Mi tamtak lo nghakhla em em, Lien Shakum Music Video Album hmasatak ‘Punk Pawisa Neilo’ ti chu mitin inchawk thei dingin Pu Lalramsang Infimate MCS, Addl. DC, Bishnupur Dist. in a lo Tlangzar tah

Tuithaphai: Dec. 27, 2014 6pm – 10:30pm khan tulai Hmar khawvela hit kai mek le Tuithaphai phairuom laia TV Local Cable Demand Channel a ‘Punk Pawisa Neilo’ le ‘Bithu D’ ti hla hai leia “Song of the Week le Song of the Month” lo hau phak rawp ta hlak, Pu Lien Shakum a Music Video Album hmasatak, ‘Punk Pawisa Neilo’ ti chu Tlangzarna hun (Releasing Programme), H.S.A. Campus Rengkai, CCPur hmun ah puithu taka nei a nih. Hi Album hi mitin inchawk thei dingin Pu Lalramsang Infimate MCS, Addl. DC, Bishnupur Dist. chun Khuollien niin a lo Tlangzar tah.

Hi Album neitu le siemtu chu inpakum le ngaisangum a ti thuhai hrilin, Album buotsainaa sengsohai thangpuina dingin thilpek a’nhlan. Hi huna Khuollien a nuhmei, Pi Lalneizo (Miss Kut Photogenic, Manipur pumpuia lo ni phak ngat ta hlak) chun hi hun hi a tawiawm ve baka Hmar hnam sunga thuoitu inlar tak tak Pu, Upa Laldawnlien Varte Gen. President, HYA GHQ le a sunghai (Imphal), Pu Suozalien President, HAA le a ruolhai, HSA GHQ le JHQ tienga thuoitu le Social Worker iemanizat khawmin an tawiawm a nih. Hi zan hin hi album thangpuina ding hin mi tlawmngaihaiin INR Cheng 5,000/-; 3,000/-; 2,000/-; 1,000/-; 500/-; 200/- haiin an inchawk pek tlangpui tawl. Hla request khawm a tam hle a. Hun karlaka hai Lien Shakum baka Lalthangkung (Kanghling Father), Joshua L. Khawbung (HSA Platinum Star Top 10), Christina Shakum (HSA Platinum Star), Gloria Khawlhring (Vocalist, Semikah Band), Lalramsang F. Tusing (Captain, Hmar FC), Catherine L. Ralsun (Haire Hai- Job Card hlaw lak phat chun) haia inthawk hla mawi tak tak ngaithlak le Hip Hop dance Marin (SNUMB Crew) a inthawk en nuomum tak el en a nih. Mipui mit le na a tlaiin programme a hlawtling hle. FZ Sound, CCPur a dinga nei hmasatak, Lighting Salem Hard Ware le Power Supply Sanjoy haiin an Service an hnesaw tak zet bawk.

Hi hun Hawngna Pathien kuoma Tawngtaina Rev. Lalthanglung AGEI in neiin, Album Preview chu Pu John L. Joute in a nei a, hi Album hi kum 2007 a siem tan tah le 2014 a siemzo, kum 7 sunga siem a ni thu, technology khawm an dang tak thu, a picture quality khawm VCD to HD format a ni thuhai hrilfiein, mipuiin an hrietthiem a nuom thuhai a hrilsa bawk. Lawmthu hrilna hun Pu Lalmalsawm Khawbung in a nei a. Tv. LRS Puruolte in hi Album le inzawm hin Local Demand Channel a hai Lien Shakum Music Video hai chu “Song of the Week le Song of the Month” an lo ni ta hlak thuhai hrilin, hiengang Album siem theia a um chu a lawmpui thu a hril a. Artiste hai album siemhai hrim hrim, anni hai ei promote-na a nih ti hrie a, a Copy indik tak chauh inchaw pek hlak ding, lo Pirate ching hi bansan ding le Sum-le-paia ei thangpui thei naw a lo ni khawma an hlasakhai Demand Channel a hai thlanglar/suklar pek zawnga thangpui hlak dingin mipuihai a ngenin, a fiel a, chu zo chun Pathien kuoma lawmthu hrilna le hunkhar Tawngtaina hun a hmangzoin hun suktawp a nih. Lien Shakum le Programme Organiser-hai chun hi hun hlutsaktuhai chunga lawmthu an hril. Hi Album a hin hla 11 umin, Copy khat a 150/- peia zawr ning a tih.

Post a Comment

Powered by Blogger.