Platinum Star Hunt Top 10 Plus Round hlawtling taka zo

Platinum Star Hunt Top 10 Plus Round hlawtling taka zo
- Alan Famhoite | Photo: Muona Infimate

Tuithaphai: HSA Platinum Star Hunt 2014 ‘Top-10 Plus Round’ chu November 8, 2014, 2PM khan Happy Heart School Auditorium, Bethel-ah nei anih. Pu Lalthansang Pulamte, Chief of Thingchawm Social Worker chun ribbon chepbawng-na neiin hun a hawng a, Guest Artiste Tv.Michael Paugolian, Elvina Ramnunmawi (Platinum Little Star), Pu Lalthankung F.Tusing (Kanghling Father), Pu Ramhluolien Khawbung le Nk.Grace Lalhmangai haia inthawk hlasak ngaithlak ani bawk. Hi huna hin Emmanuel Fimate, SDPO CCPur, Pu Lalsuong Famhoite, Gen Secy HAA, Pu Tlangmawi, Adviser, Sielmat HYA le Pi Lalrothar, Vice President HWA, haiin program an uop ve bakah HSA Hmarram Jt Hqrs a inthawk J.Ramcheimawi le Tv.Vanlaljona, HSA NC.Hills Jt Hqrts hai khawm anni Joint Headquarters aiaw in inruolsiekna (Top-10 Plus Round) a hin an hung thang. Hun karlaka Nk. Lalhlimum Joute, PJCC member chun Platinum Star en dinga hung mipui hai ticket chu lottery a inchangtirin, chu lottery chu Tv.Emmanuel Fimate, SDPO CCPur an pawttir a, a number pawt fuk tak ticket no: 078 Pu Jonathan,Thenmuol chun HSA T-Shirt a thlawnin a dawng.

Top-10 Plus Round kai thei chin an ni ta leiin an an thiem tawl ta hle leiin Judges hai khawma endikna kawngah thiem harsa an ti tan. Top-10 Plus Round Results chu thawleni khin chanchinbu fethlenga hung insuo ning a tih. Top-7 Plus Round hi 16 Nov pha H.L.Daka Memorial Hall, Rengkai ah Dar 2:00PM a nei ni tang a ta. Sinlung Hills District, HSA Joint Headquarters hai khawm hi huna hin hung thang ve tang an tih. Tickets, snacks le T-Shirt khawm a hmuna zawr nawk ning a ta,  Contestants hai mimal a lo sponsor(s) nuom dam ei um chun iengtiklai khawm lawmlut zing anih tiin Event Co-ordinator chun inhriettina a siem.