BJP President in Tlangmi hai harsatna Centre an tlun nuom nawh: T. Hangkhanpau

CCpur, September 28, 2014 (HT): Mr T. Hangkhanpau, BJP Member chun zani zantieng khan PTC Office, Hiangtam Lamka-ah tuolsung chanchinbu reporter hai an hmupui. Hi huna hin Manipur State BJP President Th. Chaoba in January 11, 2014 a Vice President dinga appointment a pek dungzuia BJP a lut a ni thu a hril a, January 11, 2014 a inthawk tuchena hin ama (Th. Chaoba) leadership hnuoia appointment pek mi 3 han inbanna an pek ta a, ama ngei khawmin April, 2014 khan BP Acharya kuoma BJP Vice Pesident a ninaa inthawk an banna a pek ta thu a hril a, sienkhawm BJP-a a la umzing thu a hril.Lok Sabha (MP) election ding laia Manipur BJP in an manifesto-a an inthang tlangmi hai ta dinga hamthatna ding thil hai chu Th. Chaoba hin Central sawrkar kuoma intlun nuom naw a nih tiin an tum. Kum 2015 khin Manipur a BJP President election a hung um ding a ni a, BJP President ni thei ding hin kum 6 sung (continuous) active member le kum 75 chung tieng ni lo ni a tul a, Dessident group a mi hai lai ti lovah Th. Chaoba leadership hnuoia mi hai lai BJP President dinga qualify pakhat khawm an um nawh. Dessident Group hai laia khawm Dr Borobabu (Manipur Speaker hlui) chu mi titak, sum le paia ringum a ni leiin ama neka tlin le tlak ding an um nawh. Dr Borobabu hi thlangtling ani chun Manipur tlangmi hai harsatna le hamthatna ding thil hai Central Government kuoma intlun ngamtu ding a nih tiin a hril. Dr Borobabu Manipur BJP President dinga thlangtling a ni theina dingin mipui, NGOs, hnam thuoitu le social leaders hai an pawimaw tiin a hril.

T. Hangkhanpau hi BJP Manifesto-a tlangmi hai hamthatna ding thil Th. Chaoba in Centre-a an tlun nuomnaw le ngaisak nawh tia intuma, Th. Chaoba hnuoia BJP Vice President a inthawk in ban nia hril a nih.

HSA Platinum le inzawma mipui kuoma ngenna le inhriettirna

MIPUI KUOMA NGENNA LE INHRIETTIRNA
Thlaram (September) 25, 2014

Hmar Students’ Association-in kum 75 hmel a hmuna (Platinum Jubilee) lawmna hunser chu HSA Unit, Branch le Joint Headquarters tum tumhaiin anni puolin an hmang mek a. General Headquarters hnuoia Platinum Jubilee Celebration Committee hmalakna hnuoiah program chi tum tumhai huoihawt a ni bawk. Tu tak khawm hin Platinum Star Hunt le Football (selection stage) chu nei lai nei mek a nih. Prokram chi tum tum huoihawtna ding hin pawisa sum tamtak a ngai ding a nih ti hrelawkin HSA Gen. Hqrs chun Hmar Intin (every household)-ah Cheng (Rupees) 100/- (za khat) dawl phalna August 26, 2013 khan Hmar Inpui (GHQ)- ah ngenna siem a ni a; chu ngenna chu Inpui khawmin lawm takin a mi pawmpek a nih.

Chuong sa khawm chun PJCC chun Hmar intina pawisa sum hang dawl chu inphalam um a la ti tho leiin Jubilee Lottery in tinah phek 2 (Rs. 100/- man) pei sem a rawt tah a nih. Chu umzie chu In (household) or sungkuo (family) pakhatin a sumfai tawp in HSA hi a thangpui tina a ni ta naw ding a nih. Chuonglaizing chun, ngamzawng le hnam ta dinga mi inphal filawra hriethai kuomah lem chu inphalam lo takin Za Khat man chauh ni lovin a sangtel man khawm mi chang pek dingin pek lem chu tum zing tho a nih. Hi ngenna le hmalakna hi mi hrethiempuia mitinin mi lo \\thangpui seng dingin Jubillee Celebration Committee-a Finance department aiin ngenna hi kan hung siem a nih.

Camp: Churachandpur
September 25, 2014

(Robert Joute)
Finance Secretary

(Jeffrey Saihmang)
Treasurer

Platinum Jubilee Celebration Committee (PJCC)

L.T. Hrangchal in DIG(SR)

Aizawl, September 28, 2014 (HT): Pu L.T. Hrangchal, IPS chun zani hmasaa inthawk khan Deputy Inspector General of Police, Southern Range, Mizoram Lunglei sin an zawm \an. L.T. Hrangchal hi Senior Police Officer, 1982 a Mizoram Police Service zawm, 1999 a Indian Police Service (AGMUT) a hlangkai a ni a, SP Aizawl khawm lo chel tah Delhi Police-ah 2012-2014 um a nih. PM in-charge in Rajnath Singh

HMANGAINA CHULLO – Endless Love (Naute nghillo na’n)

~H Rama Ralsun

“Love is like a wind; you cannot touch it, but you can feel it” – Author

Thlaram thlâ, Thlalir zân a nih a. Vân khawm anthieng ṭha in thangvân zâwl dum pâwl riei kâra Siâr ruolin an êngmâwi lungruol taka an insuo hai khawm chu fie taka hmu theiin anlang a. Mâkhât chau tê chun kan Rûn sîr compound lâi chun kan vâk kuol vêl a. Sawrthla êng inno tak chun ka sîr le vêla thil um hai chu fie takin a suklang a. Virthli damtê te a hung hrâng vêl hai chun kan in bula thing hna hai chu a mût hnîng suou suou bawk a. Lungril ngaituona invâk vêl chun thil ramtin ramtang a sûngtuo naw thei nawh. Tleirâwlte kan ni lâia Lalbieklien a hlasak, “Neisun hmangaina kan hlân ngam nawh, Hope mitmeng um si lo; Mi hai pawm lâi D lo ning I ta a pawi âwm ngei, Tlâng rêl dâwn naw ning I hmangaina ka chang phawt chun.” ti hla saka lungruol taka guiter pera lenruol kimte a Sawrthla êng kan inâwi lâi hun dam tê chu ngaituona ah a hung thar rum rum a.

Sienkhawm, lenruol hai le nunhlui ngâi leia lung inlêng kan nawh, ka hmangai ka D’te ngâia lunglêng ka nih. Sawrthla êng mâwitak khawm ka ta ding chun Sawrlothlapui an chang zo tah. “Leng dang hai chu kawpte’n an D hai leh sawrthla êng hnuoiah hlimin leng an ta; kei ruok chu riekmâw vâ ienga kâina rûn invâi maw ka chan tâwka khuo’n a rêl! Lungrûka kimtê’n ka dâwnin, lung a kim thei nawh, hril ka hai ngei anrieng chan hih!” ti hai dâm ka sûngtuo in Lâikhum bêl zâi rêng khawm ka rêl thei nawh. Fûr ruotui tlâk lâi ang elin ka mita luoithli hai khawm chun kieng zâi an rêl thei nawh. Aw, Virthli hung hrâng vêl hai hi palâi bâwngte a hmang thei ni hai sien, ka lunglêng thu hi zâitin remin inzâwt khum ngei ka tih. “Thangvân sâng khi ka hang thlîra, Siâr indi’n an lêng hmun; Pielleia lengdang indi le, Hlimte’n hmangai pâr an tlân. Kei ruok chun ka thlîr vêla, I sakhmêl hrim ka tawng naw ie; Lunglêm hrim ka nei thei nawh, Lungrûnpui I ṭhang naw chun.” tia fam pûrdo nisi loa damlâi pûr doa damlâini hmang hi maw ka chan tâwka Khuo’n a lo rêl chuh!

Ka hmangai chu Ṭhûva anga nun innêm, luong hung inder suok thar hlawk anga inno le ngâino bei zet el hi a nih a. A mitmeng a fie in a fel ṭha hle a. A biengki sen tâwt le annui changa a bieng inkhur sak hlak hai chu lungngâi beidawnga inrûm hai ta ding khawma lâwmna intluntu ni thei hiel dingin ka ring hlak. A sakhmêl, a hâwiher, a piengzie le khawsak en chun tû pa lung dum naw thei ding hi an nawh. A Sakhmêl ka hmu nia inthawkin tu mi hrietpui lo hin keima tâwka chu ka nuna hin thu a hril chieng hle. Vâl hi dawl zawrin ka zawr ani deu tak! Ka khawsak dân a danglam a; ka chêt dân le hun hmang dân hai chieng taka mi lo entu ta ding chun ka danglamna hi inhmai ruol ani ka ring nawh. Ka lungphu inphu dat dat le ka sûngrila ngaituona thazâm mi petu hai hi ka hmangai zie mi hril chiengtu an ni hlak. Hieng ang rênga ka nun sukbuoitu le ka ngaituona fa râl thei hi hring khawvêla hin ka la tawng ngai nawh a, tawng nâwk ding hin kan ringin ka suongtuo phal bawk nawh. Ka nuna danglamna le mi sukbuoitu hai hi ama kan vawi zie sukchiengtu an nih a; buoia khawm kan ngâi phal nawh, ka hmangaina sukchiengtu an ni tlat leiin. Ama ngaituona leia ka sungril inlap hlak le meichawk ang hiela mi hlieutu um hlak hai hi hmangaina tuipuia ka tlâk lût zie sukchiengtu an ni hlak. Ieng am hril chuong ka ta, ka hmangai tlat sih a! Zâna ka inin zân Lalnu a ni hlak, tawnmang rama bêk chu hlimte’n aw tí’n dit ka thlang thei chuong nawh, a rorêltu ka ni si nawh. A sakhmêl ka tawng nia inthawk hun tin, darkar tin, minute tin le second tin hin ka ngaituona hluotu a ni hlak. A mi chawkbuoitu an nawh, ka ngaituona a luong liem; keima a hmun insâng changtu le ka khawvêl ani tlat annawm! Ieng am hril chuong ka ta, ka hmang tlat annawm!

Kha zân, zân thlavâium, lungngâina tinrêngin a tuom vêl kâra I kut chel puma, “Naute, ka ngai che, ka bula um zing rawh aw?” ti a beiseina mit kan lêng vêl kha I la hriet zing ka ring. I sakhmêl ka enin lunginsietna mitmeng ka hmu thei a. I lungrûk hluo zingtu ni naw lang khawm, sîra mi hnâwla min nghil bîk chu I zuom nawh ti ka sie le ṭha hrietna hin chieng takin a mi hril hriet veh a. Zân a hung sâwt a, ka kuom tieng hung ngha a duot taka I mi kuo lâi tê kha mâw Tâwi; ka damlâini a thlâk hma chu innghil di’n kan ring nawh. Tu dang ngâi loa I ṭângnêma inbei puma ka ngâi zie che le hi khawvêla hin nang chau naw chu hmangai dang ka nei naw thu ka hril hai che kha I la hriet zing ka ring. Hmangai tak hai bula um inhawi zie a min hrietchieng tira, ka lungril hi lâwmna in a sip naw thei nawh. Tu dang ngâi loa induthâw taka ei infâwp vawng vawng lâi kha ka ngaituo in, lungriemin a mi thlâk naw thei ngai nawh. Ka hmangai le ka lâwmna sukkimtu I ni tlat annawm! Khâng ang hun rângkachak le hun hlu kha hring khawvêla hin a taka tawng di’n kan ring sie nawh. Thei nisien hun hi chel ngîr ka ta, tawngmang ramah ka damsûng hun hmang ral hiel ka tih.

Kan ruolpa pakhatin, “Ka tawntir hmangai (First Love) ka tawng huna chun kut le ke, vawi le chang kim ka lo ni dêr tah. Chuleiin, Mizoram hai hlasak ‘I pian hun a tlâi kei ka hma sih a, lênlâi a ruallo hi a pawi ber mai’ ti hi ka dit bêk bêk hlak a nih” a tih a. A hun lâi chun fiemthu angin kan lâk pêkin nuizat siemna dâmin kan hmang hlak. A khawvêl hervirtu le thuneitu in ni nghal lo chun, hun inher vêl le a sûnga ei hun hmang mêk le tawng hai chungah khawm thu ei lo nei naw zie chu chieng takin ka hriet tah. Kan ruolpa thil hril khawm hi nuizat um ang deuin inlang sien khawm, indikna khat tak um thei dingin ka ring hiel an tah. Ei hmangai tak ei tawng hun ding ei hriet naw ang tlukin, ei hmangai takin a mi hnâwl theia a mi hmangaitu hai ei hmangai lêt ve naw thei bawk. Khawvêl ani tlat annawm!

Ka lungvar le ngaituona po po ka dêng khâwm a, thuthlûkna ropui ka siem thei nawh. Hring khawvêla damlâi pûr doa hringnun hmang ral el ding chun kan zuom sie nawh. Ka hringna ve hi Khuo’n a ruot hun chen chel ngîr ding khawma ka hrâtna hin a tlin kan ring thei nawh. Ka ngaituo ka ngaituoh a, Hi khawvêla ka um zing khawm hi hlâwkna le hmabâk neiin kan hriet chuong bawk nawh. Thlungna hruolin ka rîng a vêt a, ka thisen zung le zâm hai an kîng a, ka lungphu le so hai an theina um tanaw leia an sin an châwlsan a, ka thlarauin hi tisa ṭawphnawk hi piellei thuoriet hnuoia zâl dinga fam khawpui an lâwisan chen khawma hi hi kan nghatna le ka thupui ni zing a tih:

PHULO SAKHMELṬHA

1. Khuonu remruot hersuokin,

Tûrnipui kâwl sen ruoi hnuoiah;

Mûrvate iengin ka zuong suok a,

Beiseina ropui chelin!

Ami zalêng ruol lâi,

Dâk suokin ka lêng vêl a;

Aw, Ka tawng tah sakhmelṭha,

Lengtin khûmtu Ainawn.

2. Aw, I mâwi chuong ngei el ie,

Bahsam tlamâwi lêng hermawite;

Nang ngei hi mâw khuo ruot ṭha pârte,

Lung lâwm I sukkim ngei el.

3. Zalêng dang sîra hnâwlin,

Anrieng mi thlang la chu pârte;

I tâwna vâl anrieng lung lâwmin,

Zaitin remin lêng ka tih.

4. Khuo rêl tinkim ka dâwnin,

Hril a hai vâl rieng ka chan hi;

Zalêng tin kawpte’n hlima lêngin,

Hril hai maw anrieng chan tâwk!

5. Hnena hlado insam rêng,

Khuo’n a rêl naw mâw anrieng di’n;

Chawngmâwi in a D a ngâi ienga,

Inrieng mâw vâl chan tâwk chuh!

Guwahati:

26th September, 2014

NOTES:

As told by Buchangrum Hmar on the 4th day of August, 2014 11:59 PM.

Hi thusep hi ka dâr vawitieng nat lâi, ka changtienga ka type suok vawng a nih. – Author.

SDPO Thanlon P/S in HSA Platinum Star Hunt 1st Acoustic Guitar Round a hawng

-LRS Puruolte| Photo: Alan Famhoite & Chawnglienkung Sinate

Tuithaphai/CCPur: September 27, 2014 sun dar 1:00pm a inthawk zantieng dar 6:20pm chen khan Hmar Students’ Association (HSA) Platinum Star Hunt 1st Acoustic Guitar Round chu Pu HL Daka Memorial Hall, HSA Campus, Rengkai, Churachandpur, Manipur hmun ah nei a nih a. Hi hun hi Tv. Sangboi Gangte MPS, SDPO, Thanlon P/S chun Mombati meiser hmangin Balloon suk kawiin a hawng. Hi a hawng hun a thuhrilna a neina hun a chun hiengang hun buotsaia um hi lawmum le ropui a ti thu hai hrilin, HSA Platinum Start Hunt fe mek a inruolsiek dinghai po po chu a ditsakna insang tak an hlan. Hi hun a hin Tv. Emmanuel Infimate MPS, SDPO, CCPur P/S chun a hung uop bawk. Anni pahni le an rawihai chun mi 25 in hla an sak chen um ve in an uop a nih. Hi hun a hin Pu Ramhluolien Khawbung of Rengkai Kum 58 a upa, Nau 5 nei tah khawm a thang a, mipui a suk hlim hle. Chun, Nk. Lorinda Varte chu a sang kum 12 mi chauvin Guitar a per pek a, mipui lawm le en nuom a hlaw hle. Hi hun a Judges (endiktuhai) chu Pu Edward TC Hrangate, Pu James Songrolal Songate le Pi Lalparmawi @Parte hai an nih. 2nd Audition Round a fethleng, la ko phaklo hai chu Oct. 4, 2014 (Inrinni) sun dar 12:00 khin a hmun pangngai bawk a hin inruolsiekna hun, 2nd Acoustic Guitar Round nei ni nawk a tih. 1st Acoustic Guitar Round Result hi hun a hin puong nghal a nih a. Hi hun a ding hin Contestant mi 45 umin, mi 16 an fethleng a nih. Chuonghai chu hieng hai hi an nih. Sylvia Lalnimawi, Mary Remruotmawi, James Lalremruot Pulamte, Grace Puruolte, Michael Paugoulian, Lorinda Varte, Siemchunghnung, Teressa Sellate, Lalrindik, Lalrawngbawl Infimate, Deborah Lalnunmuong, Joslyn Infimate, Immanuel Infimate, Lalvarlawm, Mary Joy, Ramhluolien Khawbung hai hi an nih.

Hi hun hi Nk. Roslyn Buhril in hnesaw takin a kei thuoi a, a thu lam a fel chu hrillo, a hmel, a pieng a nal bawk leiin mipui mit a fu hle. HSA Platinum Star Hunt fe mek hi a puithu deu deu a, mi tam takin Social Networking Site fethlengin Video Upload an ngen a. Media tieng mawphurtu hai khawmin Recorded Video hi Local Channel a chau nilova Khawvel hmun tin a lo en thei ding a hma an lak mek thu an hril a, LIVE TELECAST khawm la thaw dingin hma an lak mek a. Hi thil thawna ding hin sum-le-pai le thil mamaw tam tak a la um lei le sengso a tam leiin Top 10 Round a inthawk naw chun thil hau in tak a ni leiin ngainatu mipui hai lo hriethiem hram hram dingin an ngen bawk.

HSA Executive Council Kona

Assembly Affairs
HMAR STUDENTS’ ASSOCIATION
(Regd. Nos. : Manipur – 820/67; Assam – 29/67; Mizoram – 6/88)
Head Office: HSA Campus, Rengkai, Churachandpur, Manipur

EXECUTIVE COUNCIL KONA
September 24, 2014

Hmar Students’ Association Central Executive Committee (CEC)a inthawka inhriettirna ( Ref.No.:HSA/GHQ/AGS/12-16/30-17, Dated 23rd July, 2014 ) hmu angin hung tlung ding October 6, 2014 (Thawtanni) zing dar 11:00 hin Clive Colony, Shillong hmuna 19th Executive Council ko a nih.

HSA Constitution Article 8 dungzuiin hi Council a hin Assembly Secretariat member-hai bakah GHQ OB, Secretaries le Joint Secretaries, CEC Member le Adviser-hai, Joint Headquarters le Branch tina President le General Secretary annaw khawma an aiaw dinga an hung ruothai le Joint Headquarters le Branch tinin EC Member dinga an ruothai popo kimtaka thang dinga ngen le inhriettir ei nih.

Thulut nei ding hai chun a ni hma ngeia Assembly Speaker/Secretary kuoma annawleh hsaqhg@gmail.com ah inhriettir ding a nih. Tuta Council chu HSA Financial Rules 2012 kha ei hmang thei naw ding a nih.

HSA Assembly Secretariat aiin,

Sd/-
(Vanlallien Pulamte)
Secretary

Sakawrdai-ah saiip puon silin suol thupha chawina runpui nei

Sakawrdai, September 27,2014: Pathien rawngbawltu James Lalramliana Zote rawngbawlna fepeiin zani tarik 26.09.14 khan Sakawrdai (Mizoram)khelmuolah saiip puon silin mipuiin suol thupha chawina runpui an nei. Hi suol thupha chawina ṭawngṭai ruol hi Sakawrdai Kohhran Joint Committee huoihawt niin vawisun dar 3:30 vel khan khar a ni a, Sakawrdai mipui bakah a sevel khuohai a inthawkin mi ṭhahnem tak an ṭhang a nih. 

Ei thulakna in a hril danin Kohhran Joint Committee in suol thupha chawina nei dinga rem an ruot zinglai ṭhalai/naupang iemanizâtin suol thupha chawina nei dinga an ti ni a hma met (a zanah) zan khawvârin ṭawngṭai ruolna neiin Pathienin ṭawng hrietlo in an ṭawng tira. Chu chu mak an ti em leiin ṭhenkhatin zieksuokin thuhriltu James Lalramliana Zote in hmutirin amachun Pathien kuoma ânthawkin "Ka mihai chu lo suol tahin kawllkil tin lo tlung sienkhom an suolhai sima an kîr chun malsawm ka tih” ti thu dawngin suol thupha chawina hi nei a ni ta a nih. Maktak el in thuhriltu hin Hmar hnam ei inthuruol theinawna san chu Pathien pawi ei tawk lei a nih ti Pathienin an hriettir thu a hrila. Hmar hnamin Bible an raw le an rawzât (number) khawm hriet niin an hrila. Chun Pu. Ngurdinglien thatdân a ni hai le pathien mi a hringpuma phuma that a ni thu le thil dang dang a la hriet ngai ṭhaklo hai chu Patheinin an hriettir thu a hril bawk.

James Lalramliana Zote tuta Bawngkawn, Aizawl-a khawsa mekin a hril dan chun a naupang lai a inthawkin Pathien rawngbawl dinga kona a dawng hlaka, school a kai lai dam an hotuhai thuhril ngaisak hlei thei lovin Biekin le kawtthlera Pathienthu a hril lai dam a mittla in a hmu hlaka. Chu thil chun a nun a sukbuoi thei em em hlak. Sienkhawm Piengtharna diktak a nei el thei bîk nawa. A hung peingthar hlim khan Pathienin “I mihai lai rawngbawl rawh” tia anhriettir leiin Sakawrdai a hin September thlabul laia inthawk khan rawngbawlna hi a ṭan tah a nih. A rawngbawlna hi Pathienin mal a sawm em em a, mi tamtakin taksa le thlarua-ah damna an changpha a nih. Presbyterian le ICI kohran-ah samdamna camp khawm ama rawngbawlnain a sâwng sâwngin buotsai a ni ta bawk. James hin thlarau rawngbawlna chau nei loin taksa damna rawngbawlna (healing ministry) khawm a neia, mi tamtak natna khirkhan tak tak han ama inthawkin Pathien sukdamna an chang a. Thlarau damna le taksa damna tlakhla tuhai chun mani hming hrilin taksa damna chang thei zing a ni thu ei thulakna chun a hril.

Shillong HSA Platinum Jubilee & 57th Annual Meet 2014 (Pics)