Police form hi Missionary Uniform anga hmang ka nuom: SDPO
CCPUR: Hmar Women Association (HWA) Rengkai Unit chun zanikhan Tv. Emmanuel Fimate, MPS, SDPO, CCPur chu a Officeah lawmpuina neiin Hmar Thangsuopuon insiltirna an nei. Hi huna hin HWA Unit hmalak pei dan ding hai an hriltlangpui bakah khawtlang ṭhatna dinga a hmalakna kawnga an thlawp pei ding thu hrilin a hmalakna huoisen taka sunzawm pei dingin an infui. SDPO chun, tulai Bank Fraud le Zu khap chungchanga a hmalakna hai hi huna hin a hrillang ve a. A hmalakna lei hin vauna le phone call tam tak khawm a dawng thu a hril a. Sienkhawm thil-ṭha hre sia ei thaw naw chun suol a ni a, hremhmuna tla ding hai invawi ang ela an vawi a ni thu a hril. An hmalakna an la sunzawm pei ding thu a hril. Midang angin hunawl le mi zantieng dar 4-5 inkara ṭin ve chu ka nuom, sienkhawm ka mawphurna anga ngaiin zandar 8 chen chen khawlaidung, thlanmuol, bus parking le hmun dang dang hai kan fangkuol a, zan dar 8-9 damin kan ṭin tlangpui hlak. Society ta dinga thaw nuom ka nei leiin sin dang ka dit ngainaw leiin inhni khawm kan hni ngai nawh. IPS/MPS hi ka sin chel nuom tak a nih. Thuneitu han an mi ditnawa, an mi sawn hmang khawma pawi ka ti nawh. Indik taka sin thaw ngam an lo um ngainaw leiin Police khawmin mi inza an kai tanaw a ni a, Police Khakhi uniform min an hung inza nawk ka nuom a, uniform hi missionary uniform anga hmang ka nuom bawk tiin a hril. Indiklo taka sum laklut ka nuom naw a, ka service mipui ta dinga ṭangkai taka hmang ka nuom tak. Pathien thuin a khap hai hi sawrkar khawmin a khap tlangpui hlak a nih. Ei khawtlang suksetu tak chu inruithei a nih. Ka umnaw hnunga hi sin hung zawm vetu hai ta dinga hmadawm insang le pawimaw tak maksan pek ka nuom, an lo thaw naw a ni khawmin mipui han nawrna chang an hriet theina dingin hma ka lak a nih. Police hai khawm Uniform le zu dawn phal a ninaw leiin a lo dawn hai khawm warning pek pei an nitah tiin a hril a. Lawmpuina Thangsuopuon insiltirtu Rengkai HWA hai chunga lawmthu a hril.

Joint Director in a kaisang
CCPUR: Pu Kamdinglien Buongpui of Lamphel, Imphal MFS Grade-II, Deputy Director, Directorate of Treasuries & Accounts, Govt. of Manipur chu Joint Director, Treasury & Accounts (MFS Grade-I) Pay Scale Rs. 15,600-39,100+ Grade pay Rs. 6,600) in a kaisang. A kaisangna hi ei Chanchinbu chun a lawmpui hle.

Lampui chimna hmun a se zuol pei
PARBUNG: September 13, 2014 nia Parbung khaw hnuoi, Parbung sipai camp (NH-150/2) lampui chimna hmun chu a la chim zing a, hi lei hin motor chau ni lovin mihriem khawm in an hraw ngam ta nawh. BRTF han theitawp suoa khawl pahni dam hmanga a khingtieng-a khingtieng ve ve sunnithlaka an siem zing khan chu zantieng chu a huoi zuol deu motor hai chu an tlan dawk thei hram hlak. Sun huna sukfai le siemṭhat a ni khawmin zan karin pilvung in a lo nel nawk vawng hlak a nih. Bieltu MLA khawmin hi lampui siet hi a ngaimaw hle a. Sienkhawm fak le dawn ding Dawr-a stock hai a bo vang tawl ta leiin mipui chu an beidawng ta hle tiin ei thu dawngna chun a hril. Hi lai hmuna hin JCB pahni bek um zing thei sien chu lampui hi tawite te chu an hawng thei zing ring a ni a, hi lai hmuna JCB pahni bek a umzing thei dan ding thuneitu han ngaituo pek thei hai sien an nuom thu mipui chun an hril.

Cancer awareness & detection camp
CCPUR: Zani 10AM khan Cancer Care Society, Imphal East le Jerusalem Clinic hai huoihawtnain Salem Veng-a Jerusalem Clinic-ah Cancer Awareness and early detection camp nei a nih. Hi huna hin Imphal-a inthawk Dr Dhaneshwor Sharma, Ast. Prof. RIMS le Dr Jenila K., Dentist han damnaw mi 70 chuong an en.

HSA Platinum Star Hunt ṭan
CCPUR: September 13, 2014 Zantieng 1:00 pm a inthawk khan HSA, GHQ Platinum Jubilee Celebration fe mek le inzawma “HSA Platinum Star Hunt” (Malzai/Solo a inruolsiekna) 1st Audition Round chu Pu HL Daka Memorial Hall, HSA Campus, Rengkai, CCPur, Manipur-ah ṭan a nih. Hi huna hin mi 38 lai an ṭhang a, 1st Audition Round Result hi puong nghal a ni a, mi 31 an fethleng. 2nd Audition round Sept. 20, 2014, 1PM in a hmun pangngai bawka nei nawk ning a tih. Judges in Pu James Songrolal Songate, Pu Edward TC Hrangate, Pu David Buhril le Pi Lalparmawi @Parte hai an ṭhang. Platinum Star Hunt hi HSA Platinum Jubilee Celebration Grand Finale hun Dec. 11 – 14, 2014 sunga ursun taka inser hun Dec. 12, 2014 ni khin Grand Finale le Result Puong a ni dinga riruong a nih.

Dr Amo in ṭhangpuina Rs. 75,000 a pek
CCPUR: HSA Platinum Jubilee Celebration Committee (PJCC) le Event Co-ordinators, HSA Platinum Star Hunt hai chun zani 8:30AM khan Pu Dr. Chalton Lien Amo Chairman, Hills Area Committee (HAC), Govt. of Manipur le MLA Tipaimukh A/C chu Imphal-a a quarter-ah an van hmupui. Hi huna hin Dr Amo chun HSA Platinum Star Hunt fe meka hmang dingin Rs. 75,000/- zet a lo pek. HSA PJCC chun Dr Amo chunga lawmthu an hril.

SP mum 14841 leh pasal pakhat man
CCPUR: District Police-a Drug Cell-a OC SI Thangpu Tonsing inrawinain zani hmasa zan dar 4:30 vel khan Police-a Drugs Cell hai chun Rengkai Venglai-a um Francis Vala (31) s/o (L) Lienkhomang chengnain-ah Spasmo Proxyvon (SP) mum 14841 dapdawkin an man. SP mana um hi mum khatah Rs. 20/- a hisapin mana um po hi Rs. 2,96,820/- manhu a nih. CCPur Police chun hi le inzawm hin FIR No. 90(9) 2014 CCP-PS U/S 21(C) ND & PS Act an registered a. Mr Francis Vala hi zanikhan Chief Judicial Magistrate (CJM), CCPur hmaah inlangtir a ni a, CJM chun Sept. 18, 2014 chen Police Custody-a la um phawt dingin a chungthu a rel.

Asian Games-ah Manipur mi ṭhahnemtawk tak
IMPHAL: September 19, 2014- October 4, 2014 inkar sunga Incheon, South Koreaa 17th Asian Games hung um dinga India ram hminga inkhelna chi tum tuma ṭhang dinghai lai Manipur mi ṭhahnemtawk tak an ṭhang. Manipur inkhelmi hai chu Thal kap inel, Boxing, Canoeing & Kayaking, Football, Rowing, Sepak Takraw, Weightlifting, Wrestling le Wushu haiah ṭhang an tih. India team chun Sept. 20, 2014 in New Delhi suoksanin Incheon pan an tih. Bijoy Koijom, President, Manipur Badminton Association (MBA) le Ex-MLA chu Incheon, South Korea rama 17th Asian Games hung um dinga Team Manager dinga ruot ve a nih.


Post a Comment

Powered by Blogger.