CCpur, July 25, 2014: Hmar Peoples' Convention-Democratic (HPC-D) chun tulai hnaia Aizawla Pu Hmingchunghnung a in tuola Mizoram Police hai motor bomb hmanga suksieta um kha anni thaw ngei a ni thu HPC-D thusuok siem chun a hril. Pu Hmingchunghnunga hi tuta Sinlung Hills Development Council (SHDC) a Chairman ni lai mek a nih.
Press Release chun 1994 Peace Accord, Mizoram le HPC inkar a sign ani khan Hmar mipui chun HPC Pu Hmingchunghnunga inrawi chu ringzo taka hmalatu le thuoitu dinga a dande a , sienkhawm HPC demand tak, India Constitution Six Schedule hnuoia ADC intlun ta nekin Peace Accord chun SHDC chu a piengpui ta lem, le Pu Hmingchunghnung hi Mizoram Sorkar leh indangna um lova Hmar hnam phatsan tu anih tiin a hril.
Chun hi hmaa HPC(D),Centre le Manipur Sorkar in Suspension of Operaion(SoO) an thaw zing lai MAP in Parvachawm, Lungthulien, Ngampabung le Patpuihmun khuo hai-ah nunrawng taka an va chetna lei khawm hi Hmingchunghnung le Mizoram Sorkar kutsuok lieu lieu anih a, HPC(D) in nuom sien chu khang hun lai khawm khan mipui ngaituona lei ninaw sien chu action a lak thei zing ti hai khawm an chuonsa bawk.
''HPC-D Special Operation Units hai chu Aizawl le Mizoram hmun dang dang-ah kan um zinga, kan thil thaw hi a tul chun kan thaw nawk ding. Hmar mipui hmusittu le suk thlabartu chu kan nuom hun hunah kan target thei zing ti hi Mizoram Sorkar khawma lo hrie raw seh'' tiin HPC-D chun thusuok a siem anih.
