VIRTHLI

~Joseph V Tuolor, Shillong

Khawvêl lal tamtak an hung pieng ta a, lal ropui tak tak hai vawisûn ni chen khawm a “the great” ti a mi haiin an hriet le ko tamtak khawvêl ah hin an hung pieng ve ta bawk, amiruokchu, Lal Isu Krista, Vanlal nau, khawvêl suol intlantu hung pieng dân hi amak ti naw ei um nawh ie. Khawvêl in Lal ding khawmin an ring naw rêng bawk a nih kha. A sandam ding Juda hai, a chipui hai meu khawm khan an hnâwl a nih. Piengna dinga a hmun thlang le a hun thlang dâm hi khawvêl ngai a chun a timing a fûk naw bawk, a hmun a fûk naw bawk a ngaina a um naw a nih.

Lal Isu Krista chu a hung pieng ta ngei a, vâna angel hai hungin hla mawitak an hung sak a, khawsak mivar haiin lal arasi zuiin Bethlehem bâwngin ah bawkkhupin chibai an va bûk a, thilpêk ropuitak hai an pêk bawk a, piengni lawm a chun a ropuina tieng khawm a ropui zuol bik hle. A huopkim jâwng khawma a huopkim hle, a var tak, mi ngaisâng tak ânthawk a hnuoihnung tak berampu hai chenin chibai an va bûk ve bawk a. A piengna lalram awptu lal Herod khawmin a pieng a hriet char khan chibai bûk ve a nuom thu a hril ani kha. Lal Herod chibai bûk tum dân chu thlangam a um tanaw khawpel. Ama nêk a inlal lem ding um chu a nuom naw leiin that hmang dei a tum ani kha. Khawsak mivar hai kha ân cha ang khan a inah khan lo kîr nâwk vangpal sien chu Lal Isu kha dam kher naw nih. Amiruokchu, Lalpa remruot dang ruol annaw... Lal Herod chun that dingin a zawng a, khawpui ani leiin a sipai hai le nasatakin zawng hai sienkhawm an zuk hmu el naw chu ning a tih. Lal Isu chu a piengna a lai hrui a thisen khawm la hul hman lo ding chu a jân a jânin Aigupta ram tieng a Pa Josef le a nu Mari chun an tlanhmang pui ani kha. Ama ta ding chun a nêk a inlal nuom hai umna hmun ah pieng a, sieilien chu thil theilo ani ve si a.

Ei mimal, ei insûng, ei khawtlâng, ei kohran le ei hnam a hin ei en chun Lal Isu inlal theinawna san ding tamtak ala um niin ân lang. Eini mihriem hai hi chu hmasiel, duâm, thudit, thiemchang nuom, thunei nuom, inlal nuom, ei thuneina hmunah eini nêk a aṭha lem khawm ni haisien mîn thu an hung nei ding nuomlo hai eini si hlak a. Ei bauin Krista’n lalna chang sien ei suk ti hlak de khawmin, ei lungril tak tak chun alo nuom nâwk ngai sinaw a. Krista rorêlna hnuoi a um ding chun, chapo thei ani naw a, mani insuong thei ani si nawh, duâm thei ni bawk lo, thunei a lalna inchu thei ani si nawh. Hieng popo hi Krista’n eini ah lalna a chang chun ei jâwm ding ani si lei hin ei lungril po povin Krista hi lalna ei pêk ngam ngai nawh. “mîn i hmai khingtieng an ben chun, khingtieng khawm dawpêk nâwk rawh” ti dâm hi chu zâwm thei chi a khawm ei ngai naw a nih.

USA dâm khu Kristien sakhuo an ngai pawimaw êm êm a, anin suk ringtu a, anin suk Pathien ṭi hle bawk a, an poisa a hai chen khawm “in God we trust” an ziek a, President rêng rêngin Bible hamngin thu tiemna an nei bawk hlak a, zuk en chun a mawi êm êm a, eini hai lungril khawm anni tieng ṭanin ei um hlak. Amiruokchu, a hmai khingtieng ben khawm nilo lo khîk zau ding an um khawma a bei lêtna ding râlthuom a siem ṭeu ṭeu ani khu. Remna siem dingin ralthuom le ânthawk hlak a. Eini khawm hi mawi êm êma ei um hlak lai hin einiah hin Krista ân lal tak tak am leh? Eini teh ami dem zawk ding le ami lo ti zawt anlo um pal chun tiin eilo insingsa hlak am? Remna dit êm êmin ralthuom le phaw le mani inhumhimna ding tâwk insingsa in remna ei siem tum hlak am? Inngaitlawm êm êmin tlawm nuom der lovin eilo um hlak am? Rorêltu nuom lovin mi chungah ro eilo rêl hlak am? Thildang khawm ama hluotu tamtak a um. Hieng ei zuk hril hai popo hi chu Krista lampui le ama inlalna a chun hieng ang hi a um ngai si naw a. Lal Herod khawm kha mi hriet ding chun Lal hung pieng kha chibai a bûk nuom le a lawmthu a hril ani kha tie.

Leh, eini khawm mimal tin le insûng tin le kohran tin hai chun hung tlung ding Christmas hmang dingin eiin puocha mêk tah ring a um. Eiin puocha dân hai ruokchu inang naw seng a tih. Thenkhat chun lungril inthiengtakin hmang tum eita, thenkhat ruokchun hlimhlawpna dâmin hmang tum ngei ei tih. Eiin puocha dân hi Lal Herod anga lo hrie a, eini nêka ei mimal, ei insûng, ei khawtlâng, ei kohran le ei hnam a inlal lem ding Lal hi, Lal ding hrim ani ti eilo pawm nuomaw ani chun, a pieng ding chu Lalpa remruot ana dang ruol hrim an nawh. Ei mimal, insûng, kohran, khawtlâng le ei hnam ah pieng ngei ata amiruokchu, thlangam lovin a jân a jânin eini lai um lovin Aigupta ram tieng ami mâksan nâwk ding a nih. Eini a hin Lal Krista chu ân Lal in Lalna chang sawng a tîm leh?

Copyright: VIRTHLI.COM retains full copyright of all published content, unless an excerpt or code snippet is attributed to another website. To republish posts, the best way to do this is with a link to this web page.