HSA Guwahati Freshers' Social Meet cum Platinum Jubilee Celebration ropui taka hmang a nih

Guwahati, August 23, 2014: Hmar Students’ Association (HSA) Joint Headquarters, Guwahati huoihawtna hnuoia GMCH Auditorium, Bhangagarh, Guwahati (Northeast a Auditorium lienpawl tak) hmun-ah Freshers' Social Meet le HSA Platinum Jubilee lawmna hun ropui taka hmang a nih.

Hi hun a hin Chief Guest in Pi Sherry Lalthangzo, IES, NEC Director (Planning) hmang a ni a, Guest of Honour in Pu David Neitham, APS, Asst. Inspector General of Police, Assam hmang a nih. Anni hai bak a hin HSA General Headquarters a inthawkin Pu Lalthlamuana Hmar, President, Tv. Simon L Infimate, Asst.General Secretary, Tv Lalremlien Neitham, Info.Secretary haiin an hung uop baka Shillonga inthawkin HYA President Pu Rohminglien Buhril, IFS le Shillong HSA President Tv Brando H Keivom le a member chanpui thahnem tawk tak an hung thang ve a nih.

Hi hun hi hun hnia thein, hun khatna-ah Freshers' Social Meet hmang a ni a, hi hun a hin Guwahati hmuna lekha inchuk dinga hung thar hai lawmlutna le tawngtai pekna hun hai nei a ni a chun inchukna tienga thawtha bik zuol mi iemanizat hai kuoma chawimawina thilpek inhlanna nei a ni bawk. Mr le Miss Freshers thlangna nei a ni a Mr Freshers dingin Tv. Lalsakrung Infimate le Miss Freshers dingin Nk. Gloria Khawlhring hai thlang an nih.

Hun hnina hi HSA Platinum Jubilee lawmna hun a hmang a ni a, hun hmasa tieng Pu Lalringum Sanate, Chairman, Organising Committee in Guests hai le mipui fekhawm hai lawmlutna hun a nei zo charin mipuiin Platinum Jubilee le inzawm'n a ruolin Pledge hai nei a nih.

Chief Guest Pi Sherry Lalthangzo chawimawina thilpek inhlan a ni zo in thuhrilna a nei a, a thuhrilna a chun Pathien in kut le ke a mi pek senga, hienghai hi ei hmang tangkai theina dingin ei nitin nun Pathien kuoma inhlan a pawimaw zie hai a hril a, khawvel a hin limit a um naw thu le student hai thang la nasa nawk zuol dingin an fui. Hi bak a hin inchuklai hai vision neia hun hmang ding le hun hmang thiem dingin an fui a, tulaia ei buoina tak chu educated unemployed ani tak leiin hrietna chau ni lo in skill development a pawimaw tah tiin a hril. Taima taka sinthaw/lekha inchuk chun khawvel hi ei ta a nih tiin inchuklai hai le mipui fekhawm hai chu a hrila, inchuklai hai inchukna tienga buoina le harsatna nei hai ta dingin a theina kawngkawnga thangpui dingin an pei zing thu a hrilsa bawk a nih.

Hi hun a bawk a hin Guest of Honour Pu David Neitham in thuhrilna neiin tumruona nei ding le sinthawna ahai khawm a lu-lawk tak ni tum seng dingin a hril a, State le central sawrkar a sin hai hi vai hai ta ding chau an nawa, tumru takin Pathien hrie zingin thang lak a tul thu le infuina thucha tha tak tak a hril.
Anni hai bak ahin Special Invitees haia inthawk khawm'n thu tha tak tak ngaithlak a nih.

HSA Guwahati Joint Headquarters in Platinum Jubilee Souvenir a buotsai " ROHLU" ti chu Chief Guest in tlangzarna a neia mipui hai lai a thlawna sem nghal a nih.

Mr le Miss Platinum thlangna nei a ni a, Mr Platinum dingin Pu Ramditum Ralsun le Miss Platinum dingin Nk. Uniky Lungtau hai thlang an nih.

Platinum Jubilee le inzawma Guwahtai Joint Headquarters in Lucky Draw a thaw chu results puongna nei a ni a, lawmman dawngtu-hai chu 1st Prize (Hero Masestro)- Lalhmingmawi Infimate, 2nd Prize (LCD TV)- Tv. John Hekte le 3rd Prize (Refrigerator)- Pu Ropuithang.

Guest Artistes - Hmar nauhai laia khawm inlar tak tak Lalsanglien Zote (Hai re hai) Rosy Vanlalhlani (Sinlung Documentary), Kim Pachawn Infimate (Delhi Nunghak hlasakthiem) Tv. Buonga Zate (U Amitab or Mawngsawp a fe ding) le Local artistes hai chun mipui fekhawm hai chu rimawi in an inawi hne hle bawk a nih.

Ruoi inhnik tawk tak el the in hlimtlang taka hun hi hmang zo a nih.