak pakhat a nih.

Binalakshmi Nepram hi Forbes List a hmarsak mi inlang um sun a nih.

Nepram hin a kutsuok lekhabu pathum a suksuok tah a, kum 2003 khan Manipur nuhmei hai tharum hmanga tuortu hai ta dingin nasa takin a lo bei ta bawk a nih. United Nations hnuoia nuhmeihai ngirhmun chawisangna dinga inkhawmna ṭum iemanizat India aiin a lo thang ta hlak bawk a nih.

Binalakshmi Nepram hin Dalai Lama Foundation’s chawimawina a dawng ta bakah WISCOMP Scholar of Peace Award, Sean MacBride Peace Prize le CNN IBN Real Heroes Award hai lo dawng tah a nih. Kum 2013 khan London-a pawl pakhat, Action on Armed Violence chun “100 most influential People in the World working on armed violence reduction” ah a lothang ta bawk a nih.

Post a Comment

Powered by Blogger.