Doctorate Degree inhlan

Chennai, June 30, 2014: Rev Van Lalnghakthang Khawbung S/o Pastor Laltlunglien of Parbung chun International Institute of Christian Management (IICM) hnuoiah Doctor of Philosophy (Missional Study) chu hlawtling takin a zo a June 28, 2014 khan Chennai hmuna IICM Convocation an nei a Doctorate degree inhlan a nih. A Doctoral thesis hi  ‘GOODNEWS TO THE POOR – The intrinsic call of the church with special references to Churches in Northeast India’ ti a nih. 

Ama hi inchukna ngaisang le ngai pawimaw em em el, Pastor sinthaw zing puma thei ang anga inchuk zawm zing a nih. Kha hma met khawm khan National Institute of Business Management (NIBM) hnuoia MBA 1st class (DE) ah zo phak ngat ani bawk. Ama hi tuhin RPCNEI ah Evangelist-at- Large sinthaw lai mek a nih.

Delhi-ah NE mi 6 hliem, 2 jail intangtir

New Delhi, June 29, 2014 (Tlangsam) : Zani zan khan New Delhi khawpuia Moti Bagh veng-ah India hmarsak mi nunghak le tlangval 15 hon vel hai chu In pakhat-ah an ‘party’ a, inrui buoiin an insuol a; an insuolnaa hin mi 6 an hliem a, Police-in mi 2 an man niin ei thu lakna chun a hril.

Hieng Northeast ṭhalai insuol buoi hin vengbuk-ah ri nasatak an siem leiin a veng mi hai chun Police hai an ko hiel a nih. An insukbuoinaa hin mi 6 an hliem a, mi 2 hai chu Police hai PVR Van-in damdawi In an panpui nghal a, an hliem na deu leiin ICU-ah enkol mek an nih.

Buoinaa ṭhang mi 2 chu Police haiin an man a, lock-up ah an intangtir bok a nih. Police chun buoina siemtu hai hi South Campus Police Station-ah FIR 262/14 ziek lutin thubuoi IPC 323/451/34 an siem khum bok a nih.

Police hai hrildan chun, hi buoinaa ṭhang nia hriet hai chu la man pei ning an tih, tiin an hril.

Mizoram CM in Rajnath Singh kuoma KNO le inbiekna sunzawm dingin a ngen

Delhi, June 29, 2014: Mizoram Chief Minister Lal Thanhawla chun June 28 khan Delhi hmuna Home Minister Rajnath Singh inhmupuina a nei a, hi huna hin Mizoram mamaw dang danghai a hril baka Manipur based Kuki National Organisation (KNO) hai chungchangah Lalthanhawla chun KNO hai chu independent suol an ni naw a, mani hnam chanvo nei thei dinga hmalak anni thu a hril a, KNO in Manipur sawrkar le Union Home Ministry le Suspension of Operation (SoO) an nei mek chu sunzawm nawka inbiekna neia KNO hai thil ngen hi chingfel dingin a ngen.

Hmasawnna Thar | June 29, 2014

Manipur CM O.Ibobi Singh in July 15-ah Manipur
Budget 2014-15 Inpuiah a phar ding
IMPHAL: Zanikhan Manipur Legislative Assembly Speaker Pu Th. Lokeshwar Singh inrawinain Manipur Assembly Secretariat-ah Manipur Assembly Business Advisory Board (BAC) members han meeting an nei a, Manipur Assembly Budget Session nei hun sung ding le thu rel dighai an sukfel. Hi dungzui hin Manipur Assembly Budget Session chu July 11-28, 2014 inkar sungin nei ning a ta, sittings vawi 12 um a tih. Manipur Chief Minister le Finance Minister ni bawk Pu O.Ibobi Singh chun July 15, 2014 khin Manipur Assembly- ah kum 2014-15 sunga Manipur Budget phar a tih. July 16, 2014 in Budget chungthuah members han General Discussion nei an ta, July 17, 2014 a inthawk session zo hmakhatin Department wise Discussion le demands chi tum tum pasi an tih. Tuta ṭum hi 10th Manipur Legislative Assembly Session a vawirietna ding a ni ding a nih.

HSA Platinum Jubilee hawngna le H.L. Daka Memorial Hall inhlanna nei
CCPUR: Zani 11:00AM khan HSA Gen. HQ. huoihawtnain H.L. Daka Memorial Hall, HSA Campus, Rengkai, CCPur-ah HSA Platinum Jubilee hawngna, H.L. Daka Memorial Hall inhlanna le HSA Platinum Essay, Drawing & Painting Competition nei a ni a, Pu P.K. Jha, IAS, Deputy Commissioner, CCPur khuollienin a ṭhang.

First Session-ah H.L. Daka Memorial Hall hawngna le Pathien kuoma ṭawngṭainaa inhlana chu Rev. H.P. Runremthang in a nei a, Rev. Samuel Khuma Joute in hun inhlan ṭawngṭaina a nei bakah Dr John H. Pulamte, President, Hmar Inpui & Hon. Chairman, PJCC chun keynote address a hril. Hi huna hin khuollien Pu P.K. Jha chun candle sit varin Platinum Jubilee le Literary Competition hawngna a nei. Pu P.K. Jha in thuhrilna a nei huna chun, student hai hmakhuo ngainaa ṭhuoitu hmasa han kum 1939 a Hmar Students’ Association (HSA) an lo indin le kum 75-na chen hmang thei dinga a umna thuah HSA ṭhuoituhai a lawmpui thu a hril. Inchuklaihai/ṭ halai hai chu thilṭha thaw dinga infuiin kum 10 liemta le tulai ei hun tawng mek nasa taka an thlakdanglam thu, hi lei hin ṭhalai hai chu khawvel inthlakdanglam ang peia ei umdan le nundan hai ei thlakdanglam a ṭul thu, HSA in Hmar community ta dinga thilṭha tam tak a lo thaw hai chu thaw zawm pei ding le hnam dang hai le inrem taka umtlang pei dingin student fekhawm hai an fui. DC, CCpur hi H.S.A. Platinum Jubilee Celebration Committee (PJCC) chun thilpek Par (dry flower), Khiengkawi mansa, Ngotekher Muffler, Memento le Parthi an inawrtir.

Dr John Pulamte chun, HSA phun a ni dan, kum 1939 a (L) Pu H.L. Daka rawia Ngurte khuoa HSA phun a ni thu le HSA hung inṭan dan le thil lo thaw hai a hrillang a. Student fekhawm hai chu Pathien a chunghnung taka sie a, hnam thil hrim hrim chu kohran neka ngaipawimaw hmasa dingin an fui. Hi hunser hmangna hi HYA, HWA, Hmar Inpui le Hnam sung a pawl tum tum ṭhuoitu hai, Sawrkar tienga Civil le Sipai Officer, H.S.A. Adviser le ṭhuoitu hlun tak tak hai bakah Student Organisation unau hnam dang dang a mi hai khawmin hi hun hi an hung tawiawm bawk. Second session a chun Essay, Drawing le Painting- Competition nei a nih. Competition hi Rengkai Govt. Hr. Sec. School-a nei a ni a, Essay-ah mi 245 an ṭhang a, Drawing & Painting-ah mi 8 an ṭhang.

LOCAL NEWS:
Axis Bank Show Cause notice pek ding
CCPUR: Zani 11:30AM khan Mr Maniram Sharma, IAS, Addl. DC, CCPur inrawinain BRGF Resource Centre, DC Office-ah Pre- PLP for the year 2014-15 for CCPur District (Bankers Meting) nei a nih. Hi huna hin CCPur District-a Bank Branch tum tum hai an ṭhang vawng. Mr Maniram Sharma chun, Bankers meeting hi thla 3 dan peia nei hlak a nih tiin a hril. Bank han mipui kuoma duthusamin loan an pek ṭha naw a. A bik takin Axis Bank chun thla 3 liemta sung March 31, 2014 chen khan Govt. le mimal a inthawk sum sielut (deposits) Rs. 24 crores chuong a ni a, hi taka inthawk Rs. 10 crores vel deuthaw Loan an pekdawk dinga ti a ni laiin Rs. 29 lakh vel chau an pekdawk a, hi hi 1% chau a nih tiin a hril. Hi lei hin Lead District Manager chun Axis Bank kuoma Show Cause Notice peng a ta, mipui kuoma loan a pek zat (Cash Deposit Ratio- CD Ratio) a pung chuongnaw chun mipui hamṭhatna ding iengkhawm thaw lova mipui sum fatu a ngai ning a ta, CCPur District- ah bank hawng thei ta lo dinga action lak ning a tih tiin a hril.

Scholarship Exam a um ding
CCPUR: Education (s), Govt. of Manipur huoihawtnain July 27, 2015 khin State Level Scholarship Competitive Examination 2013-14 um a tih. Scholarship Exam-a hin Class V le Class VIII passed ta chin hai ṭhang thei an tih. Hi thil le inzawma Application form chu July 1, 2013 a inthawk ZEO, CCPur Office- ah semdawk ṭan ning a tih. Form hi mimal kuta pekdawk ninaw nia Schoolwise- a sem ning a tih tiin ZEO Office thusuok chun a hril.

NLUP thuah Consultation meet
CCPUR: July 4, 2014, 11:00AM khin District Administration, CCPur huoihawtnain District Training Centre, Tuibuong-ah Stake Holders Consultation Meeting on New Land Use Policy (NLUP) um a tih. Hi huna SDOs hai bakah concerned Department, Philanthropic Organisation ṭhuoituhai, Lal (chiefs) hai le VA Chairman/ Secretary hai ṭhang an ta, J.C. Ramthanga, IAS resource person in ṭhang a tih.

J. Haokip in hrilfiena a siem
CCPUR: BJP, CCPur District, Hmarveng, Opposite Circuit Hose ti hi BJP, CCPur District in a hrietpui nawh. BJP State President Pu Th. Chaoba in BJP flag a keipharna hmun Distict Office, Tuibuong, Opposite Petrol Pump chau hi District BJP Office a nih. Hi thu hi mitinin hrie seng ei tiu. BJP mass enrolment khawm hi office chauva state BJP President in thaw dinga thu a pek a nih tiin zanikhan J. Haokip, General Secretary (Admns), BJP, CCPur chun hrilfiena a siem.

ADGP (AP& Trg) CCPur a hung
CCPUR: Mr P.M. Goud, IPS, ADGP (Armed Police & Training) chu zani 11:00AM khan CCPur-ah a hung a, Peace Ground Tuibuong-a Mela a en zovin Headquarters Veng-a 1st IRB Camp a sir bakah Khuga Dam a hang en a, hi hmuna sunbu a fak zo hnungin Imphal tieng a kir nawk. Mr Goud hi K.Kabib, IPS, SP, CCPur chun a fena haia a tawiawm.

AIR, CCPur stn. Prog.
CCPUR: Vawisuna AIR, CCPur station-a Paite programme a chun Lalboi Hartlang le Thangchinkhum & party han hla sak an tih. Hmar programme a chun Kailiensang Pakhuongte in hla sak a tih. Thadou programme a chun ECT Choir han hla sak an tih. June 30, 2014 a Paite programme a chun T.G. Lian Valte le Siamvenmung han hla sak an ta, Hmar programme-ah hla thlang ngaithlak thei le Thadou programme ah Melody Changsan le Limminlien Lhungdim han hla sak an tih.

IMPHAL NEWS:
Manipur Ministry sawidanglam dingin
IMPHAL: Congress MLAs tam lem han June 30, 2014 nia CM inhmupui dingin appointment an lak niin ei thu dawngna chun a hril. MSCP a MLA-hai ṭhangsain tuta Manipur a Congress sawrkar chun thlawptu MLAs 47 an nei a, hienghai laia MLAs 26 (MSCP MLA-hai ṭhangsain) Manipur a Congress Ministry sawidanglam dingin CM O.Ibobi Singh an ngen a nih.

Thoual Dist. ah hun tiemchin um lo bandh
IMPHAL: Thoubal District a JAC pahni han zani hmasaa inthawka Thoubal District-a hun tiemchin um lova Bandh an thaw chu an la sunzawm pei leiin Imphal-Moreh inkara inlawn motor an um nawh. Bandh thlawptu han Lilong le Thoubal Bazar haiah motor ke an raw a, an ban thaw hi a hrat hle leiin mihriem khawsakna a sukharsa pha hle. Lilong mi, nupui pakhat a thisaa hmu a ni bakah student pakhat Police han an vuok chu a hliem leia Hospital- a enkawl a la nizing dodalna, nupui thattuhai man dinga nawrnaa bandh hi an thaw a nih.

Children’s Cultural Meet
IMPHAL: Manipur Alliance for Child Rights (MCR), Imphal, CRY-Child Rights le You Kolkata hai huoihawtnain zanikhan Tribal Research Institute (TRI) Auditorium, Chingmeirong-ah 5th Edition of Manipur Children’s Cultural Meet, 2014 nei a ni a, Inner Lok Sabha MP Dr Thokchom Meinya Sing, Associate General Manager, CRY, Ashim Ghosh le Social Welfare Department, Govt. of Manipur a official-hai hi Meet a hin an ṭhang tawl.

Rail tunnel pakhat zo nawk
IMPHAL: June 27, 2014 zan khan Awangkhul khuo bul, Tamenglong District-ah Imphal-Tupul-Jiribam Rel lamuia Tunnel 18-na, metres 1367.5 a sei chu zo fel nawk a ni tah. June 26, 2014 zan khan tunnel 14-na, metres 730 a sei chu zo fel a lo ni ta bawk. Tunnels 34 um hai laia 7 hai chu zo a ni tah.

Maruti Gypsy le Car suksiet
IMPHAL: Thadou Students Association (TSA) chun zanikhan darkar 24 bandh an thaw a. Bandh thlawptu ni dinga ringhla han zani zantieng khan Pallel bul, Kotlianphai0ah Maruti Gypsy pakhat le Car pakhat an suksiet niin ei thu dawngna chun a hril.

NATIONAL NEWS:
CYMA in Minister ban dingin
AIZAWL: Democracy dan kalin a che tia intumin Central Young Mizo Association (CYMA) chun Minister of State for Veterinary and Sericulture, Dr B.D. Chakma chu Minister a ninaa inthawka ban dingin an phut niin Vanlalruata, General Secretary, CYMA, Central Committee chun a hril. Chakma Autonomous District Council hnuoia Boropansary-II a MDC byelection boycott-naah minister hi a ṭhang ve niin CYMA chun an intum a nih.

PM July 4 in J&K an zin ding
JAMMU: PM Narendra Modi chu July 4, 2014 khin Jammu & Kashmir ah inzin a ta, Km. 25 a sei Katra-Udhampur Rel lampui hawng a tih. PM hi Railway Minister Sadananda Gowda le Minister of State for PMO Jitender Singh han zui an ta, hi zo hin Srinagar pan a ta, Srinagar-ah Security Review meeting nei ning a tih. Hi meeting a hin J&K CM Omar Abdullah, GoC-in-C Northern Command, Lt. Gen. D.S. Hooda, 14th, 15th & 16th Corps hai ṭhang an tih. Raj Bhavan, Srinagar-ah sunbu fang an ta, hi zo hin Uri town pan an ta, 240MW Uri-II Hydro electric power project PM in hawng a tih.

Meghalaya CS thar dingin Warjri
SHILLONG: Meghalaya Chief Secretary, WMS Pariat chu June 30, 2014 khin a sina inthawk a pension ta ding a ni leiin Meghalaya sawrkar chun Additional Chief Secretary, PBO Warjri chu Meghalaya Chief Secretary thar dingin a ruot. PBO Warjri hin State Vigilance Commissioner sin khawm a chelsa ding a nih. Warjiri hi 1978 batch IAS Officer, Manipur-Tripura Cadre niin kum 2008 chen kha Manipur- ah thawkin post tum tum a chel a, Manipur a suoksan tawmin Principal Secretary (Home & Planning) a chel a nih.

Gas put leia kangmei suokin mi 5 a kang hlum
KANPUR: Zani hmasa khan Chamanganj area, Kanpur hmuna LPG Cylinder a Gas a putsuok leiin kangmei a suok a, mi 5, Anurag (12), Sita Devi (40), Hasina (48), Anil (24) le Sunil (29) hai a kang hlum a, mi 20 a kang hliem bawk. Hliem hai laia 9 hai chu an hliem inrik hle. Roshan Jacob, District Magistrate chun thina tuok sunghai chu zangnadawmna Rs. 50,000 seng le hliem inrikhai kuomah ṭhangpuina Rs. 20,000 seng pek ning an tih tiin a puong.

Maoist helpawlhai le inbiek ninaw nih
NEW DELHI: Maoist/ Naxalites helpawlhai sawrkarin inbiekpui naw nih tiin Union Home Minister Rajnath Singh chun zani hmasaa New Delhi a Maoist/Nacalites helpawlhai hratna state Chhattisgarh, Jharkhand, Bihar, Odisha, West Bengal, Madhya Pradesh, Uttar Pradesh, Maharashtra, Andhra Pradesh le Telangana Chief Secretaries, DGPs, CRPF, BSF le Home Ministry a top official hai an
hmupui huna a hril.

Tripura in Plastic Bag hmang a khap
AGARTALA: Zanita inthawk khan Tripura sawrkar chun plastic bag siem, zawr, siekhawl, laklut le hmang a khap hmak. Environment (Protection) Act, 1986 le Plastics Waste (Management and Handling) Rules, 2011 dan hai hmanga a khap a nih.

PM khawm a ṭhang ve ding
SRIHARIKOTA: Vawituk hin ISRO chun Satish Dhawan Space Centre, Sriharikota a inthawk Rocket PSLV C23 kapsuok a tih. Hi hunsera hin PM Narendra Modi khawm ṭhang a tih. PSLV C23 hin French, Singapore, Canada le Germany hai Observation satellites hai a phursa ding a nih.

Building chimin mi 4 a del hlum
NEW DELHI: Zani zingkar dar 9 vel khan North Delhi a Tulsi Nagar hmuna building sawngli a chim a, mi 4 a del hlum a, mi 2 an hliem. Building chim hi kum 50 vela upa ta le sungkuo ṭhahnemtawk tak chengna a nih. Mi 12 hai chu dam le hima sansuok an nih tiin Madhur Verma, Deputy Commissioner of Police (North) chun a hril. Hliem 2 hai chu Hindu Rao Hospitalah enkawl an nih.

Assam-ah electric in mi 6 a man hlum
GUWAHATI: Assam state a ruo nasa taka a sur leiin June 26, 2014 zan khan mi 6 zet electric in a man hlum. Ruotui tam leia mimkei tlung lei le an chengna insung haia tui a lut leia electric hin a man tawl an nih. Thina tuok hai lai hin Capital Complex, Dispur a MLA Hostel a um sawrkar thawktu Dinesh Das; Cultural Affairs Department, Arunachal Pradesh hnuoia thawk Praful Das; Down Town Hospital Area, GS Road a cheng Suren Bharali le Bhanngagarh area a cheng, sungkhata mi 3 hai an ṭhang.

Kum 33 hnungah Fake certificate
FAIZABAD: Tulai hnai el khan Faizabad Awadh University hnuoia thawktu pakhat chu kum 1981 khan Class X Certificate tehlem (fake certificate) hmangin sawrkar sinthawin a lut ti hrietsuok a nih. Class X (HSLC) Certificate tehlem hmanga sin thawtu hi Ram Lakhan Pal a ni a, tuhin Section Officer sin a chel a, tuta thlaa a sina inthawka pension ta ding a nih. Ram Lakhan Pal hin a sin hi kum 33 zet a lo thaw ta a nih.

Mihriem hriselna dingin mobile radiation ṭi um lo
KOLKATA: Health Experts le doctors thiem hai chun Mobile phones le towers radiation hi mihriem hriselna ta dinga ṭium lo niin an hril. Hi thu hi Mumbai a um Dr Bhavin Jankharia, Radiologist le President, India Radiologist and Imaging Association; Tata Institute of Fundamental Research a Chemical Science Professor R.V. Hosur, Dr Siddhartha Mukherjee, Indian- American Oncologist; Dr Rakesh Jalali, Brain Tumour Specialist, Tata medical Centre; Dr Rajesh Dixit of Tata Medical Centre le World Health Organisation (WHO) han an hril.

Tanzania nuhmei 2 suolluituhai man
NEW DELHI: Zani hmasa zantieng khan South Delhi a Sarojini Nagar a In pakhat sungah Tanzania nuhmei pahni suollui an ni thu Police han report an dawng leiin man tumin an suizui a. zanikhan nuhmei pahni suolluitu pasal pahni, kum 20 vel bawr mi ding Shastri Nagar le R.K.Puram a cheng hai chu an man tiin Delhi Police thusuok chun a hril. Mana um hai chu Kunal le Satish hai an nih.

Thla tharah AICC ṭhuoitu sawidanglamna
NEW DELHI: Thla thar July haptakar hnina lai vel khin All India Congress Committee (AICC) ṭhuoituhai lai insawidanglamna a um el theia hril a nih. AICC President Sonia Gandhi in A.K. Antony ṭhuoina hnuoiah informal Group an din a, July 6, 2014 khin 16th Lok Sabha election a Congress party an tlaksietna san nia an hriet dan report A.K. Antony in Sonia Gandhi kuoma peng a ta, hi zo hin AICC ṭhuoituhai lai insawidanglamna a um dinga hril a nih. 16th Lok Sabha election a khan Congress chu seats 44 chaua an tling a nih.

SPORTS:
Vawizan Netherlands le Mexico inkhel an tih
Finals vawi 3 zet lo khel tah, sienkhawm cup la ngai lo Netherlands le Mexico hai chu vawi zan 9:30PM hin an inbei ding a nih. FIFA World Cup 2014 khel meka hin Netherlands le Mexico hai hi an la thaw ṭha ve ve a, Netherlands chun a pool(B) ah an khingpui hai hnenaw nei lova hratna chang zar zarin points 9 hmuin pool champion an ni a. Mexico khawm an pool-ah Croatia le Cameroon hai hnea Brazil in-draw puiin point 7 an hmu phak ve a nih. Netherlands team hi 2010 Fifa World Cup-a khan Spain laka a lo tlawm taa, tuhin nasa taka ṭhang laiin defense –ah an ṭhatawk el khelah attacking an hrat hle leiin Mexico ta ding chun defense-ah thawsuol neilo chu an damna ding lampui umsun a ni el thei. June 30 (Monday) 1:30AM a chun Costa Rica le Greece hai inkhel an tih. Costa Rica le Greece hai hi football history-a an inhmasawn vawikhatana ding a nih. Costa Rica hi kum 1990 khan round of 16 a lo lut ta a, Greece chun tuta ṭum hi group stage a damsuok vawikhatna a nih. Tu am an hrat lem ding ti hril a harsa. June 30, 2014 (Monday) 9:30AM a chun France le Nigeria inkhel an tih. France chu group stages ah an khel ṭha thawkkhat a. Nigeria chun Bosnia 1-0 a hnein Argentina 2-3 in lo hnenaw sien khawm Iran an draw pui leiin point 3 hmuin knock out kai ve hram a nih. France le Nigeria hi a hmain vawikhat chau an lan hmasawn a, chu ṭum chun Nigeria in goal khat in an hne. July 1, 2015, 1:30AM-ah Germany le Algeria inkhel an tih. Germany le Algeria hai hi tuta hma khan vawihni an lo inkhel ta a, mak takelin vawihni an lo inkhelna haia hin Algeria an hrat lem ve ve a nih. July 1, 2014, 9:30PM a chun Argentina le Switzerland inkhel an tih. Argentina hi World Cup la thei dinga ngai laia mi a ni a, sienkhawm fans hai beisei nekin an che ṭha nawh. Argentina le Switzerland hai hi tuta hma khan vawi 6 an lo inhmasawn ta a, Argentina vawi 4 a hrat a, vawihni dang haia chun an indraw a nih.

VAWISUN THUPUI
Tukhawm a mi hmu suoktu chun hringna chu a hmu suok a, Lalpa ditsakna chu chang a tih. Amiruokchu, ka chunga suksuol chun ama lungril ngei a sukkhawhlo a, Kei a mi theidatuhai popo chun thina an hmangai a nih.” - Thuvarhai 8:35-36

EDITORIAL
National Highway venghimna

Manipur mipuihai damna le hringna lampui pawimaw
zuolhai chu National Highway No. 2 (Imphal-Dimapur Road) le National Highway No. 37 (Imphal-Jiribam Road) hai an nih ti chu mipui le sawrkar khawmin ei hriet seng. Chun, hieng National Highways pahnihai hi State le sawrkar thlungpui hai khawma venghim an ṭulzie chu an hrietchieng hle. Amiruokchu, iengleia vawisun ni chena venghimna sawrkarin a la pek nawzing am a ni a ti hi ngaituo tham tak a tling a nih. Manipur State sawrkar khawma sawrkar thlungpui kuoma NH- 2 le 37 hai hi vawi tam tak venghimna pe dingin ngenna a lo siem ta hlak. Amiruokchu ngaisak a hlaw chuong nawh. A ngaisaktu ding sawrkar ei mamaw a nih. Law & Order enkawl hi state sawrkarhai kuta um a ni a, ei khuolzinna lampui le ei mamaw chi tum tum hai phurna lampuihai hlak chu Nagaland le Assam ramhai an ni si a. Ei state Police hai ta ding chun hang thaw rak ngaina a vang hle. Uniform le silai leh mi state a va lut rup rup el hlak chu a remchang si nawh. Nagaland le Assam Police hai chu Manipur motor-hai lo venghim dingin Manipur sawrkarin a ngen hlak a, hun sawtnawte sung chu venghimna chu an hang pek ngei hlak a, misuol khawmin an inzader vieu niin an lang. Bus le Truck hma haia Police pakhat chau khawm an ṭhung kak ta chun misuol an inlang ngai nawh. Nisienlakhawm kum tluonin an mi veng pek thei si naw hi a buoithlakna lai tak chu a nih.

Helpawl, suomhmang le misuol dang dang hai hin inlang nuom hun bik lai le chet nuomna hmun bik khawm an nei niin an lang a, an chanchin hi suizui deu a, an chetthla nuomna hmun deuva ei Police Commando- hai hi an khat tawkin civil dress in invel zau zau hlak hai sienla, an tuok fuk changin an simna khawpin action an chungah lain hremhlak hai sienla thilṭha a ni ngei ring a um. Police le sipai khawm ei hau tawk ta tho a, an duty hi sukzingin tuta nek hin taima deu hai sienla chu misuol laka hin motor le a khaltuhai chu an him lem ngei ring a um.

National Highways No. 2& 37 haia hin motor ṭhuoihmang, Driver ṭhuoihmang, tax khawn le passenger suomtu hi inzing utin an um hlak a. Hiengang thil thawtu hai hi helpawl, helpawl tehlem le suomhmang hai an ni tlangpui a. Hienghai sukremle tukdawlna ding hin sawrkarin Army hmangin hma hang la ngun deu sienla chu tukdawl le sukrem an hung ni thei ngei ring a um. Central Paramilitary Forces, Army le Poliec hai, National Highway No. 2&37 haia an tlanzing lai khawm hin Truck, Bus le Taxi inlawn vel haia tax khawnhai hi chu an che zing tho niin an lang. Hieng a ni lei hin khau lemin hma hang la hai sienla chu tax khawnhai hi chu an sukre el thei ring a um.

Manipur mihai damna le hringna lampui NH-2&37 haia hin venghimtu an mamaw ngawi ngawi ti hlak sawrkar thlungpui khawmin a hriet tasa a ni a. National Highway Protection Force hi hung indin ngei sienla nuom a um. BJP,Manipur ṭhuoitu group hni hai chu new Delhi-ah fein, Union Home Minister le Road Transport Minister hai kuomah National Highway Protection Force indin dinga an zu hni hi a taka sukpuitling la ninaw sienkhawm lawm a um tho. La zu nawr nawk peihai sienla nuom a um.

Chun, Imphal-Jiribam Road siem ṭhatna sin khawm PM Narendra Modi in ni 100 sunga dinga Action Plan a siemah a ṭhangsa ve tia an hril khawm hi lawm a um a, Manipur mihai ta ding chun thu ṭha le chanchin lawmum a nih. BRTF in hi lampui an siem sung hin chu zo tak tak an neinaw ding niin an lang. National Highway Authority of India in hi lampui siemna sin BRTF/BRO kuta inthawk lain, lampui siemna sin an thaw ding a nih tia BJP Manipur President Th. Chaoba Singh in a hril khawm hi a tak takin hung puitling ngei sienla nuom a um khawp el.

Hmasawnna Thar | June 28, 2014

HEADLINE:
GAIL Pipeline puokdarah mi 15 an thi, mi 40 an hliem:
Thi sunghai kuoma zangnadawmna Rs. 2,00,000 seng pek dingin PM in a puong
HYDERABAD: Zani zingkar inhma tak khan Andhra Pradesh a East Godavari District sunga Nagaram Village- ah Gas Authority of India Limited (GAIL) Pipeline a puokdar leiin kangmei rapthlak talel a suok a, mi 15 a hring pumin a kang hlum a, mi 40 an hliem. Thi hai lai hin nuhmei pakhat le naupang pakhat an ṭhang. Hliemhai laia mi 12 hai chu an hliem inrik hle. Hliemhai hi Kakinada, Rajolu le Amalepuram Hospital hai panpui an nih. In le Dawr tam tak a kang bakah Jubi huon acres 15 lai a kang ut vawng. Kangmei hi a chawk puot puot a, feet 20 velin meichawk hi an sang nia hril a nih. President Pranab Mukherjee; PM Narendra Modi, Andhra Pradesh CM Chandrababu Naidu han hi thil tlung hi pawi an ti thu an hril bakah thina tuok sunghai an sunpui thu le hliemhai an tuorpui thu an puonglang. President chun hliemhai chu an pawimaw ang ang damdawi pe dingin Andhra Pradesh State sawrkar an hriettir. Prime Minister Narendra Modi chun, Prime Minister’s Relief Fund a inthawk thina tuok sunghai chu zangnadawmna Rs. 2,00,000 seng le hliem hai chu Rs. 50,000 sen gpek ning an tih tiin a puong. Hi hi Petroleum Ministry le GAIL han zangnadawmna le ṭhangpuina an pek ding hai baka mi a nih tiin Narendra Modi chun a hril. Nagaram, Andhra Pradesh a GAIL Pipeline puokdarna san suitu ding High Level Committee indin nghal a ni a, Senior officials han hi thil tlungna hmun hi va sir an ta, a hmuna thil umdan enfel an tih. Tuhin sawmdawlna le ṭhangpuina sin thaw mek a nih tiin Union Petroleum Minister Dharmendra Pradhan chun a hril. Rs. 25 lakh seng pek an ni ding India sawrkar chun thina tuok sunghai kuoma zangnadawmna

Rs. 25 lakh seng pek dingin zanikhan a puong.
Andhra Pradesh Oil Minister Dharmendra Pradhan chun thina tuok sunghai kuoma zangnadawmna Rs. 5 lakh seng le damsunga ruolbanlo ding khawpa hliem hai Rs. 1 lakh seng ṭhangpuina pek an ni ding thu a puong bawk. Thina tuok sunghai kuoma Rs. 25 lakh pek ding hai laia Rs. 2 lakh chu PMs Relief Fund-a inthawk a ni a, Rs. 3 lakh chu Chief Minister’s Relief Fund a inthawk ning a ta, a dang po chu GAIL in an pek ding a nih tiin zanita official thusuok chun a hril. GAIL chun hi thil tlung leia damsunga ruolban ta lo ding hai chu fixed deposit in an bank account chitah Rs. 5 lakh a thun pek bawk ding niin ei thu dawngna chun a hril.

LOCAL NEWS:
Loneitu hai kuoma Urea sem
CCPUR: Zani 9:30AM khan Churachandpur District- a ding hnuoiṭhatna (Urea Fertilizers) Truck 2 sip a hungtlung a. Zani ma khan Agri. Department, CCPur chun Loneituhai hai kuoma sawrkar rate in bag khatah Rs. 280-290 in an pek. Hnuoiṭhatna hi mi pakhatah bag 2 peia pek an ni a, bazar rate a chun bag 1 ah Rs. 500 chuong a nih tiin Department official hai chun an hril.

H&FW Regional Director CCPur-ah
CCPUR: Dr L.A. Singh, Regional Director (Mizoram, Manipur & Nagaland), Health and Family Welfare, Govt. of India chu zani sun dar 12 vel khan CCPur-ah a hung inzin a, Malaria Department hai leh Vector Borne Diseases chungthu an hriltlang bakah District Hospital ngirhmun a en a, hi zo hin Imphal tieng a kir nawk.

Cases thar 31 approved thaw
CCPUR: Zani 10:30AM khan DC Office-a BRGF Resource Centre-ah Mr P.K. Jha, IAS, DC,CCPur inrawinain District Disaster Management Authority meeting nei a ni a, cases thar lut hai laia 31 hai chu approved an thaw. Hi meeting a hin CMO, SP, DSO, CEO, EE/IFCD, EE/ PHED le SDOs hai an ṭhang. Cases approved thawa um hai laia 12 hai chu CCPur, Singngat- ah 2, Henglep-ah 9 le Parbung- ah 8 an nih. DC, CCPur chun, SDOs hai chu form peklut huna photo scan sa hrim hrim pelut ta lo dingin an hriettir bakah kangmei suok le thina tlung hai chu Concerned Department kuomah Certificates la a, form leh kilde-a pelut sa ta hlak dingin SDOs hai an hriettir.

Bazar-a Vaki zawrtu a Vaki zawr le man
CCPUR: Peoples For Animals (PFA) le Police ṭhangruol hai chun zanikhan New Bazar-ah Vaki (parrot) zawrtu Ms Ngainu (45) w/o Vungkhosat of Bethel Veng, New Lamka chu a Vaki zawr 31 hai leh an man. Vaki le a zawrtu hai hi Police han Forest Department kuta an peksawng a, Forest Department chun a case hi lain RT5 receipt katin Compounding Fee an lak hnungin a zawrtunu hi insuo a ni a. Forest Department Office-ah PFA le Police han Vaki hai hi inthlasuok an tum leh an thla (wings) hai pawt a ni leiin an vuong thei naw a, hi lei hin PFA kutah Vaki hai hi inhlan sawng nawk a nih.

Vaki hai hi an thla mawnga an vuong thei huna Forest Department in inthlasuok an tih. Ms Ngainu chun Vaki hai hi New Bazar-a zawr sawng dinga Saidan khawmi hai kuta inthawk pakhatah Rs. 60/- peia an chawk le Rs. 65/-a zawr hlawk a tum niin a hril a. 10 a lo zawr hman ta a, a zawr hai laia 7 chu bata a zawr a ni thu le Vaki hai a kharsawngna sum khawm midang ta a puk niin a hril.

Awareness on Climate Change
CCPUR: June 28, 2014 vawisun 11:00AM hin NYK, CCPur le IGSSS hai ṭhangruola huoihawtnain NYK Office, Tuibuong-ah Awareness on Climate Change um a ta, resource person in D. Khuala Vaiphei, District Project Manager, NERCOM & Member DACYP ṭhang a tih.

BJP District Morcha president dingin
CCPUR: Smt Tinkhonei Haokip, President, Mahila Morcha BJP, CCPur District le Shri George Neihsial, President, BJYM,CCPur District hai chu District Morcha President dinga ruot an nih tiin BJP CCPur thusuok chun a hril.

HI GHQ inkhawm ko
CCPUR: Vawisun (June 28, 2014) 3:30PM hin Hmar Secretariat, HSA Campus, Rengkai-ah Hmar Inpui inkhawm ko a nih. Hi huna hin members le fiela um hai chu ṭhang seng dinga inhriettir an nih.

Biometric lak hun suksei
CCPUR: Biometric Photo lakna fe mek chu September, 2014 chena dinga a hun suksei a ni a, Biometric Photo la lalo hai chun mani Sub-Division chitah Biometric photo lak thei ning a tih tiin ei thu dawngna chun a hril.

Financial Literacy Awareness
CCPUR: Zani 9:30AM khan NABARD huoihawtnain Ebenezer Academy School, New Lamka hmuna Financial Literacy Awareness Camp nei a nih. Hi huna hin NABARD; UCO Bank, N. Lamka; Postal Services, Manipur Rural Bank le Women Self Help Group haia inthawk Resource person in an ṭhang.

AIR, CCPur stn. Prog.
CCPUR: Vawisuna AIR, CCPur station-a Paite programme a chun T. Khupzabiak & party han hla sak an ta, naupang programme um a tih. Hmar programme a chun Mercy Puruolte in hla sak a ta, naupang programme um a tih. Thadou programme ah C. Benjamin Khongsai le Bryan Mangneo han hla sak an tih.

BJP, CCPur District meeting
CCPUR: P. Tongminthang Lhungdim Delhi inzin lawmlutna le BJP, CCPur District meeting chu June 30, 2014, 9:30AM a inthawk khin District BJP Office, Hmarveng, Opposite Circuite House ah nei ning a tih.

IMPHALL NEWS:

TSA in darkar 24 Bandh
IMPHAL: Vawituk zing dar 3 a inthawk Thadou Students Association (TSA) General Headquarters chun Imphal-Dimapur Highway le Imphal-Churachandpur Road haiah darkar 24 bandh thaw an tum thu Manipur Press Club, Imphal-a Chanchinbumihai an inhmupui huna an hril. June 16, 2014, 11:30AM a IRB Commandant Chaoba Lukho in Khonghampat le Koirengei inkara Alto Car ML05F-2825 a baw a ngaisak naw dodalnaa bandh hi an thaw tum nin Thangminlen Haokip chun a hril.

Padma Shri, Padma Bhusan Award
IMPHAL: Padma Shri, Padma Bhusan le Padma Vibhusan Award dawng thei dinghai chun Directorate of Social Welfare, Govt. of Manipur ah Application Form lak thei hun a nih. Application Form hi fill up zovin July 5, 2014 chenin hi Directorate a hin peklut thei ning a tih.

World War-II memorial Service hmang
IMPHAL: Zanikhan Imphal Indian War Cemetry, Hatta le Imphal War Cemetry, Deulahland haiah World War-II Memorial Service nei a nih. Governor V.K. Duggal, Dy. CM Gaikhangam, First Secretary (Defence) Jane Spicer of Australian High Commissioner to India, Col. Larry J. Redmon, Military attached Embassy of USA, British Deputy High Commissioner to India Scott Furssedonn Wood, Major General B.M. Bali GOG 56th Mt. Division le Dr Hugo Slim hai khawm an ṭhang.

Mithiruong pahni hmu a nih
IMPHAL: Zanikhan Uripok Meisnam Leikai, Imphal-ah pasal pakhat thise ruong hmu a nih. A hming le umna hriet a ninaw leiin RIMS Morgue ah sie a nih. Chun, zani ma khan Chandel District a Nungorok ah pasal pakhat thisa ruong hmu a ni bawk. Mithi hi hriet a ni ta leiin a sung han an lak tah.

Japanese Army Seal le Stamp Pad
IMPHAL: Tulai hnai el khan Indopui pahnina hun laia Japanese Army Seal le Stamp Pad (Japanese Official seal) chu Phalkhochong Mangte w/o Ngamkhopao Mangte of Thangkhanphai, Senapati District chun World War-II Memorial Foundation, Manipur Museum a dingin a thawlawm.

Rel lampui hnuoiver No. 14 zo fel
IMPHAL: Jiribam -Tupul Rel lampuia Tunnel No. 14 (hnuoiver) chu zani hmasa zan dar 8 khan zo fel a ni tah. Hi tunnel hi Awangkhul,Tamenglong District sunga um, Km. 3 a sei a nih. Jiribam-Tupul Rel lampuia hin Tunnels 34 a um a, Tunnels 6 zo a ni tah.

NATIONAL NEWS:
DU ah admission thaw thei ta ding
NEW DELHI: Delhi University admission buoina chu chingfel a ni ta a, Four Year Undergraduate Programme (FYUP) ni ta lovin Three Year Undergraduate Programme hmang a ni ta ding a nih. Vice Chancellor, Dinesh Singh chun, DU hnuoia College-hai chu admission thaw ṭan ta dingin an hriettir tawl.

CS le DGPs hai HM in an hmupui
NEW DELHI: Maoist/ Naxalites helpawl hai chetna states, Chhattisgar, Jharkhand, Bihar, Odisha, West Bengal, Madhya Pradesh, Uttar Pradesh, Maharashtra, Andhra Pradesh le Telangana Chief Secretaries le Director General of Police (DGPs) hai chu zanikhan Union Home Minister, Rajnath Singh in new Delhi-ah an hmupui a, Central Paramilitary Forces le Police hai inkara gap um, action plan, road project le mobile phone towers 2,199 indinna ding thu le hmalak dan ding hai an hriltlang.

BPF in Congress le an ṭhangruolna an suktawp
GUWAHATI: Bodoland People’s Front (BPF) chun Assam-a Congress le an ṭhangruolna an suktawp. Congress party chu an party mala majority nei an ni leiin hi thil hin Tarun Gogoi Chief Minister nina hnuoia Assam sawrkar chu tawkpawi naw nih. BPF chun Bodoland Territorial Area District suk hmasawnna dingin sawrkarin iengkhawm thaw a nei naw leia Congress le an ṭhangruolna an suktawp a nih tiin BPF chun an hril.

Karnataka le Tripura Governor hai hun a tawp ta ding
NEW DELHI: Vawisun hin Karnataka Governor H.R. Bhardwaj le Tripura Governor, Devanand Kumar hai hun chu a tawp ta ding a nih. Tamil Nadu Governor, K. Rosaiah in Karnataka Governor sin lo chelsang a ta, Mizoram Governor, Vakkom Purushothaman chun Tripura Governor sin lo chelsa bawk a tih. Chun, Nagaland Governor sin chu Meghalaya Governor, K.K. Paul in lo chelsa bawk a tih.

Tripura-a Malaria leia thi 51
AGARTALA: Naupang 42 ṭhangsain Tripura State a Malaria natna hri inleng leia thina tuok chu 51 an tling ta a, Malaria leia damnaw mi 5,500 vel an um mek. Malaria natna ang deuva damnaw mi 25,000 vel an um bawk nia hril a nih.

Garo Hills-ah saiin zirtirtu a sir hlum
TURA: June 28, 2014 zing dar 2:30 vel khan Meghalaya state a East Garo Hills District a Dapgre an ti hmuna ram saiin Dogragre L.P. School a zirtirtu Warson Ch. Sangma of Gaswapara chu a sir hlum. Ram sai hi pathum an ni a, an invak kuol hlak leiin zirtirtu le student-hai ta dingin a him naw hle a hril a nih.

Pencil le Notebook man ding neinaw leiin an that
BERHAMPUR: Odisha State a Gajam District a cheng Jayanti Naik (14) d/o Bijay Naik, Class VII inchuklai chu a nu le pa han Pencil le Notebook man ding an pek thei naw leia beidawngin June 25, 2014 ni khan Khawnvartui an bur khum a, a ma le ama an raw hlum. Jayanti Naik pa hi nitina inhlawfa le a nu hi mi ina a ṭul ṭul thawa sin thaw hlak a nih. SSA um ta si a, hienganga thil a tlung el hi sawrkar ngaimaw a hlaw a, Ganjam District Collector chun inquiry thaw dingin order an suo.

Pakistan in Ceasefire a bawsiet
JAMMU: Pakistan chun zanikhan Ceasefire a bawsiet nawk a, Jammu and Kashmir a Poonch district, LoC a Bhimbhar Gali-Gambir a Forward Area chu Automatic silai le silai chin chi hai hmangin a hung kap nawk a, India sipaihai khawmin an kap let ve leiin zani zingkar dar 1:30 chen khan an inkaptuo. April le May thla sung khan Pakistan chun ceasefire bawsiein vawi 19 zet a hung kap a. Kum 2013 khan India sipai 12 an kap hlum a, sipai 41 an kap hliem bawk a nih.

VAWISUN THUPUI
Lalpa ṭi chu suolna theidana ding a na, Chapona le, insukhliemna le rîtlona kawng leh, Bau chapo hi ka theida a nih. Thurawnna chu ka ta a na, hrietna hrisel leh, Hrethiemin ka um a, thilthawtheina ka nei a nih. - Thuvarhai 8:13-14

EDITORIAL
Bu thar tam a ngai

Ei damna tak le a bova ei um theinaw bufai ei intodel naw leiin sawrkarin kum tin cheng vaibelsie tel an hmang pha hlak. Ei sawrkarin bufai inchawknaa sum a seng hi cheng vaibelsie 100 chuong a tling phak ring a um. Hienganga ei damna tak, ei rama ei tharsuok thei ni bawk si, kum tina sum tam tak inhmanga ei la fepui hi thil pawi takel a nih. Hi thil hin thil danga ei hmasawnna ding a dal nasa hle ding a nih. Ei fak tak ei intodel naw leia hmasawnna a fe thei naw pha hi thil pawi takel a ni a, a muolpho thlakin inzak khawm a um.

Kum tinin vai bufai state danga inthawk ei laklut a. Bandh lei le lampui siet leia motor a fe ṭha thei naw pha chun bufai chungthuah harsatna ei tuok nghal hlak. Vai ei ti hai hi iengma lova ei ngai a, ei hang hmusit khanglang hlak a chu an ni ṭhang lo chun bu nghei el ding ngirhmuna um ei nih. Chuleiin, hmusit nekin ruolṭhaa ei siem lem a ṭul a nih. Bufai ah ei intodel theina ding chun lo nei le bu ei ching uor a ṭul. Vai bufai ringa ei khawsak sung hin chu hmasawn tak tak thei ngai nawng ei tih.

Bu le thlai chingna ding ram lien takel ei mamaw em em laia ei leilet ṭha lai le ei ram hai inhmuna ei ṭhet a, ei la zawr zing el hi chu thil pawi takel a nih. Bu le thlai chingna hmun hai inhmuna ei ṭhet pei chun inṭhanglien le hmasawn nekin ei retheina a zuol deu deu ding a nih. Hieng a ni lei hin leilet ṭha lai inhmuna ṭhet hi an hmatienga ei bansan nuom a um. Ei sawrkar khawma leilet ṭha lai inhmuna ṭhet hi a la khap a ṭul ding a nih. Sawrkarin a thunun le a khapna thupek an suo a ṭul a nih. Chuong naw chun ei leilet hai inhmunin ei la ṭhet vawng ding niin an lang. Sawrkar um nasan chu mipui a ni a, mipuiin mipui ta dingin sawrkar ei siem a, sawrkar chun mipui hamṭhatna kawng hrana hma lain sin a thaw ding a nih. Chu lai chun mipui tieng khawmin sawrkar ngawr ngawra innghat ei tum a ni chun indik naw ni a, sin thawng ei ta, sawrkarin a mi ṭhangpui ding a nih. Sin thaw pei lo hai chu sawrkar ta ding khawma ṭhangpui ngaina a um nawh. Ei Bible khawma a thaw pei nawtu chun a fak khawm fa naw raw seh a ti a nih.

Bu le bal ei tharsuok tam theina ding chun sawrkar le mipui ei ṭhangruol a ṭul. Ṭhangruol chu hratna, hmasawnna le hlawtlingna a nih. Mipui le ṭhangruol a ṭul leiin sawrkar chun mipuihai leh an ṭhangruol theina dinga mipui le inlaichinna a siem ṭhat a ṭul. Chun, sawrkar khawma loneituhai kuoma loneina hmangruo le khawl ṭha lem a ngaituo pek a hun ta a nih. Ran le mihriem kut chau hmang chun bu tharsuok tam chu thil harsa tak a nih. Andhra Pradesh le Punjab State hai bufai ei fak le ei ring tak an ni a. Hieng state pahni haia loneituhai sin thawna hmangruo le khawl hai chu tulai takel vawng a nih. Hnuoi inletna, bu phunna le bu atna haia khawm khawl an hmang ta a nih. Hi lei hin sin thawtu hai khawmin sin thawna zakuo le kekawr an hak le an bun a ṭul ta naw a, sin thawtuhai khawm chirhak an ber ta nawh. Hi lei hin lo sin thaw chu an ṭhalaihai khawmin an rin ta nawh. Lonei dan thlakthleng le siem ṭhat a hun ta a nih.

HL Daka Memerial Hall Hawngna (Pics)

Photograph by Alan Famhoite

HSA Platinum Year-long Celebration Hawngna le HL Daka Memorial Hall inhlanna nei

H.S.A. Founder General President, Late Pu H.L. Daka hrietzingna ding H.L. Daka Hall hawngna le Pathien kuoma tawngtaina a inhlanna nei.

H.S.A. Platinum Jubilee Yearlong Celebration Hawngna Pu PK Jha IAS, DC, CCpur in a nei.

CCPur, June 28, 2014: June 28, 2014 11:10 AM khan H.S.A. Platinum Jubilee Launching –cum- H.L. Daka Hall Dedication –cum- H.S.A. Platinum Literary Competition Programme chu ursuntaka H.L. Daka Memorial Hall, H.S.A. Campus, Rengkai, Churachandpur le Rengkai Govt. Hr. Sec. School hmun hai ah ursun taka hmang a nih. Hi hun a hin mipui 300 chuong fekhawm a nih. Mipui fekhawm hai lai hin Hnam sung a pawl tum tum Thuoitu hai, Sawrkar tienga Civil le Sipai Officer, H.S.A. Adviser le Thuoitu hlun tak tak hai bakah Student Organisation unau hnam dang dang a mi hai khawmin hi hun hi an hung tawiawm bawk.

Rev. HP Runremthang in HL Daka Memorial Hall hawngna a nei lai

Tanna Hla Mipuiin “Tinkim ka  dawn changin…” ti hla an sak zovin. Hunser pawimaw tak H.S.A. Founder President Late Pu H.L. Daka hrietzingna le chawimawinna dinga thangthar H.S.A. GHQ in H.S.A. Campus, Rengkai, Churachandpur, Manipur hmun a Pu H.L. Daka Memorial Hall dinga building a pek suok chu H.S.A. Thuoitu lo ni ta hlak le H.S.A. tadinga hun tamtak lo hmang ta hlak, Rev. H. P. Runremthang Evangelist-at-Large & Youth Co-ordinator, Independent Church of India (ICI) chun hi Hall hi hawngna le Pathien kuoma tawngtaina a inhlanna a nei a. Chu zo chun Hall sung programme hmang zawm pei a nih.

Hi hunser hmangna hun hi Session 1-na hun ah Nk. Margaret Tryte, HSA Legal Adviser in a keithuoi a, hi hun a hin thuoitu hmasa fam lo chang tahai inzana in Silent Prayer hun hmang a ni a, hun inhlan tawngtaina Rev. Samuel Khuma Joute, Principal, AG High School in a nei a. Chu zo chun Pu John H. Pulamte, President, Hmar Inpui & Hon. Chairman, H.S.A. PJCC, in Keynote Address hun a hmang a. Platinum Jubilee & Literary Competition hawngna, Meiser sitin Khuollien Pu P.K. Jha DC, CCPur chun a nei zawm ngal a, Hi hun a fe khawm mipui,  Hnam tum tum a thuoituhai chibai bukna a nei zovin hieng thu hai hi a hril. Thalaihaiin thiltha thaw hmasa dingin an fui a, H.S.A. thilthaw that hai iemani zat hrilna a nei a, chuhai lai chun, vawisunnia thangthar inchuklaiha’n thanghluihai hmalakna le an hnungzuia kum 75 a tlingna le inzawma an hma lakna chu entawn tlak le var a ti thu hai a hril sa bawk. DC, CCpur hi H.S.A. Platinum Jubilee Celebration Committee (PJCC) chun thilpek Vaimim hna tawl, thing-le-ruo hmang a siem ngat International Trade Fair a khawm zawr hlaw tak el Par (dry flower), Khiengkawi mansa, Ngotekher Muffler, Memento (Thu ziek) le Parthi hai lawmthu hrilna le ditsakna’n an inhlan. Hi hun a hin Nk. Clearance Mawite le Nk. Elizabeth ha’n “Ei hnam mawina chu…” ti hla’n mipui an inawi chun mipui na a tlai hle. Pu Rochunghnung Chairman, PJCC in Mipui fekhawm le Event Sponsortu hai kuomah lawmthu hrilna a nei zovin Famtah Pu H.L. Daka naupa Rev. Jonathan Infimate, Manipur Field i/c, ICI in thu hrilna hun tawite a nei a. Chu hun a chun, Mipui fekhawmhai chu ei hnam, ei tawng inzapui lova, Pathien thei tawpa chawimawi dingin an fui bakah inchuklai hai hriet zing dinga thu pawimaw le tha tak tak infuina a nei. Chu zo chun ama chanvo Hun khar Tawngtaina le Inruolsiek dinghai tawngtai pekna hun Rev. H.P. Runremthang in an hmang zovin. Session 2-na le Inruolsieka hun chu hmang zawm pei a nih.

Hi Platinum Jubilee Celebration hi tukum 2014 sung kumtluon a inser ning a ta. Thlatin item chi tum tum haia hmang zui zawm pei ning a tih. A hmasatak a dingin hi ni hin Rengkai Govt., Hr. Sec. School ah H.S.A., GHQ Level a Spot Competition Essay le Drawing & Painting a tan a nih a. Essay a hin mi 245 lai le Drawing & Painting a hin mi 8 lai an thang. Essay hi Category I (Class IX-XII) & II (BA/BSc & Above) a the a nih a. Drawing & Painting Category I (Class IV-VI) & II (Class VII-VIII)  haia the a ni bawk. Topic hi a hun tan hma, inruolsiek dinghai hmuhawi ngei a lekha pawt a ni a. Chu dungzui chun, Category I & II hai chun Topic 2 pei an ziek a nih. Essay Category I, (1) “Fak le dawn nitin khawsakna a ei intodel thei dan ding” (2) Sakhuona le Politics . Category II hai chun, (1) “Inchukna Hnam Damna A Nih” (2) “Tawng A Dam Chun Hnam A Dam” ti hai hi an ziek bawk. Drawing & Painting Category I chun, (1) “Kan School, Ka Inchukna In” (2) “Tlawmngaina” Category II hai chun, (1) “Thing-le-ruo, Ramsa le Rannung hai Humhal” (2) “Insung le khawtlang a naupang hai thangkai ve thei dan” ti hai hi an nih. Result puongna le Lawmman semna chu tuta inthawka hun sawtnawte a nei ning a tih. Tuta inthawk Thlatin hi Platinum Jubilee le inzawm hin item chi tum tum hmang zawm pei ning a ta. Quiz, Monologue, Football, Platinum Star Hunt & Choir Hunt, Tui lilut, Thingkungkai inel le a dang dang hai nei zawm pei ning a tih. Grand Finale chu H.S.A. 1939 a indinna le Assembly neia a umna hmasatak khuo Ngurte, Churachandpur hmun ah hung tlung ding Dec. 11 – 14, 2014 khin ropui tak le ursun taka hmang ding a inbuotsai mek a nih. Hi hun a hin Central tieng a Union Minister hai khawm an hung thang ngei beisei le in dawr pui mek a nih.

Hi Programme puitlingna ding a sum le pai, tha-le-zung hung thawlawmtu, thilpek chi tum tum petu, hi ni le hun a ngai pawimaw a mani sin tul tam tak maksan a hungkhawm mipui, inchuklaihai le an hotuhai, hi Programme a bul anthawka a tawp chen a, Coverage hung thawtu Press/Media tum tum hai inzawt senglo  hiel hai kuomah LRS Puruolte,  i/c Advertising & Publicity Department, PJCC chun lawmthu a hril. Hmatieng peia event hran hran haia Sponsor, Co-Sponsor, Event Partner, Media Partner ni nuom hai tadingin kawt lientak hawng zing a ni bakah. In cash, in kind/gift items haia thang thei zing a ni bakah mani sunghai hrietzingna, Memorial ang zawng khawm a Lawmman tum tum hai tum thei zing a nih. Event le Items a tam leiin Ram le hnam tadinga ei thangtlang theina a nih ti hrie tlat a, ei theina zawn seng ah kut rawl ve di’n mitin a ngenin, a fiel bawk.


Photo Credit: Alan Famhoite

Hmasawnna Thar | June 27, 2014

HEADLINES:
PM chengna inah PM rawiin High Level Meeting nei a nih
NEW DELHI: Zanikhan Prime Minister chengna In, New Delhi-ah PM Narendra Modi inrawinain HighLevel Meeting nei a nih. Hi meeting a hin Union Finance Minister Arun Jaitley, Union Agriculture Minister Radha Mohan Singh le Food Minister, Ram Vilas Paswan hai an ṭhang. Thil man kaisang chungthu, Food Security chungthu, fur ruotui tlawm thu, MGNREGA chungthu le thu dang danghai an hriltlang. Fur ruotui tlawm leia fak le dawn thila harsatna pumpel a hung ni theina dingin Centre sawrkar le state sawrkarhai an ṭhangruol ṭha hle a pawimaw a nih tiin PM chun a hril. State sawrkarahai chu thil man kaisang thununna ding, a ruka fak le dawn thilhai thupruk sukrena ding, bufai ei mamaw tawk Bazar- a a um zing theina ding, van ruotui sekkhawl a ni thei dan ding le inflation thil hai enkaitu dingin PM Narendra Modi chun State sawrkarhai chu Fast Tract Courts indin dingin an hriettir. MGNREGA khawm Agriculture tiengpang thawnaa hmang uor dingin Modi chun state sawrkarhai an hriettir. Agriculture Ministry chun Districts 500 haia dingin Constituency Plan a lo induong ta a nih.

LOCAL NEWS:
Poster tar lo ding le Iron Chest hai lasuok dingin
CCPUR: Churachandpur Police Station chun an dai (fencing) hmatieng hai siemṭhain rawng an nal thar. Tuta hmain Police hai phalna la hmasa lovin mi ṭhenkhatin poster/Advertisement an lo tar hlak a. Tuta inthawk chun mi tukhawmin Police phalna le remtina la hmasa lovin Police station dai (fencing) ah advertisement/ poster tar talo dingin OC, CCPur PS chun inhriettirna a siem. Chun, Police Station-a Strong room um huna Govt. Department tum tumin an document pawimaw hai an sieṭhatna Iron Chest hai strong room ṭhiek a ni le inzawma an iron chest hai lasuok dinga inhriettir an ni hnungin tuchen hin Iron Chest 22 lak dawk lovin a la um a. Iron Chest la ladawk lo Department hai chun tuta inthawk kar khat sunga an Iron Chest chit ladawk dingin OC CCPur PS chun an hriettir a. Kar khat sunga la dawk lo hai chu neitu um lo ‘unclaimed’ a ngai ning a tih tiin OC chun a hril.

ASHA Training a fe mek
CCPUR: June 17, 2014 a inthawk CMO Mini-Training Hall le DFWO Training Hall haia Block tum tuma ASHA hai ta dinga training neia um chu a fe mek a. Zanikhan Churachandpur District sunga ASHA Facilitators 30 han training an nei a, vawisun hin Primary Health Centres (PHC) le Primary Health Sub-Centres (PHSCs) haia MO in-charge le BPM han training nei an tih. June 28, 2014 in Town area sunga ASHA worker han training nei an ta, training hi zo fel ning a tih.

Science Seminar nei a ni ding
CCPUR: ZEO, CCPur hnuoia Science Unit huoihawtnain July thla tawp tieng khin Class VIII-X inchuklaihai ta dingin “Innovation in Agriculture for a Sustainable future prospects and Challenges’ ti thupui hmangin Science Seminar um a tih. Hi Seminar-a hin School pakhata inthawk student pahni pei Headmasters/Principal in a recommended hai chau ṭhang thei an tih. Seminar a ṭhang ding hai chun July 20, 2014 chen ZEO CCPur Office-a hming peklut ding a nih tiin ZEO Office-a inthawk ei thu dawngna chun a hril.

BRGF Hall-ah meeting
CCPUR: June 28, 2014, 11:30AM khin Mr P.K. Jha, IAS, DC, CCPur inrawinain BRGF Resource Centre, DC Office-ah Pre- PLP for the year 2014-15 for CCPur District um a ta, hi huna hin Annual Credit Plan and Sub-Committee meeting on CD Radio Presentation le confirmation um bawk a tih. Pre-PLP presentation chu NABARD in peng an tih.

AIR, CCPur stn. Prog.
CCPUR: Vawisuna AIR, CCPur station-a Paite programme a chun BCD Moria EBCC han hla sak an ta, This Week in CCPur tiem ning a tih. Hmar programme a chun Ruth Pulamte le Lalruotmawi hai hlasak ngai thei ning a ta, This Week in CCPur tiem ning a tih. Thadou programme a chun Lhainei Haokip & party han hla sak an ta, This Week in CCPur tiem ning a tih.

IMPHAL NEWS:
Ṭhuoihmanga um Driver insuo a ni tah
IMPHAL: Night Super Bus Driver Thokchom Ingobi (45) s/o (L) Nimai Singh of Khongjom Mamang Leikai, June 13 & 14, 2014 inkar zana Jakhlabanda hmuna KCP (Lamyanba Khuman) pawl han an ṭhuoihmang chu dam le himin June 25, 2014 khan Meghalaya le Assam inrina hmuna an insuo ta a; Dimapur a hung pan mek a, vawisun hin Imphal a hungtlung beisei a nih.

British High Commissioner
IMPHAL: British High Commissioner to Eastern India, Mr Scott Furssedonn- Wood chu Manipur-a ni 4 sung cham dingin zanikhan Imphal a hungtlung. Wood hin zani zantieng 7PM khan CM O.Ibobi Singh an hmupui. Imphal a cham sungin Manipur Governor, V.K. Duggal inhmupui ta, British sipaihai thlan le Indopui pahnina huna indona field hai sir bawk a tih.

Pasal thisa ruong hmu a nih
IMPHAL: Zani 11AM velkhan pasal pakhat kum 50 mi vel, Nagaland State Road Transport Corporation Complex, Opposite Kanglapat ah hmu a nih. Imphal Police Station a Police han tuia inthawk an laksuok a, RIMS Morgue-ah an sie. A taksa hi a hmawn ta hle a, underpant chau a bun a, ni 3 liemta vela thi ring a nih.

Kangmei tuorhai ṭhangpuina Rs. 1 lakh
IMPHAL: Majorkhul a kangmei rapthlak takel a suok leia an in a kang pek leia chengna ding in neilo, Majorkhul Community Hall-a relief camp-a khawsa mek hai ṭhangpuina dingin Thangmeiband Assembly Constituency MLA, Joykishan chun Rs. 1,00,000/- a pek. June 24, 2014 nia kangmei hi suok a ni a, In 13 a kang a nih.

International Day Against Drugs Abuse
IMPHAL: Social Welfare Department le FINGODAP, Manipur Chapter huoihawtnain zanikhan State Level in Kangshang, Khuman Lampak, Imphal-ah International Day Against Drugs Abuse and Illicit Trafficking hmang a nih. Hi huna hin Social Welfare Minister A.K.Mirabhai khuollienin a ṭhang. Iboyaima Shumang Leela Shanglen, Palace Compound a khawm hmang a ni a, Deputy CM Gaikhangam khuollienin a ṭhang.

Thirse lakhawmtu kap hlum
IMPHAL: June 25, 2014 zan dar 8:45 vel khan Thirse lakhawmtu Md. Maniruddin (30) of West Bengal chu Uripok Khoisnam Leikai-a a chengna in tuolah tu ti hrietlo han an kap hlum. Md. Maniruddin hi RIMS panpui a ni a, sienkhawm damzo lovin hi zan ma 9:30PM velin RIMS ah a thi a nih.

Imphal West District ah Cr.P.C.
IMPHAL: District Magistrate, Imphal West chun zani zantieng dar 5 a inthawk khan thuthar um nawk hmakhata dingin Imphal West District pumpuiah Cr.P.C. 144 puong.

Zawng 10 Imphal Khawpuiah
IMPHAL: Mahabali forest a Zawng um hai laia 10 chu Imphal khawpui sungah hungin an invak vel. An umna hmuna mihriem an um leia umna ding invai leia hung suok an nih tiin People’s For Animal, Thoubal chun an hril.

NATIONAL NEWS:
Mizoram-ah Heroin gram 63.5 le mi 1 man
AIZAWL: Mizoram Excise & Narcotic Department (END), Anti-Narcotic Squad hai chun zani zingkar 6:30AM khan Heroin grams 63.5 leh mi pakhat Lalthanvula (50) s/o (L) Tlangruala of Bawngkawn, (Red Rose), Aizawl an man. Heroin hai hi sabawn bawm 4-a thun niin Ṭiau a inthawk Maxi Cab a hung phur a nih. Heroin neitu Lalthanvula hi Excise & Narcotics Department chun Section 21 (b) of The Narcotic Drugs & Psychotripic Substances Act (NDPS Act) hnuoia case an siem khum a, Court hmaa inlangtir a ni hnungin Court in a rel angin Judicial Custody ( Central jail) a thun nghal anih.

Mizoram Assembly Budget Session
AIZAWL: Mizoram Assembly Budget Session ni 3 sung aw ding chu July 8, 2014 ah ṭan ning a tih. July 8, 2014 ah Finance Minsiter Pu Lalsawta in Vote on Acount, August thlaa inthawka thla iemanizat sunga sawrkar sum hmang ding inpuiah phar a ta, July 9, 2014 ah hriltlang ning a ta, July 10, 2014 in ngaituo dinga sawrkar thil pawimaw lut hai ngaituo

Mizoramah Vawk 243 that
AIZAWL: Tulai hin Mizoramah Vawk natna hri Porcine Reproductive and Respiratory Syndrome (PRRS) natna hri nasa takin an leng leiin Vawk 243 thata phum hmang an ni tah. Mizoramah Vawk 2.5 lakh vel an um a, hienghai laia 75% chu PRRS natna invawi an nih tiin Dr L.B. Sailo, Director, Animal Husbandary and Veterinary Department, Govt. of Mizoram chun a hril.

Nagaland Governor an ban
NEW DELHI: Nagaland Governor Dr Ashwini Kumar (63) chun June 25, 2014 zingkar khan Nagaland Governor a inthawka an banna lekha President kuomah pein Shimla a pan nghal. Kumar hi IPS Officer pension, Director, CBI sin lo chel ta a nih. A ma hma hin UP Governor, B.L. Joshi le Chhattisgarh Governor Shekhar Dutt hai an lo inban ta bawk a nih.

Journalist 6 hai kuoma ṭhangpuina
GUWAHATI: Zani hmasa khan Basanta Das, Minister of State (Independent charge), Information & Public Relations chun Journalists 6 hai kuoma Journalist’s Medical Welfare Scheme hnuoiah ṭhangpuina a pek. Chandra Kumar Baruah le Md. Safiqur Rahman hai kuoma Rs. 50,000 cheques le Lalit Sharma kuoma Rs. 25,000 cheque an hlan. Sajib Hazarika le Pranab Kumar hai chu Rs. 50,000 cheque an hlan a, Sankar Lashkar chu Rs. 1,00,000 pek dinga ti a ni a, hi huna a ṭhang theinaw leiin ama aiawa a tirhai kuoma inhlan a nih.

Sonia, Rahul le midanghai Court hmaa inlang dingin
NEW DELHI: Delhi Metropolitan Magistrate, Gomati Manocha chun zanikhan inhlemna le pawisa hmang indiknawna chungthuah AICC President Sonia Gandhi; AICc Vice President Rahul Bandhi; AICC Treasurer Moti Lal Vohra, General Secretary Oscar Fernandes, Suman Dubey, Sam Pitroda le Young Indian Ltd. Directors hai chu August 7, 2014 a Court hmaa inlang dingin a ko tawl.

BJP poll fund a pawisa thawlawm tam tak
NEW DELHI: Election a hmang dinga BJP ta dinga pawisa thawlawm tam tak (contributor) chu Industrialist Aditya Birla a ni a, kum 2012-13 a General Election Trust-ah Rs. 7.5 crore a thawlawm a, kum 2004-05 le 2011-12 haiah Rs. 26.6 crore a thawlawm niin ei thu dawngna chun a hril. Congress party ta dinga pawisa thawlawm tam tak chu Tata Group a ni a, Rs. 10 crore a thawlawm a hril a nih.

Pasal 4 in ran natna an invawi
KORAPUT: Koraput District a chun pasal 5 in ran natna hri an invawi leiin Lamataput Hospital panpui an nih. Ran natna invawi hai chu Hari Bhagatayat (55), Sunadhar Sisa (45), Bulu Kirsani (48) le Samara Sisa (30) of Lagum hai an nih. Ni iemanizat liemta khan Kel damnaw le khawsik an that a, a sa an fak leia ran natna hi an invawi ni dinga ringhla a nih.

LPG le K.Oil man sukpung lo ding
NEW DELHI: LPG le Khawnvartui (K.Oil) man sukpung dinga rawtna Petroleum Ministry a inthawk a um naw a, tu hri hin chu LPG le Khawnvartui man sukpung ninaw nih tiin sawrkar thlungpui chun hrilfiena a siem.

Minister thar dingin Jadhav
MUMBAI: Zanikhan Bhaskar Jadhav chu Maharashtra Cabinet Minister dingin an Governor, K. Sankaranaryanan hmaah sesamna a nei. Jhadhav hi Water Resources chanvo pek a ni a, minister a ninaa inthawka inban Sunil Tatkare hmun a huuo a nih. Sunil hi Maharashtra state NCP President a ruot a nih.

Tripura-ah e-Rickshaw-hai licence
AGARTALA: Tripura sawrkar chun an state a battery hmanga tlan Rickshaw or e-Rickshaw hai chu Registration thaw le licence pek a tum. Licence fee Rs. 300, license renewal fee Rs. 100, Registration fee Rs. 1,000, Certificate fe Rs. 1,000 le Annual Road tax Rs. 100 lak a tum. E-Rickhaw a hin mi 4 an chuong thei a nih.

PMO Director dingin Selvakumar
NEW DELHI: Zanikhan PMO chun senior IAS Officer, S. Selvakumar, 1997 batch, Karnataka Cadre chu Director, Prime Minister’s Office (PMO) dingin a ruot. Selvakumar hi Managing Director, Karnataka Power Transmission Corporation Ltd sin chel lai mek a nih.

Garo Hills ah mi 5 ṭhuoihmang
TURA: Zani hmasa khan Meghalaya State a Garo Hills a Dadengre town-ah silai chawi, GNLA ni dinga ringhla han mi 4, Gulu Sheikh, Shah Alom, Ajgar Ali le Musaddar Ali hai chu an ṭhuoihmang. Mi 4 hai hi sumdawng naran an ni a, kuva ra inchaw dinga fe, zing dar 7 vela man le ṭhuoihmang an nih tiin Police thusuok chun a hril.

Minister-hai Car thar inchaw lo dingin
NEW DELHI: Prime Minister Narendra Modi chun Union Minister-hai chu Car thar inchaw lo dingin an hriettir. Chun, Union Minister-hai chu Rs. 1,00,000 le a chungtieng hmang ṭulna a um chun Prime Minister’s Office (PMO) remtina le pawmpuina la hlak dingin Modi chun an hriettir bawk.

Assam tuilien leiin mi 8000 in an In hai an suoksan
GUWAHATI: Assam State a Districts 5, Sonitpur, Lakhimpur, Darrang, Kamrup le Udalguri haiah tui a lien a, mi 20,000 velin harsatna an tuok pha bakah mi 8,000 vel hai chu an In haia tui a lut leiin an In hai an suoksan tawl. Sawrkarin Relief camps 5- Darrang district-ah 4 le Udalguri district-ah pakhat a hawng.

Bihar Budget Session vawisun
PATNA: Bihar Assembly Budget Session chu vawisun hin ṭan ning a tih. Finance Minister Bijendra Prasad Yadav chun June 30, 2014 in 2014-15 Budget Assembly-ah phar a ta, Budget session sung hin sittings vawi 24 um a ta, July 31, 2014 ah zo ning a tih. Opposition BJP hai chun law and order chungthu le electric power ngirhmun hai session huna hin an khekpui ring a nih.


SPORTS AND ENTERTAINMENT:
35 National Games Kerala hmuna nei ding
NEW DELHI: 35th National Games chu January 31- February 14, 2015 inkar sungin Kerala hmuna nei ning a tih. National Games nei hun ding hi zanita Indian Olympic Association President N. Ramachandran in Thiruvananthapuram hmuna a puong a nih. National Games nei hun ding puong huna hin Union Minister for sports and Youth Affairs, Sarbanand Sonowal khawm a ṭhang. Kerala CM Oommen Chandy chun, mi 5000 um theina ding National Games Village bawlna chu zo ṭep a nit ah tiin a hril a, National Games a ding hin centre chun Rs. 120 crores hmang dingin a pek thu a hril bawk.

FIFA in Suarez thla 4 sung ban a puong: Nigeria le Switzerland an lut 
RIO DE JANEIRO: Italian defender Giorgio Chiellini a se leiin FIFA chun Uruguay striker Luis Suarez chu international matches 9 khel thei lo ding le thla 4 sung football khel thei lo dingin a ban. Hi baka hin fine Swiss francs 100,000 (US dollar111,000) chawi dingin thiemnaw an changtir. Hi thil hi Group D match-a Uruguay le Italy hai inkhel tawp na ding minutes 10 chau um taa tlung a nih. Uruguay in Italy chu 1-0 a hnein FIFA World Cup 2014 round of 16 an lut a, sienkhawm FIFA in a ban lei hin tukum World Cup sung hin Suarez chu an khel thei tanaw ding bakah Premier League seasion ṭan hlim chun a khel thei venaw ding a nih. Fifa displinary committee a chairman, Claudio Sulser chun, hiengang thil hi ngaidam thei a ni nawh tiin a hril. FIFA chun Suarez hi football an khel a khap (ban) el chau ni lovin World Cup inkhelna stadium khawm lut a khap pek a nih. Suarez hi nau pahni nei ta a ni a, mi a se leia football inkhel ban-a a um vawi thumna a nitah.

***Argentina chun Nigeria 3-2 a hnein Group-F ah point hmu insang tak an ni a, Nigeria chu Argentina in hne sien khawm Group F-a point 1 hmutah Iran chun Bosnia and Herzegovania lakah 1-3 a a hnenaw leiin round of 16 (knock out) a lut ve. Argentina hi knock-out stage lut tasa a nih. Group-E ah round of 16 lut tasa France chun point 3 hmutah Ecuador 0-0 in an draw pui a. Hi lei hin Switzerland chun Honduras 3-0 a hnea points 6 hmuin second round (knock-out) a lut ve. June 30, 2014, 9:30PM khin round of 16-ah France le Nigeria inpet an ta, Argentina chun July 1, 2014, 9:30PM in Switzerland inhmasawn pui ve thung a tih. Round of 16 (knock-out) chu June 28, 2014 a inthawk inkhel ṭan ning a ta, hi zan 9:30PM in Group –A a hrat tak Brazil le Group-B a hrattak dawt Chile hai inkhel an tih. June 29, 2014, 1:30AM in Group C-a hrat tak Columbia le Group D-a hrattak dawttu Uruguay hai inkhel an ta, 9:30PM in Group B-a hrat tak Netherlands le Group B-a hrattak dawt Mexico hai inhmasawn pui an tih.

Shah Rukh kuoma France in award
NEW DELHI: France chun Bollywood actor Shah Rukh Khan chu France chawimawina insang takel Officier de la Legion d’Honneur (Officer of the Legion of Honour) inhlan a tum. French Foreign minister Laurent Fabius chu kar thar khin Mumbai hmuna hung inzin a ta, chu huna award hi Shah Rukh kuoma an hlan ding a nih. Bollywood actor Amitabh Bachchan chu kum 2007 khan hiengang chawimawina hi Frence in a lo inhlan ta bakah India mi hlasakthiem Lata Mangeshkar le Satyajit Ray hai khawm inhlan an lo nitah. Fabius hi ni 3 sung cham dingin June 30, 2014 khin India rama hung inzin a ta, India foreign minister Sushma Swaraj khawm inhmupui a tih.


PRESS RELEASE

HMAR INPUI
General Headquarters
June 26, 2014

Hmar Inpui General Headquarters chun Joint Secretary dingin Pu Ramsangthang (Pherzawl/Rengkai) le Pu Lalhmingthang (Tuisen/Jiribam) hai a ruot a. Pu Ramsangthang in Tuiṭhaphai, Hmarram le Imphal Region hai enkai a ta; Pu Lalhmingthangin Vangai, Jiribam le Barak Valley Region hai enkai thung a tih. Region zieklanga um hai po po hi thunawk um hma po chu Hmar Inpui General Headquarters in la khai hri dinga rel a lo ni tah.

Sd/- David Buhril
General Secretary.


VAWISUN THUPUI
Aw Lalpa, nangin nguntakin i mi en suok a, i mi hriet tah; Nangin ka ṭhung le ka ngîr hi i hriet hlak a, Ka ngaituona hi hlataka inthawk khawmin i hriet thiem hlak. - Sâm 139:1-2

EDITORIAL:
Fimkhur hle ding a nih

Churachandpur town sunga dawr chi tum tum haia thil man hi inang lo tak takel a nih. Thil inang char khawm a man hi Rs. 5 vel chau khawm ni lo, Rs. 100 zet damin an thlau hlak a nih. Hieng a ni lei hin taimak le fimkhur a ṭul hle. Thil inchawk ding chun dawr pakhata inchawk nghal lova dawr a tam thei ang takah lut a, thil man indawn a, a man tlawmna taka inchawk hlak ding a nih. Sum hmusuok hi a harsa hle leiin hmang thiem, inret le inro hlie hlie ding a nih. Thil man hi a tlangpuiin Vai dawrah an man lem. Hieng a ni lei hin mani mi le sa hai dawr nuom hle inlakhawm Vai dawrkaihai dawr an ṭul hlak.

Thuomhnaw hi a hlawp ( wholesale) a lak chun Vai mahajon hai zawrna rate a dawr thuomhnaw hi zawr thei a nih. Amiruokchu, ei ni tlangmihai hin chu a hlawk hmu ṭeu nghal ei tum leia thil man hi ei sukto a, Vai sumdawnghai zawrna rate anga ei zawr theinaw niin an lang. Vai sumdawnghai chun a hlawk tlawm sienkhawm ni khatah tam tak zawr suok chu an thiltum a nih. Thil zawr suok rawn a ni phawt chun a hlawk a hung tam el hlak. Sumdawngna tiengpanga hin chu Vaihai ei tluk naw nasa taluo a, Vai sumdawnghai thaw dan hi entawn ding a nih.

Vai sumdawnghai hi mi welcome an thiem a, an bau a zang a, an bengvar leiin Customer-hai an hip thei hle hlak. An dawra thil inchaw dinga fe hai hrim hrim chu mimawl le ṭawp em em el khawm nihai sienla ka pi, ka pu tiin an mi ko thei vawng. An lungril takin minza nawhai sienkhawm customer-hai an inzaderna kha an sum hmuna le an hausakna chabi a nih ti an hriet tlat leiin pawi an ti naw hrim hrim. Ei ni rawi chu mimawl le mi ṭawp deu hai chu biek ding tina khawm ei tin nawh. Kristien, Pathien tak bie le piengthar khawm inti inla ei suol em em a, Pathien mi le piengthar ei nina hmel an lang thei ngai nawh.

Damnaw le mirethei, ṭhangpui ngai nia inhril, Home le fahra enkawlna hmuna thawk anga inhril, pawl hminga thil zawr le sawmdawlna khawn, Gas siem thiem le thil zawr anga mi in a lut ei ni lai khawm an tam ta hle. Hiengang mihai lai hin a tak le ṭhangpui ngai an um chang um a tih. Amiruokchu, a tehlem an tamlem ring a um. A tak le a tehlem an ni le ninaw fie hmasak a ṭha. Ei rama hiengang thil hi a tlung ta hlak a, a la tlung pei ding a nih. Hiengang mihai lakah hin ei fimkhur hle a ṭul.

Gas siem thiem nia inhril le thil zawr nia inhrila mi in a lut lawr hai lai hin rukru an um hlak a, thil an inruk rawp ta hlak leiin hiengang mihai hi inzalentir lo le inhmaingaltir lo a ṭha. Chun, mi in ah an fe changin thil an inruk el naw khawmin mihai thil nei inruk ding an melkai a, hun remchang hmasa takah an va lenglutna hai in kha an rawk hlak. Hieng hi ei tulai ngirhmun an ta leiin hmel hriet lo hai hi chu mani insunga inluttir lo a ṭha tak.

Ei rama kutdaw an um ei hriet ngai naw a. Tulai ruok hin chu ei rama khawm kutdaw an um ve an ta hi! Kawtthler haia chen khawm kutdaw ngam an um ta a nih. Hieng kutdaw ei tihai hi Vai rama kutdaw ei tihai angin mihai hmaah an kut va daw em nawhai sienkhawm pawisa ka mamaw thut annawleh ka pawisa paiin a dai naw a, pawisa mi lo inhmangtir ta, titu hi an inkat nuk el ta a nih. Hiengang mihai hin an pawisa lak hi an thungkir nawk ta ngai nawh. Kutdaw leh angkhat an nih. Kutdaw kuoma pawisa le thil ei pek hai hrim hrim tukhawma hmukir nawk ei tum ngai nawh. Kutdaw lungril iengleia ei put ngam el am ni tang a ta?

Aizawl-ah ramsa hro zor Senvon mi man

Aizawl, June 27, 2014 (Tlangsam) : Mizoram-a Forest Protection Division-a Protection Squad hai chun zani khan Aizawl New Market-ah Lalfamkimi w/o Laltinthang (Senvon, Manipur) chu a khar sawng tum ramsa hro ṭhahnem tawk tak leh man niin ei thu lakna chun a hril.

Lalfamkimi hin ramsa hro chu midang kuomah inkhartir a tum ni a hril a ni a, a khar sawngna ding hai kuoma a pek hma’n hieng sahro hai hi man pek a nih. Ama hi Court-ah fepui a ni a, Wildlife (Protection) Act, 1972 dan hmangin thubuoi siem pek nghal a nih.

Hieng ramsa hro an i man hai hi, Court-in phalna a pek angin, Protection Squad hai chu zani chawhnung khan DCF (Wildlife) Aizawl office kot-ah an zor zo nghal niin ei thu lakna chun a hril bawk.

Forest department hotuhai chun ramsa hro zor sawng hlak, nuhmei ṭhenkhat hai hin ramsa hro zor hi danin a phalnaw ti khom an hriet naw thu an hril a; hmeruo zor hlak nuhmei hai kuoma chun ramsa hro zor leiin Jail-a intang thei ani ti hre a, ramsa hro zor talo dingin an incha bok a nih.

Forest department hotuhai chun, ramsa hro zor hlak hai hi sa hrisel lo tak tak dam an nii hlak leiin mipui khom fimkhur a, ramsa hro an hung zor khomin lo inchaw pek talo dingin mipui kuomah ngenna a siem bok a nih.

Protection Squad hai chun tukum 2014 sung sahro zor lai ṭum thum an man taa, hieng an mi man hai anthokin Rs. 40,000 vel an lo inchawitir ta bok a nih. Nikum 2013 sung khan ramsa hro zor mi 3 lai man an ni bok a nih.

Hmasawnna Thar | June 26, 2014

HEADLINES:
Rel eksidenah mi 4 an thi, mi 18 an hliem;
Mithi sunghai kuoma zangnadawmna Rs. 2,00,000 seng pek ding
CHAPRA/NEW DELHI: Zani zingkar dar 2 vel khan Delhi pana fe Delhi-Dibrugarh Rajdhani Express Rel chu Bihar-a Chapra bul, Golden Ganj station ah lampui hraw ṭhelin a eksiden a, Rel pindan 12 a tlu a, passengers 4 an thi bakah passenger dang 18 an hliem. Rel lampuia hin thil puok ri hriet a ni a, chu thil chun Rel hi an eksiden tir ni dinga ring a nih tiin Arunendra Kumar, Chairman, Railway Board chun a hril. Maoist helpawlhai chun zanikhan bandh an thaw a, hi lei hin Maoist helpawlhai bomb sukpuok leia Rel hi eksiden ni dingin Railways chun an ringhla thu an hril.

Railways chun Rel eksiden nasan suia enquiry thaw dingin Order an suo a, enquiry thawtu dingin Commissioner, Railway Safety, Eastern Circle ruot a nih. Mi 4 thi hai laia 3 hai chu a hmuna thi an ni a, pakhat chu Hospital phurtlung a ni hnunga thi a nih tiin Arvind Kumar Rajak, Chief Public Relation Officer, East Central Railways chun a hril. Rel pindan kawidar hlek ṭhenkhat chu Rel lampuia inthawka feet 700 vela hlaah an um tiin Rajak chun a hril. Union Railway Minister Sadanand Gowda le Union Minister of State for Railways, Manoj Sinha han hi thil tlung an hriet le inruolin D.P. Pandey, Railway Board Member (Traffic) le Alok Johri, Railway Board member (mechanical) hai ṭhuoiin Rel eksiden na hmun an pan nghal. Union Railway Minister, Sadananda Gowda chun, Rel eksiden leia thina tuok sungkuohai chu zangnadawmna Rs. 2,00,000 seng; hliem inrikhai kuoma ṭhangpuina Rs. 1,00,000 seng le hliemna rak lo hai kuoma ṭhangpuina Rs. 20,000 seng pek ning an tih tiin a puong. Gowda chun, Rel eksiden leia thi le hliemna tuok an um chu pawi a ti thu, mithi sungkuohai a sunpui thu le hliem hai a tuorpui thu hrilin, hliemhai chu duot tak le ṭha taka enkawl dingin Railway Administration an hriettir.

 Bihar State sawrkar chun thina tuok sunghai chu zangnadawmna Rs. 50,000 seng le hliemhai chu a thlawna a enkawl ding thu a puong. Rel eksiden lei hin Rel 23 hai chu lampui danga infetir le Rel 49 cancelled an nih. BJP ṭhuoitu le Saran MP, Rajiv Pratap Reddy chun Rel eksidenna hmun hi a va sir. Union Home Minister Rajnath Singh chun Rel eksidenna thua hin Maoist helpawlhai intum nghal el chu a lan hma deu tiin a hril.  Chun, zanikhan Motihari, East Champaran District a khawm thil phurtu Rel a eksiden a, mihriem thile hliem an um naw a, thil phurna Wagons 18 zet a tlu tiin Arunendra Kumar chun a hril.

KKL Silver Jubilee hmang
CCPUR: Zani 11:00AM khan M. Songgel Community Hall, CCPur-ah Kuki Khanglai Lawmpi (KKL)

GHQ Silver Jubilee hmang a nih. Hi huna hin Pu T.N. Haokip, MLA, Saikawt A/C khuollienin a ṭhang a, Pu Langkhanpau Guite, Chairman, ADCC le Pi Hatlhing, MDC, Phaitual, Tamenglong hai chu functional president le guest of honour in an ṭhang. Pu T.N. Haokip chun, KKL in ṭhangpui le sawmdawl ngaihai tlawmngai taka an sawmdawlna chunga lawmum a ti thu a hril a. Mitin el hai chu mani kawl le kienga um hai le inrem le inhmangai taka chengtlang dingin a fiel bakah Pathienin KKL hai chu an hma
ṭhuoi pei dingin ditsakna an hlan.

LOCAL NEWS:
IB Road lampui khar ding 
CCPUR: Presbyterian Kohran, Lamka in Prebyterian Biekin, IB Road-a June 26-27, 2014 sunga ‘Min Hruai Zel ṭhin” ti thupui hmanga KṬP Diamond Jubilee an hmang ding le inzawmin June 27, 2015, zing dar 8AM a inthawk IB Road lampui khar a ni ding a nih. Hi lei hin a tunga tlan ding han Tiddim Road a inthawk Thangzam Road a lut le Laitui Dawr tuola suok le Tiddim Road lut nawk ding a ni a, A suka tlan ding han Red Cross Road a inthawk Tiddim Road an lut a ṭul ding a nih.

HSA Platinum Literary Competition
CCPUR: June 28, 2014, 11AM khin H.L. Daka Memorial Hall, HSA Campus, Rengkai, CCPur-ah HSA Platinum Jubilee Launching- cum- HL Daka Memorial Hall Dedication-cum- HSA Platinum Literary Competition um a ta, Essay, Drawing le Painting haia inruolsiekna um a tih. Chief Guest in Pu P.K. Jha, IAS, Deputy Commissioner, CCPur ṭhang a tih.

ZYA in Heroin No. 4 an man
CCPUR: ZYA chun kum 2014-15 kumpuong “Khamthei doudal Kum” ti bawzuinain June 24, 2014, 10:00AM khan New Zoveng (Kanan Veng) a um Ms Nengboi chu an ina inthawk Inruithei Heroin No. 4 leh an man a, ram le hnam hmelma inruithei zawrtu hai chu an dem thu an puong. Inruithei man a ni le inzawma an suizuinaah ama ṭhangpui le thlawptu ṭha tak an um ti hrietsuoka um chu pawi an ti thu ZYA chun an puong bawk. Tuta hnung chu inruithei zawrtu hai hi Law enforcement authority tieng nisien, tax laa ṭhangpuitu ni lovaram le hnam ta dinga sinthaw le right thinking citizen le security hai chu inruithei dodalna kawnga ṭhangpui le thlawp dingin Secretary, Information and Publicity, ZYA chun ngenna a siem.

Vacation Bible School
CCPUR: NSSU Phairam District RPCNEI chun June 26-28, 2014 inkar sung hin Childrens Home, Saikawt-ah Vacation Bible School-cum-Games & Sport huoihawt an tih. Hi huna hin Nursery a inthawk Senior chen hai a nuom taphawt ṭhang dinga fiel an nih. A ṭhang ding hai chun Registration fee Rs. 10, Bible le Note book hai chawi ding a nih.

NYC Volunteers interview result
CCPUR: NYK, CCPur hnuoia National Youth Corps (NYC) Volunteers lakna dinga interview, Mr Maniram Sharma, Addl. DC, CCPur office chamber-ah nei a ni a. Hnina petu mithar 63 le NYC ni lai mek 22 um hai lai a thar (Fresh NYCs) dingin mi 10 le a hlui (extended NYCs) 12 Selection Committee in an thlangsuok hai chu DC -cum, District Advisority Committee on DACYP, CCPur in a pawmpui. Hi dungzuia mi thar lak hai chu Pincky Lamneikim, Paolienthang Singson, Lalthatling, Pausuanmang, Jamminthang Baite, Chinneilhing Baite, Khamkholal Khongsai, Nemneikim Haokip,Chinneilam Haokip le Mangcha Singson hai an ni a, a hlui, an hun keisei pek hai chu Nianbiaklun, T. Kapjonpau Simte, Betsy Zarzofamkim, ST Lallem Vaiphei, Thanglenmang Haokip, Florence Chinghoikim, Thangkhogin Doungel, Esther Nenghoichong, K.Lucy Aimol, Hoineivah, Themboikim Kipgen le Kimkhohat hai an ni a, ani baka hin waiting list-ah mi 3 sie an nih. NYCs a lak hai hin thla khatah Rs. 2500 hlawng an tih.

Tunkhopum Baite Panglian khuoa vui
CCPUR: Chin Liberation Army (CLA) chief General Tunkhopum Baite ruong chu zani 9:30AM khan CCPur hung phurtlung a ni a, Ngathal- a an inpui tak a upa (L) Ginsianmang Baite in-ah a ruong hi laklut a ni a, hi huna hin a ruong chodawknaa hang ṭhang Vungthang, Adviser, CLA in report a pek.

Hi huna programme hmang zo hin Singngat A/C sunga Panglian khuo tieng panpui le zani ma khan Panglian khuoah puithu taka vuiliem a nih. General Tunkhopum hi Feb. 5, 1967 a kum 47 mi a ni hun, Laldenga hun laia MNF han an that le a ruong umna hriet lova um a ni a. June 17, 2014 khan a ruong ni dinga ring hi hmu le chodawka Manipur tienga hung phur a nih.

Intl. Day Against Drugs Abuse hmang
CCPUR: Zani 11:00AM khan Lametnamun-RRCA, LRRC hmuna Make Health your “New High” in life, not Drugs ti thupui hmangin International Day Against Drugs Abuse and Illicit Trafficking hmang a nih. Hi huna hin H. Mangchinkhup, EM, ADCC khuollienin a ṭhang a, Dr F. Thienkhogin, DACO, CCPur functional President in a ṭhang.

Bungheia ṭawngṭairuolna
CCPUR: Women Prayer Fellowship, CCPur hmalaknain June 28, 2014, 7:00AM - 12Noon inkar sungin ECA Church, Bijang-ah bungheia ṭawngṭairuolna um a ta, programme hi Pastor Red. H. Nengzatun, ZPCS in hawng a tih. Inhnikna nei taphawt hi huna ṭhang dingin Women Prayer Fellowship, CCPur chun fielna a siem.

DDMA meeting
CCPUR: June 27, 2015, 11:30AM khin DC Office-a BRGF Resource Centre-ah Mr P.K. Jha, IAS, DC, CCPur inrawinain District Disaster Management Authority meeting um a tih. Hi huna hin SDOs; SP, CCPur; CMO, CCPur; EE/PWD; EE/IFCD; CEO, ADCC le District Supply Officer hai ṭhang an tih.

AIR, CCPur stn. Prog.
CCPUR: Vawisuna AIR, CCPur station-a Paite programme a chun V. Paukhansiam in hla sak a ta, sin ruok puong ning a tih. Hmar programme a chun hla thlang le sin ruok puong ning a ta, Jocelyn Lalhrietzing in “Drugs Abuse and Its remedies” ti thupui hmangin thu hril a tih. Thadou programme a chun Paohen Haokip in hla sak a ta, sin ruok puong ning a tih.

IMPHAL NEWS:
Sanjenthong leilak siemna 30% zo
IMPHAL: Sanjenthong leilak siem mek chu zo dinga hun ruot hmaa zo ning a tih tih. Tuhin leilak siemna sin 100 ah 30 zo a ni ta a, November thlaa Sangai Festival nei hma ngeia zo ning a tih. Tuhin sun le zan chawl lovin darkar 24 sung leilak siemna sin thaw zing a nih. Leilak siemna ding hmangruo hai chu tuta thla sung hin Imphal hungtlung an tih. Leilak siemna sin hi Kolkata a um Construction Company pakhat kuoma pek a nih tiin zanita Imphal-a Works Minister Dr Kh. Ratankumar in Chanchinbumihai an hmupui huna a hril.

Jiribam a Schools le Office hai khar 
JIRIBAM: State sawrkarin thaw pek dinga a tiem hai a thaw pek naw leiin Jiribam a student bodies 4 hai chun Jiribam a Govt. Offices, Private Schools le Govt. Schols hai chu an khar ṭan. Hi thil hi hun tiemchin um lo ding niin an hril.

World Ward-II Memorial Service
IMPHAL: Vawisun hin Imphal Indian War Cemetry, Hatta le Imphal War Cemetry, Dewlaland haiah World War-II Memorial Service nei ning a tih. Programme zing dar 9:30 in ṭan ning a tih. Governor V.K. Duggal le CM O.Ibobi Singh han Memorial Service hi ṭhuoi an tih. World War-II a battle of Imphal a kum 70 tlingna le inzawma hi hunser hi hmang ding a nih.

Patsoi A/C sungah darkar 24 bandh
IMPHAL: Police Sub-Inspector M. Krishnadas thattuhai man dinga ngennain hi thina thu le inzawma JAC chun vawisun hin Patsoi Assembly Constituency sungah darkar 24 sung bandh thaw an tum thu an puonglang. Zani khawm khan Sangaiprou le Lukram Leirak haiah lampui an dang.

Mi 200 chuong Relief Camp-ah
IMPHAL: Majorkhul, Imphala kangmei suok leia an In a kang mi 200 chuong hai chu Majorkhul Community Halla Relief Camp-ah an khawsa mek. Relief Camp a um hai hi Majorkhul Relief Committee in an enkawl a nih.

NATIONAL NEWS:
July 7 hmain Governor dinghai
NEW DELHI: NDA sawrkar chun Parliament Budget Session hma ngeiin Governor thar dinghai hming (first list) puonglang a tum. Parliament budget session hi July 7, 2014 a ṭan ding a nih. Governor a ruot dinga hril rikhai chu, UP Speaker hlui Kesarinath Tripathi, Punjab BJP ṭhuoitu Balram Das Tandon, MP hlui Lalji Tandon, Kerala BJP ṭhuoitu O. Rajagopal, Union Minister hlui Ram Naik, Delhi BJP ṭhuoitu V.K. Malhotra, Finance Minister hlui Yashwant Sinha le UP CM hlui Kalyan Singh hai an nih. Governor ni laimek, UPA sawrkarin a lo ruot, M.K. Narayanan, K. Sankaranarayanan, Sheila Dikshit, Kamla Beniwal le Margaret Alva hai chu Home Secretary, Anil Goswamy in tuta hma deua inban dinga a lo inhriettir ta an ni a, sienkhawm an lan ban tawl nawh. UP Governor, B.L. Joshi le Chhattisgarh Governor Shekhar Dutt hai chu an inban ta a nih.

Sushma Swaraj Bangladesh-ah
NEW DELHI: Bangladesh a ni 2 sung cham dingin External Affairs Minister Sushma Swaraj chun zanikhan
New Delhi suoksanin Dhaka a pan. Dhaka khawpuia a cham sungin Bangladesh Foreign Minisiter, Abdul Hassan Mahmood Ali, President, Abdul Hamid le PM Sheik Hasina hai inhmupui a ta, ram pahnihai inlaichinna chung thu, Land boundary Agreement le Teesta Water Sharing Agreement thuhai hriltlang an tih.

West Bengal ah District thar
ALIPURDUAR: Zanikhan West Bengal State a North Bengal a Dooars Regionah District thar, Alipurduar District chu West Bengal CM, Mamata Banerjee in a hawng. West Bengal a Districts 20-na a nih.

Congress le NC an inṭhe ta ding
NEW DELHI: Kum 6 zet el Jammu & Kashmir ah Congress Party le National Conference (NC) hai an ṭhangruol hnungin an inṭhe ta ding nia hril a nih. Tu kum kum tawp tieng hin Jammu & Kashmir Assembly election a um ding a ni a, chu huna khawm a hran ve ve a candidate nei an tum ta nia hril a nih. PDP khawma ṭhangruolpui nei lova an party mala candidate nei an tum.

LPG le Khawnvartui man a kaisang el thei
NEW DELHI: Khawvel pumpui huopa thautui thlitfim lo man a kaisang leiin LPG man chu Cylinder pakhatah Rs. 5 pei le Khawnvartui man chu litre khatah Re. 1 peiin a kaisang el theia hril a nih. Thautui thlitfim lo man chu tuhin barrel khatah USD 115 a nih. LPG man hi thla tina Rs. 5 peia pung dinga hril a nih.

BJP thatnaa hmang Pistol dapdawk
MUZAFFARNAGAR: June 10, 2014 nia Mirapur town Unit BJP vice President Om Vir Singh kap hlumnaa hmang Pistol chu hi tuolthatna le inzawma intum Monu man a ni hnungin Police han dapdawkin an man. Kum 47 a upa Om Vir Singh hi Army pensioner a nih.

Mi 2 kap hliem an nih
KOHIMA: Nagaland le Assam ramri buoina chu a la fe pei a, June 23, 2014 khan tu ti hriet lo han Assam rama inthawk Muzzle Loading Gun hmangin Nagaland tieng an hung kap a, Dikoi khuo mi ve ve, Neilakholie (21) le Ruopfuvituo (23) hai an kap hliem a, District Hospital, Dimapur panpui an nih.

Peshawar Airport a PIA kap, mi 1 a thi
PESHAWAR: Zani hmasa zan khan tu ti hrietlo han Peshawar Airport a Pakistan International Airlines (PIA), passengers 180 phurtu, Riyadh, Saudi Arabia a inthawka Peshawar a hung ṭum chu silaia kap a ni a, mi 1 an kap hlum a, midang 2 an hliem. Kap hluma um hi nuhmei passenger le hliem 2 hai khawm hi vuongnaa chuong nia hril a nih.

Saiip sungh nupui thisa ruong
NEW DELHI: June 24, 2014 ni khan Neetu (23) w/o Om Prakash of Ghaziabad, Uttar Pradesh chu Saiip sungah a thisain Mayur Vihar Metro station bula hmu a nih. Police han hi thina thu an suizuinaa chun Neetu hi a pasal in a that a nih ti an hrietsuok leiin Neetu pasal Om Prakash (26) chu June 24, 2014 khan Police han an man nghal. Om Prakash chun a nuhmei hi June 21, 2014 ni khan Noida hmuna va hmu dingin a hril a, a va hmu naw leia lungsena a nuhmei hi a that niin Police kuoma an puong.

SPORTS:
Luis Suarez in Chiellii a sea intum: Columbia, Greece le Costa Rica hai an lut
RIO DE JANEIRO: Fifa World Cup khel mekah zani hmasa zan khan Uruguay forward Luis Suarez chu an khingpui Italy defender Giorgio Chiellini se-a intum a nih. Hi intumna thua hi Disciplinary Committee chun an suizui mek. Suarez hin a se ngei a nih ti sukchieng a ni chun inkhel vawihni-a ṭhang thei lo dinga ban/ thla hni sung khel thei lo dinga ban a ni el thei. Hi thua hin FIFA chun committee hai chu an thil hmu dan zani 5PM chena khan pelut dingin an hriettir a nih. Chiellini chun, ‘Luis Suarez in ka dar-ah a mi se pek a nih tiin an tum a nih. Suarez hin nikum Premier League khel huna khanChelsea player Branislav Ivanovic a se leiin games 10- a inkhel ban a lo nita bakah kum 2010 khan PSV Eindhoven player Otman Bakkal a se leiin games 7-ah ban a lo nita bawk a nih. Schoolof Psychology, University of New South Wales, Australia a senior lecturer, Eva Kimonis chun, naupang hun lai chun midang se hi a hluor a, puitling hnung ruok chun tamnaw hle a nih tiin a hril. Hi thil tlung lai video le thlalak hi internet a chun an lar hle a, a video internet-a thedar pakhat a chun, thaw pangpal ni lovin a se lui hrim niin an lang.

WC Group game khelna in a vawrtawp a tlung mek a, zani hmasa khan Columbia in Japan 4-1 a hnein Group C ah point hmu rawn tak niin round of 16 an lut a, Greece chun Ivory Coast 2-1 a hnein second round (group of 16) an lut bakah Costa Rica chun England 0-0 a in draw puiin second round an lut a, England chu World Cup 2014 a inthawk an petdawk. Uruguay chun points 3 hmutah Italy chu next round khel thei lo ding in a hneban bawk. Group C le D khel zo chena round of 16 (second round) lut ta hai chu- Group- A ah Brazil le Mexico; Group –B ah Netherlands le Chile; Group-C ah Columbia le Greece; Group D-ah Costa Rica le Uruguay hai an nih. Group G-a points 4 ve ve hmu Germany le USA hai chu kai le kainaw thei ve ve la niin an ngirhmun a la derthawng ve ve. Point 1 ve ve chau la hmu Ghana le Portugal hai chu vangnei leh a pakhat lem lem second round inhuotkai thei an ni bawk. Zani zan 9:30PM inkhela result dungzuiin an ngirhmun hi hrietchieng ning a tih. Group H-ah Belgium chu inkhel vawihniah points 6 hmuin kaisaa ngai thei a nita a, point 3 hmu Algeria bakah Points 1 ve ve hmu Russia le S. Korea hai ngirhmun ding chu June 27, 2014 1:30AM haia inkhel result dungzuiin an ngirhmun sukchieng le namghet ni tang a tih. Group game league round inkhel la nisien khawm an ta ding chun thi le dam inkar a ni leiin knock-out stage ang ngirhmuna um an ni tah. Group-H. inkhel zo June 28- ah second round (round of 16) knockout stage inkhel ṭan a nita ding a nih.

VAWISUN THUPUI
Lalpa chu ka nih, chu chu ka hming a nih; ka ropuina hi mi dang kuomah pe naw ningah a, inpâk ka hlawna hi milim siem fâwmhai kuomah pe bawk naw ning - Isai 42:8

EDITORIAL:
Mipui budget

Iemani hun sunga sum laklut le a hmangralna ding riruong hi budget chu a ni deu tak a. Mimalin budget ei nei a, sungkuoin budget ei nei a, khawtlang, kohran, educational institution le pawl hran hran hai khawmin budget ei nei a. Sawrkar thlungpui le State sawrkar hai khawmin budget an nei bawk. Sawrkar thlungpui le state budget hai hi mipui budget a ni a, chu budget chungchang chu Parliament le state Assembly budget session hung um dinga hin mipui aiawa roreltu dinga thlangtling han an hung hriltlang ding a nih. Mipuiin ieng budget am ei nei a ti chu ngaitha thei a ninaw a, mipui hin ei ngaiven em em el ding a nih. A san chu mipui sum hmang dan ding le hmu dan ding riruongna a ni mieu si leiin. Ei state budget a hin kut sinthawtuhai ta dingin ienganga sum hmang ding am ti le hmu dan ding riruong a ni a ti hi mipui han ei hriet chak tak a ni a ṭul a nih. State danga chun State budget phar a niin kut sinthawtu han nghakhla takin an lo thlir a, an chanpuol ding iengangin am sawrkarin a siem a ti hi Radio le TV haiah ngaiin an lo thlir ṭhup hlak. Ei ni rama ruok hin chu kut sinthawtu, sumdawng, corporation le pawl dang dang hai khawmin, budget in iengangin am a mi nghawng ding tiin nghakhla takin ei thlir ve hlak dim chu maw!

Manipur Assembly budget session khawm a hung um ding a ni a. Hi hun sung hin ieng thu thu am rel a ni a ti le iengang budget am siem a ni a ti hi mipui han ei ngaiven ve a hun ta hle a nih. Mipui dit dan le lawm zawng budget siem a ni theina dinga ṭhangruola hma ei lak a ṭul. Nawr a ṭul leh nawr ngam ei inhuom a ṭul a nih.

Parliament Budget Session khawm a hung um vat ta ding a ni a. Sawrkar hmasa hai khan chu budget an siemin sawrkar thawktuhai hlaw ding an ngaipawimaw hle niin an lang. Hi hi office expenditure, sawrkar thawktuhai enkawlna ding hamṭhatna chi tum tum, Medical reimbursement le thil dang dang haia sengso ding ṭhang der lo a nih. Sawrkar thawktuhai hlaw, sawrkar thawktuhai enkawlna ding le Department enkawlna ding po po hi hang sut chieng chun 70% deuthaw a ni ring a um. A bak po 30% vel chu mipui ta ding ni ta sienla, budget-a chun mipui ta ding a tlawm hle tina a nih. Hieng hi chu mipui budget a tlingzo naw a nih. Tuta Central-a sawrkarna cheltu BJP chun election hun lai khan mipui, ram le hnam hmasawnna ding le dawmsangna ding an ngaipawimaw le thaw ding thu nasa takin an hril vung a, July 10, 2014 khin Parliament ah Union Budget, 2014-15 hung phar an ta, chu taka chun mipui budget a ni le ninaw hriet theiin a hung um ding a nih. Budget tharah tax lak sukpung a ni dim, thil man ieng ieng am suksang ning a ta ti hai hi India mipui hai hriet chak a nih. Hi lei hin Parliament a Union Budget phara um ding hi India ram mipui hai chun nghakhla takin an lo thlir ṭhup el a nih.


Image sources: phualvatimes and Angel's Vision