H. Zaneisang, VIRTHLI Columnist

A thupuia inthawk hin chu, (L) Rev Lienrûm hla phuok, ‘Ni tla ngainaw Zion khawpui’ Independent No 233 hi ‘Critical Study/Assessment’ am a nih ei thaw ding a hawi vieu âwm ie. Amiruokchu, a hla thu fe a tluong le a tluongnaw thu am a nih, a tawng fe indik le indik naw thu am a nih hril ei tum nawh a, chuong thu hril ding chun thiemna le theina ka nei bawk nawh. Chu nêkin, a phuoktu Rev Lienrûm chanchin tawitê le, hi hla hung piengdân le tuchena hi hlâ le a phuoktu’n mi nun a la sukchâng pei thu tâwitê takmeua hril ei tum chau a ni lem.

(L) Rev Lienrum  (Sailienrûm), ‘Nitla ngai naw Zion khawpui’ phuoktu hi, Mr Sawilêr Hlilêr le  Mrs Lientuoi Khuolhring inkârah kum 1898 khan Senvawn khuoah a pieng a. Unau piengpui pathum a nei a, chuonghai chu (1)  Lalrem H/o Sêli Thiek, (2) Thakim  W/o Rev Thangngûr le (3) Zadailo W/o Rev Chawnga- hai an nih. An urêng lai Lienrûm hi a naupangtak a nih. Lienrûm hi pieng fel, hmêl tha le nungchang thatak a nih. A naupang lai khawm, thingtlâng naupang ni sien khawm, naupang danghai angin saihlî chawia vate per mei meihai a thaw/chîng ve ngai nawh. A pu thiempu a ni leiin a pa khawma thiempu sin a hung thaw ve pei a. Chu zâr pei chu ni ding a nih a, ama khawm hin lungril takah thiempu sin thaw ve nuomna a nei hlak.

Ringtu a hung ni dân:- Tleirâwl kum 15 mi chau a niin, kum 1913 khan sipai puokphurin a ruolhai mi iemani zât leh Mizoram an pan a. Kolasib an hei lût chun, lam saka in pakhata hin nunghâk pakhat hi tukverah dâkin, “Thuro angin lên thiam ila, ka thlâwk ang vânramah chuan,” ti’n thiem takin a lo sak veng veng el a. Chu nunghâk hlasak ri a hang hriet chun, a lungril chu ver sawk ang hin a hriet a; hma tieng pan zai khawm rêl thei ta lo chun sâwt fût a ngîr a, a ruolhai chun hla fût an zamsan hman nghe nghe. Chutaka inthawk chun a lungrilah thildang hrim a châm thei ta nawh a. Mizorama inthawk Senvawnah a hung kîr nâwk hnung chun kristienah an pêk ve tah a.

Rawngbâwl dingin an buotsai:- Chuonga Isu Krista ringtu nia Kristiena a hung inpêk hnung chun, âwinawhai lai Krista Chanchintha hrila rawngbâwl nuomna a hung nei tâk leiin, Lalpa rawng bâwl ding chun an buotsai tan tah a. Kum 1914 khan Rev R Dâla sikulah kaiin lekha an chûk tan a. Kum 1915 kumin Lower Primary (Pâwl thum) a zo. Hi kum hin Isu’n a sandam ngei zie a hriet. A nu le pa an vawi êm êm a, kristien (ringtu) ni ve dingin nasa takin a thlêm ngat ngat hlak. Pathien zârin a hlawtling a, a nu le pa khawm an thi hma’n ringtu an ni ve ve a nih. Kum 1915 khan Baptisma thu an chûk a, a passed nghâl. Hi kum ma hin Rev R Dala kutah baptisma a chang. Isu Krista intlanna Chanchintha, la hrenawhai kuomah hril dinga fesuok nuomna a nei leiin Rev R Dala kuomah tirko sin a hnih a. A lekha inchûk lai daia inthawk Rev R Dala hin tirko dingin a lungrila a lo huol lâwk tasa a ni leiin kum 1916 – 1917, kum 2 sûng Bible an chûktir.

Rawngbâwlin a suok:-  “Fe rawh, hi taka inthawka hlatakah, Jentail-hai kuomah tir lem ka ti che,” Thithawhai 22:21 thu hi hmangin Gangte biela Chanchintha hril dinga Pathien kona a dawng leiin, Rev R Dâla kuoma tirko sin a hni khawm chu ngaisak chang ta lo chun, 1918 kum chun Senvawn suoksanin Suongsâng a pan tah a. Hun sâwtnawte ah ring thar iemani zât a lâk nghâl a. Amiruokchu, chuong ring tharhai chu an nu le pahai ringnawmi an la ni leiin harsatna namên lo an tuok nghâl a. Kum 1918 le 1921 inkâr kum 4 sûng Gangte biel khaw hrang hrangah ringtu lain, kohran a ngîr tah a. Ama hi Gangte biela Pathien thu hriltu missionary hmasatak nia hriet a nih.

Kawppui (Nuhmei) a nei :- Tlangvâl duong tha le pieng nal tak, makhât chaua rawngbâwla khaw danga a um chu hming siet pal khawm um thei a nih ti hrein, a umnaw kâr, a hriet thak lovin a nu le pa chun Senvawn nunghâk Khuonglienpui (Mr  Zotinlût Parate le Lienzakhâwl Songate naunu) chu a nuhmei dingin an lo biek fel vawng a. A nu le pa chun kum 1921 Krismas le kum 1922 Kum Thar chu an khuo Senvawna hmang dingin an inchâ phei a. Nu le pa thu sêl thak lovin kum 1922 Kum Thar lâwm zo hlim chun Rev R Dâla kutah nupa ni dingin kut insuina an lo nei tah a.

Tirko sin pêk a nih:- Chuonga ring thar iemani zât a lâk tâk lei chun, March 1, 1922 kuma Buoltlâng (Vaiphei) khuoa Prebytery nei a ni tumin, a mâ’n hnina hranpa siem nâwk ta naw sien khawm, thla khatah Rs 3/ hlaw dingin tirko sin pêk a nih. A umna hmun ding khawm, rawngbâwla a lo um mêkna Suongsâng (Mangkholun an lalna khuo) chu ruot a ni nghe nghe.

Kawppui (nuhmei) a nei tâk bawk leiin mi hang hrawn zing chu thil thei a lo ni tâk naw leiin, a rawngbâwlna hmun Suongsânga chun in bâwl dingin an tintuo tah a. Suongsâng khaw laili, an hawina lai tak chu in bâwl theina ding hmun a ruok leiin chulai hmuna chun in bâwl a tum tah a. Amiruokchu, chulai hmun chu an lalpa inhmun a ni hlak zie le, an lalpa chulai hmuna a um lai chun ramhuoiin an sawisak hlak leiin a rausan a, chuleia hmun ruoka um zing a ni thu chu ama lainatu mi thenkhatin an hril a. Chulai hmuna in bâwl lo dingin thurâwn an pêk nghâl a. Amiruokchu, Tirko Lienrûm chun ramhuoi a tit naw thu le, ramhuoihai nêkin a ring Pathien chu an lal lem zie le, a ring Pathien hmaa chun ramhuoihai chu an tlânsiet hlak zie hrilin in chu a bâwl ta tho a. An lalpa meu khawm a um ngam nawna hmuna a hei um ngam ngat el lei chun ringtu 50 zet a hei lâksa nghâl a. June ni 5, 1923 khan naulutîrin nau nuhmei an nei a. Mr Kûnglien chun, “Khawvêl hmun tin rêngah vâna ei Lalpa  khi an thang vêl vawng a nih,” ti’n a hmingah Vânlalthang a sak a nih.

A rawngbâwlna :- Hieng hun lai hin khuo le khuo inkârah lam duk dak a la um nawh a, lampuihai chu vawk kawngrâu ang chau an la nih. Chuong khawm chu ni sien, thangthâm le invawt kârah, Gangte biela chau rawngbâwl lovin, Tuihlâng râl Mirâwnghai lai Pathien thu hrilin, Nungba chen a zu phâk hlak. Chuonga rawngbâwla an vâk vêl lai tum khat chu lamkawi lai tak hin sakei sûm 6 or sûm 7 vêl zet ding le hin an intuok thut el a. Ama hrildân chun, “Chuonga keipui leh lamkâwiah kan hei intuok thut chu, a tu lem lem khawm châng bîk lovin sâwt fut kan in en a. Ka mit mengah zâm hmêl ka suklang chun, a mi hung baw el kan lau si leiin, a mitah chieng taka en pum chun Lalpa kuomah ka tawngtai a. Chu phing leh a mi zâmsan tah a,” ti’n a hril.

Chuong ang chun, khuo le khuo inkâr, lam dukdak khawm um lo, vawk kawngrau ang chau lam chu hrawin, Isu Krista Chanchintha hrilin an vâk an vâk hlak a. Chuonga a that lai le vânglai hun po po, ruolhai le insukhlimna hun khawm nei ve hman lova khuo le khuo inkâr, ramreah an vâk an vâk hlak lai chun; tum khat chu,  Siempat ram, uleu, rengchal le vate chi hrang hranghai inhrâm ri bâk hriet ding um nawna hmun, ram rea an zin mêk lai chun, Lalpa chau naw chu thangpuitu ding le hnêmtu ding tukhawm an um nawh ti hrein,
            Ram daiah lunglên ka tuar ni hian Lalpa,            I hmêl pangpâr leh I aw mawi chuan;            Min hnêm ang che lungngaih awmhar tuarte zawng,            Sual vânga ka tah lai ka bang nâng e.
ti hla hi Lusei tawngin a phuok a. Hi hi a hla phuok hmasatak a nih.

S Lienrûm le lal Mângkholûn:- Chuonga Tirko Lienrûmin khawsûng hmun inhawina lai takah in bâwl a, chawkbuoitu um lova a um zing el tâk chu, Suongsâng lal Mângkholûn chun a thîk tah a. A in chu thiek a, vêng mawng, Phaiphêngzâwl an tia chun insawn dingin thu a pêk a. Lienrûm chun lal thu chu sêl lovin an sawn tah a. A in hmuna chun lal Mangkholûn chun in a bâwl a, ramhuoihai khawma an sukbuoi zui ta nawh. Lienrûm chun a kâwi a ngîlin lal thu chu zâwm sien khawm, lal chun zû an rui châng po leh vuok tumin, thingthuhring leh dâm a hnawt thlûr zing zing hlak.

Chuong te hrepa sawisaka a um hlak chu Hmuntha lal Nungkholienin a hriet chun, a khuoa um dingin Lienrûm chu a fiel a. Chuongchun, kum 1925 kum chun tirko Lienrûm chu Nungkholiena khuo Hmuntha a chun an sawn (pêm) tah a. Hmuntha khuoa a rawngbâwlna chu Pathienin mal a sâwm a, sâwt nawtê kâr ring thar 70 lai a lâk a. March ni 20, 1925-in nau pasal a nei a. Ring thar Zapau chun, “Lalpa Isu hi khawlai khawm a lien vêl vawng an tah,” ti’n a hmingah Lallienvêl a sak  a. Hmuntha kuoa Lienrûm an sawn kum chun Hmuntha chun bu le bâl an thar tha/tam khawp el a; Suongsâng ruok chun chu kum chun bu le bâl an thar dukdak naw thung. Chuphing leh Suongsâng lal Mangkholûn chun a khuoa um nâwk dingin Lienrûm chu a ko/thlêm nâwk tah a. Hmuntha lal le kohran hotuhai remtinain a kum nâwk, 1926 chun Suongsânga ma chun an sawn phei nâwk tah a.

Rev Lienrûm rawngbâwlna :- Rev Lienrum râwngbâwlna le a rawngbâwl dân kimchang deu hleka hril ding chun lekhabu sa tâwk tak ziek  ngai a tih. Ei  magazine  chitêa hin a tlângpuia khawm tâwtê takmeuin, ‘Ni tla ngainaw Zion khawpui’ hung piengdân le, hi hla hin vawisûn chena mi lungril le ngaituona a la sukchâng zing dân famkim lo deuvin hei hril ei tih.

Kum zabi 21-na ei chuongkai hnunga khawm kum 13 nêka tam hiel ei hmang tâk hnung khawm hin, ei chêngna Manipur sim thlang, Hmar biel le Gangte biel-haia hin Doctor hmêl an khât tâwk vietin, kum khatah vawi hni khat dâm ei hmu viet chau hlak a nih a. Rev Lienrûm rawngbâwl lai, tuhma kum 80 nêka tam rau liem tah lai lem khan chu, ei chêngna ramah doctor ti ang vêl chu vâna ra ang a la nih. Amiruokchu, Pathienin Rev Lienrum kut a hmang a; damnaw tamtak a sukdam. Ama hin thlarau damna thu chau hril lovin, taksa ta dinga damna, doctor sin nasa takin a thaw sa bawk a nih.

Rîla ra nau pahnih an nei tah a; amiruokchu, biel fangin an zin suok deu zing a tûl a. A nuhmei thing phur le tui chawi kâr takngiel khawm an nauhai dawntu ding tukhawm an um nawh. A nuhmei Khuonglienpui ta dingin thawdân ding dang um nghâl lo, a nauhai chu a sukin tê tê a, “Lalpa thing phur, tui châwia fe naw thei ka ni si naw leiin, ka nauhai hi nangin lo enkawl el rawh,” tia tawngtaina inhlânin a fesan hlak a. Tui chawi  thing phura a thanghmang kâr chun a nauhai chu thang lovin an lo in char char el hlak ni’n ama ngeiin a hril.

Chuong tehrepa khawsak chu Rev Lienrum nuhmei chun a pei zozai ta naw ni ding a ni a. Tum khat chu a pasal Rev Lienrûm biel fang hung inlâwi chu a nuhmei Khuonglienpui chun a lo biek nuom ta dêr dâl a. ‘A mi kamkhat met chun zâmsan nghâl ka tih’ ti lungril rân pumin a nuhmei chun a biek ta nawh a, a rawng hlak a bâwl nuom ta bawk nawh. A pasal biel fang hung inlawi chu a ûksak ta dêr dâ’l a. Amiruokchu, Rev Lienrum lungrila chun Pathienin sin a thaw ni ding a nih a; lungawinawna hmêl inlangtir thak lovin, tawngbau innêm taka be zui peiin, chu zân chun ama le ama rawng an bâwl chawp a. Chuphing leh a nuhmei lungawinawna khawm chun a dai sâwt bîk nawh a, lungawi le inhmangai takin rawng an inbâwl tuo nâwk tah a.

Chuongchun, mani in lumah, a nuhmei a nauhai khawm awp lum hman lovin biel fangin an zin deu zing a. Tum khat chu kum 1927 March thla khan, ni iem a ni zât biel fanga khaw hrang hrang a sir hnungin a nuhmei le nauhai umna khuo Suongsâng chu a hung tlung (lût) nâwk tah a. Amiruokchu, chu ni tak chu Suongsâng khaw mipuiin ‘Khawser’ an lo hmang (inser) ni tak a nih a. Khawser hmang ni hin khawsûng mi tukhawm inzina suok phal a ni nawh a, mikhuol/inzin tukhawm khaw danga inthawka hung lût phal a ni bawk nawh. Khawsûng mipui chanchin le an hun lo hmang mêk dân iengkhawm hre lo chun Rev Lienrûm, a chêngna Suongsâng khuo, zântieng hnunga a hei lût thu lalpa’n a hriet chun a lung a sen ta bêk bêk a; a khâwnbâwlhai tirin, zân inthim tâwm chun Rev Lienrûm chu khaw sûnga riek thei lo dingin a ina inthawk an va hnawt suok tah a.

Chuong hun lai chun lal thu chu sêl a, appeal thawna ding a um nawh. Nisa khawm kâwl bulah an hnuoi thla duor duor tâk hnung chun  khawhnâwm, ramhnuoia riek ding chun a fe ta hnak hnak a. Khuo an thim zui nghâl el ding a ni tâk leiin, khuoa inthawk fîng khat vela hla, lamsîra theirêlsin (theipaling) bul bathlâr chu bêlin zâl (riek) hmun a rem tah a. Sûn khawvar, nisa um lai  nisien chu, chulai hmuna darkâr li darkâr nga um chu thil rinum taluo a ni ring a um nawh. Amiruokchu, zân thil a ni leiin, ramsa le rûl tûr neihai tium tak nîng an tih. Nisa hlak chu mihriem i hang chel ding chi a ni dêr si nawh. Ramhnuoi thing bathlâr bêla a riekna hmuna inthawk hla nawteah a nuhmei a nauhai umhai sien khawm, an kârah lal thuneina tlain,lunginrim taka inngaituo tawn bâk thaw thei an nei nawh.

Chu nia thlang tieng kâwla nisa a hei tlum duor duor el chu, khawvêl var a hung hmua inthawk kum 29 (Ni 10580) nêka tam rau sûnga zântienga kâwla nisa liem danghai le khan chu an inthuhmun ta tlat dâ’l. Chu zân lungngaithlâk chu pumpel nuom sienkhawm, nisa hlak a chel ding thei si nawh. Chu zân chun thildang hrim a ngaituo thei ta nawh. Hnuoi mihriemhai ta dinga vân Lal Nauin a hringna a pêkna zâra vân khawpui, nisa tla ve ta ngai nawna  Zion khawpui a ngaina chu a zuol ta bêk bêk leiin,  Hmar tawng hmang ringtuhai ta dinga khawvêl umsûnga chul ta ngai lo ding  ‘Ni tla ngai naw Zion khawpui’  ti hla hi a  phuok (Pathienin a lo pêk)  a nih. Harsatna le tuornaa inthawka Pathien ngaina/inpâkna hung suok hi chu a hlu’n a hring bîk hlak nisien a hawi.  Ei hriet bel le ei sak zing zing ni sienkhawm, a châng khatna chau hei târlang ei tih.
            Ni tla ngai naw Zion khawpui,            Ngaiin kan rûm ka tap sûn ni tinin;
            Puon ropui silin an lêng tlansahai,            Ka ta’n hmun a um ve’m chu rama chun.
Zân an thim a, mani inluma khawm riek thei lova, sil ding puon hlap pakhat takngiel khawm nei loin, ramhnuoiah thingbul bêla zânkhuo a hei hmang chu, nisa tla tah ngai nawna hmun, Isu zâra puon ropui sila sandam nauhai an lêngna hmun ngai ngâwi ngâwiin, a ta dingin zân sâwttak zân a hei hmang ding chu …….. Suongtuona ringawt khawma ama lunginsietna leiin mittui a hnâi kuor el hlak ie.

Hla tha tak el ‘Ni tla ngai naw Zion khawpui’ a hung pieng theina dinga khawsûnga riek thei lo dinga hnawt suoktu, Suongsâng lal chu Mangkholun a nih a. Ramhnuoiah thing bul bêla riek dinga Rev Lienrum lalin a hnawtsuok hun hi March ni 20, 1927 nia hriet a nih. (A ni thua hin za ah za ruok chun ei chieng chie nawh). Chun, hieng hun lai hin Suongsâng  khaw mipui za ah sâwmriet nêka tam hman chu ringnawmi an la ni leiin, lal Mangkholûn hi a thinsiet le Rev Lienrûm a theida lei hrim hrima hnawtsuok an nawh, ti hi thil chieng le pawm um tak nî’n an lang. A san chu, Krista Chanchinthain a la kâpvar hmaa Suongsâng khaw mipui hunser pawimaw bêk bêk el, KHAWSER an hmang nia an dân ngîr lai, khaw sûnga inthawk suok le khaw puo tienga inthawk   khaw sunga lût phal lo dân, tukhawma an bawsiet thieng lo kha, Krista palai Rev Lienrûm khan a bawsiet tlat an nâwm. Chuleiin, vânram ngaina hla tha tak el a pieng theina dinga Pathien sinthaw ni lem a tih, ti chu tiemtuhai pawmdân ni sien  nuom a um.

Tuhin Suongsângah Mangkholun tupa (a naupa nau) Nungkholien Ginchungnung lalin an thung mêk a. Ginchungnung hi ringtu, Pathien ram ta dinga mi thahnemngai tak el a ni leiin kum 2008 khan a khuoah uma rawng bâwl dingin David Thangtinlal a fiel a. Chuongchun, David Thangtinlal lungrilah, Ginchungnung a pu Mangkholûn-in Rev Lienrûm chunga thil a lo suksuolna chungchângah, a nauhai kuoma ngaidam inhni dingin Ginchungnung chu a nawr ta rak a. Kum 80 nêka tam liemtah laia a pu’n Pathien rawngbâwltu chunga a lo suksuolna chunga ngaidam inhni ding chun David Thangtinlal le Evangelist Sehlal chun Suongsâng lal Ginchungnung chu an nawr ta rak el a.

Chuongchun, December ni 19, 2013 zân dar 6 khan David Thangtinlal rawiin mi 16, Rev Lienrûm naupa Pastor Vâna in Rengkai-ah  an hung a. Evangelist Sehlalin inkhâwmna a keihruoi a. Pastor Pension pakhatin Hmar tawnga thu a hril zo chun, tuva Suongsâng lal Ginchungnung chun Rev Lienrum nauhai kuomah, “Kan pu Mangkholûnin khaw sûngah lût thei lo dinga in pa Lienrûm a lo hnawtdawk kha Pathien hmingin mi ngaidam un la, taksa le thlarau malsâwmna kan dawng theina dingin mi tawngtaipêk ro,” ti’n ngaidam inhnina le annia inthawk malsâwmna a hni a.

Rev Lienrum a nauhai, Lallienvêl, Pastor J Vana, Pastor L Neithang chun, Suongsâng lal Ginchungnungin an pa Rev Lienrûm a hnawtsuokna chungchângah iengkhawm lungril natna an neinaw zie le, Pathien remruot a ni lem zie hrilin, Pathien hminga an ngaidamna thu an puong a. Lal Ginchungnung le Suongsâng mipuiin bu le bâl le Thlarau malsâwmna an dawng pei theina dingin an tawngtaipêk a; hi zân hin hun hlimum tak an hmang tlâng a nih.

Rev Lienrum nauhaiin December ni 19, 2013 zâna Suongsâng lal le a khaw mipuihai ta dinga Pathien kuoma an hnina chu a takin a tlung nghâl a. Tukum January 2014 khan an khuoah Community Hall bâwlna ding sum thahnem tak Manipur sawrkâra inthawk an dawng a. An thil dawng chu, ‘An kaw mipui ta dinga (L) Rev Lienrum nauhaiin Pathien kuoma an hni pêkna zâr a nih’ ti lal Ginchungnung lungrilah a um leiin, Pathien kuoma lâwmthu hril inkhâwmna nei tûla hrietna a nei tlat leiin; chu programme chu April 24, 2014 khan hmang a nih. Hi programme hi bâwng 2, vawk 2 le âr iemani zât thatin ruoi the a nih a. Hi inkhâwmna hi, ‘Kisîkna Maichâm’ tia ko a nih. Lung khawm phun a nih a. Fiela um angin hi hun hi Pastor L Neithang S/o (L) Rev Lienrûm le midang 15-in an zu hmangpui.  Lungdaw hawngna le Pathien thucha hrilna Pastor L Neithangin a nei (hmang).

Suongsâng lal Ginchungnung le a khaw mipuiin, kum 87 lai zet liem taha an khaw lal lo ni tah Mangkholûn suksuolna, anni mawa ngaia Pathien hminga ngaidam an inhni hi chu, entawn tlâk an va ni ngei aw !!


Thulâknahai: 1) ‘Ni tla ngai naw Zion khawpui’ written by Pastor L Neithang, Unpublish.
                     2) Rev J Vâna S/o (L) Rev Lienrum of Rengkai, Churachandpur.

                     3) Pastor L Neithang S/o (L) Rev Lienrûm of Rengkai, Churachandpur. 

Post a Comment

Powered by Blogger.