CCPur, September 13, 2014 (FoxJournal): Vawisun khan HWA Rengkai Unit hai chun Tv. Emmanuel Fimate CCPur, SDPO chu ama Office ah a sin lawmpuina le inpawltlangna an hang nei pui. Hi huna hin Rengkai HWA hai leh thu tam tak an hmalak pei dan ding hai dam hriltlangna an nei. Rengkai HWA hai chun hieng ang tlangval feltak el mani sina ringum mi ei nei hi lawmum an ti thu le hi a sin le khawtlang thatna dinga rawng a bawlna kawngah kawng iengkim a an thlawp pei ding thu le hi a sin harsatak el hi huoisen taka sunzawm pei dingin ditsakna insangtak an inhlan a Hmar Thangsuopuon insiltirna an nei zovin tawngtaipekna an nei nghal.
Hi huna hin SDPO khawma thu tamtak a lo hril ve a, tulai Bank Fraud le Zu khap chungchang ah a hmalakna le thu um dan hai a hrillang. A hrilnaa chun, hi sin a tan phut tir lai khan chu inthina chi dang dang hai a dawng thu, phone call khawm tamtak a dawng thu hai a hril a. Sienkhawm, thiltha ei hriet sih a ei thaw naw chun suol a ni leiin lo thei loa thaw tul a ti thu le hremhmun a tla ding invawia an vawi hiel ani thu a hril. A then chun an thaw sawt pei naw ding dam tiin thuthang tam tak a um a anachu hi sin hi kan sin ana kan thaw pei ding a nih a tia report an dawng na le tul an tina hmun tieng an fe nghal pei thu a hril.
Mi dang angin hun awl nei nuom ve lang chu zantieng dar 4-5 velin ka tin ve thei. Anachu, hi sin thil hi burden angin ka neia zan dar 8 chen chen khawlaidung, thlanmuol, bus parking na hmun hai kan fang kuol hlak a zan dar 8-9 hi ka tinna tlangpui a ni hlak. Ei chengna rama hin ringnawtuhaiin zu an suong char char a eini ringtuhaiin ei dawn char char a nih. Ei inbul el a hai khawm ram ei lak thei ta nawh a, a tha po ei umkhawma ei va ra suok ta naw a nih tiin a hril.
Society ta dingin thaw nuom ka neia sin dang hi ka dit ngai naw hrim hrim a ka apply ngai naw bawk a nih. IPS/MPS hi ka sin chel nuom tak a nih tiin a hril. Thuneituhaiin an mi dit naw a an mi transfer a ni khawma pawi ka ti nawh. Tuta anga sin indik taka thaw ngam dan enkawltu an lo um ta ngai naw leiin Police hai khawm an lo dawi zo taa mi inza khawm an kai ta naw a nih. Police khaki uniform hi mi’n hung inza nawk ta hai sien ka nuom a, uniform hi missionary form anga hmang ka nuom bawk.
Sum indiknaw laklut hi ka nuom ngai naw a, ka service hi mipui ta dinga hmang tangkai ka nuom tak a nih. Suol hi inthat, inkap chau annawh ti ei hriet theina dinga Beer hai chen khawm ei hung man a nih. Pathien thu in a khap hai hi sawrkar khawma a khap tlangpui hai an nih
.
Kei kan dik chun ka hnuoia hai khawm indikin an huoi ve ding, ka chunga pa a huoia andik chun kawm chuong ang chu ka ni ve ding. Ei khawtlang nun suksietu tak chu inruithei thil hi a nih.
Ka um ta naw hnung khawma ka hnunga hi sin hung chel ve hai ta dingin hmadawn insang le pawimawtak ka maksan pek nuom a, an lo thaw naw a ni khawma mipuihaiin I hmaa pa hin hieng hin a thaw a tia mipuiin nawr na chang bengvarna ei nei theina ding le hi rawngbawlna hi a hring zing theina dingin thang ka lak a nih tiin a thu hrilnaa a hril sa.
Police hai khawm Uniform le zu dawn a phal ta naw thu le a dawn hai chu warning a pek pei ta thu a hril sa bawk.
Rengkai HWA haiin ditsak taka an hung kanna le thansuo-a a lan ngai naw lai khawma Hmar Thangsuopuon hai chen an hung insiltir chu lawmum a ti thu a hril lang bawk.


Post a Comment

Powered by Blogger.