Sakhuo ei ti hi Politics intranna bulpui a nih, Isu khawm Politician a nih.- Pastor Letpu
CCPur: Oct. 25, 2014 zing dar 8:00AM – 9:20AM inkar sung khan Bharatya Janata Party (BJP), Churachandpur chun an President dinga ruot thar Mr. J. Haokip Lawmlutna (Wel Come) Programme chu BJP CCPur Dist. Office, Tuibuong hmun ah an nei. Hi hun hi BJP sunga thuoitu tum tum haiin an uop a. President thar dinga ruot Mr. J. Haokip chu Pathien Malsawmna Tawngtai pekna Pastor Letpu Kipgen, KBC Central Church, Tuibuong in a nei. Pastor Letpu chun, Sakhuo ei ti hi Politics intranna bulpui a ni thu, Isu khawm Politician a ni a, sienkhawm Isu Politics kha chu a thienghlim a nih. Eini khawma Politics hi ei sukthienghlim ding a nih tiin a hril.
BJP CCPur District President chungthu chu sukfel a ni tah a. Dist. President pakhat hnuoiah inkhaikhawm a ni tading a nih tiin hi hun a hin BJP Thuoituhai chun Chanchinbumihai kuomah an hril. BJP in hmatienga hmalak a tum hai lai hungtlung ding 2015 a MDC Election hun a Candidate ding hai sukfel vat le Bharatya Janata Yuva Morcha (BJYM) CCPur Dist./District Youth Office hawng vat tading, Mandal tinin Local Committee/Unit indin ding ti hai baka Member Enrollment chungchang a chun Mandal President annawleh, District hrietpuilo hai chu pawm an ni naw ding thu hai a thrang. Mr. J. Haokip hi Hmarveng khuomi niin Mr. L.M. Haokip IPS, SP CCPur lo ni ta hlak Unaupa le sangpa a nih. Ama hi kum tienga la naupang tak nisien khawm, mi ringum, mi inngaitlawm le mipui hmakhuo ngaia sin thaw nuom mi niin thu ei dawng.
Source: LRS Puruolte|Virthli Manipur

Post a Comment

Powered by Blogger.