Rev. Dr. H.M. Songate in UK le Wales a pan

Guwahati, July 29, 2014 (HT): Pray for the World Ministry (PFWM) hnuoia International Ministries Director, Rev. Dr H.M. Songate chun UK le Wales haia rawngbawlna nei dingin zanikhan Britain ram a pan. Rev. Dr H.M. Songate hin tuta thla tawp chen hin London hmuna Biekin iemanizat hai kanin rawngbawlna nei a ta, hi zo hin Wales pan a ta, Swansea hmuna kohran members 5-20 vel chau chau umna biekin 5 vel kan a tum. Biekin a kan ding hai lai hin Evan. Roberts inrawinaa kum 1904-05 laia revival ropui tak a tlungna Moriah Church khawm a thang. Hi Biekin hi Watkin Robert inkhawmna Biekin a ni a, nikum khan hi Biekin-a inkhawm (members) chu mi 12 kum upa tieng hai an ni a, members thenkhat an lo thita leiin tuhin members 9 vel chau an um ta niin Rev. Songate chun a hril. Aizawl hmuna indin International Choir team chun September 5, 2014 khin Rev. Dr H.M. Songate rawngbawlna hi zu thlawp an tih.

Wales rama hin Kohran nasatakin an tlusie a, Biekin hai khawm tamtak khar le zawr mek an nih. Biekin thenkhat chu Theatre dama hmang le, Mosolman han an sakhuo hmunpui dinga an inchawk le hmang mek khawm a um bawk. Hieng Kohran tlusie tah hai laia chanchintha hrila Biekin hai inngir nawk tumnaa PFWM hi indin a nih.